گِنتی 8

ڈیوے رکھنڑ دا طریقہ

1رب العالمین مُوسیٰ کُوں آکھیا، 2”ہارُون کُوں ڈسا، ’تَیں سَت ڈیویاں کُوں چراغ دان اُتے اِینویں رکھنڑیں جو او چراغ دان دا سامنڑے آلا حصہ روشن کرݨ‘۔“

3ہارُون اِینویں ای کیتا۔ جِیں طریقے رب العالمین مُوسیٰ کُوں حُکم ڈِتا ہا اُوں طریقے نال اُوں ڈیویاں کُوں رکھ ڈِتا تاں جو او سامنڑے آلا حصہ روشن کرݨ۔ 4چراغ دان پاوے تُوں گِھن تے اُتے دے پُھلاں تئیں سونے دے ہِک گھڑے ہوئے ٹوٹے نال بنڑیا ہویا ہا۔ مُوسیٰ اُونکُوں بالکل اُوں نمونے دے مطابق بنڑایا جیہڑا رب العالمین اُونکُوں ڈِکھایا ہا۔

لاویاں دی مخصوصیت

5رب العالمین مُوسیٰ کُوں آکھیا، 6”لاویاں کُوں باقی بنی اِسرائیل تُوں اَنج کر تے پاک صاف کر۔ 7اِیندے کیتے گُناہ تُوں پاک کرݨ آلا پانڑی اُنہاں اُتے چِھنڈک تے اُنہاں کُوں حُکم ڈے جو او آپنڑے جِسم دے یکے وال مُنواوݨ تے آپنڑے کپڑے دھووݨ۔ اِینویں او پاک صاف تھی ویسن۔ 8وَل او ہِک جوان ڈاند تے نال ای غلے دے نذرانے کیتے تیل رَلایا گِیا بہترین میدہ گِھننڑ۔ تُوں گُناہ تُوں پاک کرݨ آلی قُربانی کیتے ہِک جوان ڈاند وی چُنڑیں۔

9اِیندے بعد لاویاں کُوں اِجتماع آلے تمبُو دے سامنڑے کھڑا کر تے بنی اِسرائیل دی یکی جماعت کُوں اُتھاں کٹھا کریں۔ 10جِیں ویلے لاوی رب العالمین دے حضُور کھڑے تھیوݨ تاں باقی بنی اِسرائیل اُنہاں دے سِراں اُتے ہتھ رکھنڑ۔ 11وَل ہارُون لاویاں کُوں رب العالمین دے حضُور پیش کرے۔ اُنہاں کُوں بنی اِسرائیل ولُوں ہلائے ونجنڑ آلیاں قُربانیاں دے طور تے پیش کیتا ونجے تاں جو او رب العالمین دی خدمت کر سگنڑ۔ 12وَل لاوی آپنڑے ہتھ ڈوہائیں ڈانداں دے سِراں اُتے رکھنڑ تے تُوں ہِک ڈاند کُوں گُناہ تُوں پاک کرݨ آلی قُربانی دے طور تے، تے بئے کُوں ساڑے ونجنڑ آلی قُربانی دے طور تے رب العالمین کُوں پیش کریں تاں جو لاویاں دا کفارہ ڈِتا ونجے۔

13وَل لاویاں کُوں ہارُون تے اُوندے پوتراں دے سامنڑے کھڑا کر تے رب العالمین دے حضُور ہلائے ونجنڑ آلی قُربانی دے طور تے پیش کریں۔ 14اِینویں تُوں اُنہاں کُوں باقی بنی اِسرائیل تُوں اَنج کریں تے او میڈے ای ہوسن۔ 15اِیندے بعد ای او اِجتماع آلے تمبُو دی خدمت کیتے اندر آوݨ کیوں جو تَیں اُنہاں کُوں پاک صاف کر تے ہلائے ونجنڑ آلی قُربانی دے طور تے پیش کیتے، 16کیوں جو بنی اِسرائیل ءچوں لاوی پُورے طور تے میکُوں ڈِتے گئے ہِن۔ مَیں اِنہاں کُوں بنی اِسرائیل دے یکے پلوٹھیاں دی جاہ تے گِھن گِھدے، 17کیوں جو اِسرائیل ءچ پلیٹھی دا ہر نَر بال میڈا ہے بھانویں او اِنسان دا ہووے یا جانور دا۔ اُوں ڈینہوار جِیں ویلے مَیں مِصریاں دے پلوٹھیاں کُوں مار ڈِتا ہا، مَیں بنی اِسرائیل دے پلوٹھیاں کُوں آپنڑے کیتے مخصوص تے مُقدّس کر گِھدا ہا۔ 18اِیں کیتے مَیں لاویاں کُوں بنی اِسرائیل دے یکے پلوٹھیاں دی جاہ تے گِھن تے 19یکیاں کُوں ہارُون تے اُوندے پوتراں کُوں ڈِتے۔ او اِجتماع آلے تمبُو ءچ بنی اِسرائیل دی جاہ تے خدمت کرݨ تے اُنہاں کیتے کفارہ ڈِتا کرݨ تاں جو جِیں ویلے بنی اِسرائیل مُقدّس تمبُو دے کولھ آوݨ تاں اُنہاں ءچ کوئی وبا نہ کِھنڈے۔“

20مُوسیٰ، ہارُون تے بنی اِسرائیل دی یکی جماعت احتیاط نال لاویاں دے بارے ءچ رب العالمین دے حُکماں اُتے عمل کیتا۔ 21لاویاں آپنڑے آپ کُوں گُناہاں تُوں پاک کر تے آپنڑے کپڑیاں کُوں دھوتا۔ وَل ہارُون اُنہاں کُوں رب العالمین دے حضُور ہلائے ونجنڑ آلی قُربانی دے طور تے پیش کیتا تے اُنہاں دا کفارہ ڈِتا تاں جو او پاک تھی ونجنڑ۔ 22اِیندے بعد لاوی اِجتماع آلے تمبُو ءچ آئے تاں جو ہارُون تے اُوندے پوتراں دی نِگرانی ءچ خدمت کرݨ۔ اِینویں سبھ کُجھ اُونویں ای کیتا گِیا جِینویں رب العالمین مُوسیٰ کُوں حُکم ڈِتا ہا۔

23رب العالمین مُوسیٰ کُوں ایہ وی آکھیا، 24”لاویاں کیتے قانُون ایہ ہے جو او پنجھویہہ سال دی عُمر تُوں اِجتماع آلے تمبُو ءچ آپنڑی خدمت شروع کرݨ۔ 25تے پنجھاہ سال دی عُمر تُوں بعد اِیں خدمت تُوں فارغ تھی ونجنڑ تے مزید خدمت نہ کرݨ۔ 26اِیندے بعد او اِجتماع آلے تمبُو ءچ آپنڑے بِھرانواں دی مدد کر سگدے ہِن، پر خود خدمت نئیں کر سگدے۔ تُوں اِنہاں ہدایتاں دے مطابق لاویاں کُوں اُنہاں دیاں آپنڑیاں آپنڑیاں ذمہ واریاں ڈیونڑیاں ہِن۔“