گِنتی 10

چاندی دے نرسِنگے

1رب العالمین مُوسیٰ کُوں آکھیا، 2”چاندی گھڑ تے اُوندے ڈُو نرسِنگے بنڑوا۔ تُوں اُنہاں کُوں جماعت کُوں کٹھا کرݨ تے قبیلیاں کُوں ٹورݨ کیتے اِستعمال کریں۔ 3جِیں ویلے ڈوہائیں نرسِنگیاں کُوں وجایا ونجے تاں یکی جماعت اِجتماع آلے تمبُو دے دَر تے تیڈے سامنڑے آ تے کٹھی تھی ونجے۔ 4پر جیکر ہِکو وجایا ونجے تاں صرف قبیلیاں دے سردار تیڈے سامنڑے کٹھے تھیوݨ۔ 5جیکر اُنہاں دی صرف ہِک اُچی اواز آوے تاں مُقدّس تمبُو دے مشرق ءچ راہوݨ آلے قبیلے روانہ تھیوݨ۔ 6وَل جِیں ویلے ڈُوجھی واری اُوندی ہِک اُچی اواز سُنڑائی ڈیوے تاں مُقدّس تمبُو دے جنُوب ءچ موجود قبیلے روانہ تھیوݨ۔ جِیں ویلے وی نرسِنگے دی ہِک اُچی اواز آوے تاں ایہ ٹُرݨ دا اعلان ہوسی۔ 7پر جماعت کُوں کٹھا کرݨ کیتے نرسِنگے دی اواز دیر تئیں سُنڑائی ونجے۔

8نرسِنگا وجاوݨ دی ذمہ واری ہارُون دے پوتراں یعنی کاہِناں کُوں ڈِتی ونجے۔ ایہ شرع تُہاڈے کیتے نسل در نسل قائم راہوے۔ 9جِیں ویلے تُساں آپنڑے مُلک ءچ کہیں ظالم دُشمنڑ نال لڑن کیتے نِکلو، تاں اُوندی ہِک اُچی اواز سُنڑوا ڈیوائے۔ وَل تُہاڈا خُدا رب العالمین تُہاکُوں یاد کر تے دُشمنڑ تُوں بچا گِھنسی۔

10خوشی دے موقعے اُتے وی یعنی مقررہ عیداں اُتے تے نویں چَن دیاں عیداں اُتے آپنڑیاں ساڑے ونجنڑ آلیاں قُربانیاں تے سلامتی دیاں قُربانیاں پیش کریندے ویلے ترسِنگے وجائے ونجنڑ۔ وَل تُہاڈا خُدا تُہاکُوں یاد کریسی۔ مَیں رب العالمین تُہاڈا خُدا ہاں۔“

سِینا پہاڑ تُوں روانگی

11بنی اِسرائیل دے مِصر ءچوں نِکلنڑ تُوں بعد ڈُوجھے سال دے ڈُوجھے مہینے دے وِیہویں ڈینہہ بدّل مُقدّس تمبُو تُوں اُتاں تھی گِیا۔ 12وَل بنی اِسرائیل سِینا دے بیابان تُوں روانہ تھئے تے جاہ جاہ سفر کریندے رِیہے اِتھوں تئیں جو بدّل فاران دے بیابان اُتے رُک گِیا۔

13اُوں ویلے او پہلی پھیری اُوں ترتیب نال روانہ تھئے جیہڑی رب العالمین مُوسیٰ دی معرفت مقرر کیتی ہئی۔ 14سبھ تُوں پہلے یہُوداہ دے قبیلے دا دستہ آپنڑے جھنڈے دے پِچھے روانہ تھیّا۔ اُنہاں دے دستے دا سردار نحسون بِن عِمّینداب ہا۔ 15نال ٹُرݨ آلے اِشکار قبیلے دے دستے دا سردار نتنی ایل بِن ضُغر ہا۔ 16وَل زبُولُون قبیلے دے دستے دا سردار الِیاب بِن حیلون ہا۔

17اِیندے بعد مُقدّس تمبُو لہایا گِیا تے بنی جیرسون تے بنی مراری اُونکُوں چا تے ٹُر پئے۔ 18اِنہاں لاویاں تُوں بعد رُوبِن قبیلے دا دستہ آپنڑے جھنڈے دے پِچھے روانہ تھیّا۔ اِنہاں دے دستے دا سردار الِیصُور بِن شِدیُور ہا۔ 19نال ٹُرݨ آلے شمعون قبیلے دے دستے دا سردار سلومی ایل بِن صُوری شدّی ہا۔ 20تے جد قبیلے دے دستے دا سردار اِلیاسف بِن دعُوایل ہا۔ 21وَل لاویاں ءچوں بنی قہات مُقدّس شیواں چا تے ٹُر پئے۔ اُنہاں دے منزل تئیں پُجنڑ تُوں پہلے مُقدّس تمبُو لا ڈِتا ویندا ہا۔

22اِیندے بعد اِفرائِیم قبیلے دا دستہ آپنڑے جھنڈے دے پِچھے روانہ تھیّا۔ اُنہاں دے دستے دا سردار الِیسمع بِن عِمّیہُود ہا۔ 23نال ٹُرݨ آلے منسّی قبیلے دے دستے دا سردار جَملی ایل بِن فداہصُور ہا۔ 24تے بِنیمِین دے قبیلے دے دستے دا سردار اَبِدان بِن جِدعونی ہا۔

25وَل دان قبیلے دا دستہ آپنڑے جھنڈے دے پِچھے اُنہاں سبھ دستیاں دے آخری محافظ دے طور تے روانہ تھیّا۔ اُنہاں دے دستے دا سردار اخیعزر بِن عمِیشدّی ہا۔ 26نال ٹُرݨ آلے آشر قبیلے دے دستے دا سردار فجعی ایل بِن عکران ہا۔ 27تے نفتالی دے قبیلے دے دستے دا سردار اَخِیرع بِن عینان ہا۔ 28بنی اِسرائیل اِیں ترتیب نال آپنڑے دستیاں دے مطابق روانہ تھیندے ہَن۔

مُوسیٰ حوباب کُوں نال ٹُرݨ کیتے درخاست کریندے

29مُوسیٰ آپنڑے سوہرے رعُوایل مِدیانی1دے پوتر حوباب کُوں آکھیا، ”اساں اُوں جاہ کیتے روانہ تھیندے پئے ہیں جِیندے بارے ءچ رب العالمین آکھیا ہے جو مَیں او تُہاکُوں ڈیساں۔ اِیں واسطے تُوں وی ساڈے نال جُل۔ اساں تیڈے نال بھلائی کریسوں کیوں جو رب العالمین بنی اِسرائیل نال بھلائی دا وعدہ کیتے۔“

30پر حوباب آکھیا، ”مَیں نال نہ ویساں بلکہ مَیں آپنڑے مُلک ءچ آپنڑے رشتے داراں کولھ واپس ویساں۔“

31وَل مُوسیٰ آکھیا، ”مہربانی کر تے ساکُوں نہ چھوڑ کیوں جو تُوں جانڑدیں جو بیابان ءچ اساں کیہڑی کیہڑی جاہ تے ڈیرے لا سگدے ہیں۔ تُوں ساکُوں بیابان ءچ رستہ ڈِکھا سگدیں۔ 32جیکر تُوں ساڈے نال جُلیں تاں اساں تیکُوں اُنہاں برکتاں ءچ شامل کر گِھنسوں جیہڑیاں رب العالمین ساکُوں ڈیسی۔“

سِینا پہاڑ تُوں سفر

33وَل اُنہاں رب العالمین دے پہاڑ تُوں روانہ تھی تے ترے ڈینہہ دا سفر کیتا۔ اِیں دوران رب العالمین دے عہد دا صندوق اُنہاں دے اگُوں اگُوں اُنہاں کیتے ارام کرݨ دی جاہ دا پتہ لاوݨ کیتے ٹُردا ریہا۔ 34جِیں ویلے او ڈیرے تُوں روانہ تھیندے تاں رب العالمین دا بدّل ڈینہہ ویلے اُنہاں دے اُتے راہندا۔

35عہد دے صندوق دے روانہ تھیندے ویلے مُوسیٰ ایہ اکھیندا ہا، ”یا رب العالمین! تیڈے دُشمنڑ کِھنڈ پُھنڈ ونج نڑ تے تیڈے مخالف تیڈے اگُوں بھج ونجنڑ۔“ 36تے جیہڑے ویلے وی او رُک ویندا تاں مُوسیٰ ایہ اکھیندا ہا، ”یا رب العالمین! ہزاراں ہزار اِسرائیلیاں دے کولھ واپس آ وَنج۔“