Wel

Buk me angwen pa Moses ma kilwongo

WEL

Lanyut wilok madito ma i buk man

Buk me Wel tito kit ma jo Icrael pi mwaka ma cokcok pyere angwen guwoto kwede nia ki i got Cinai nio kwede wa tung kunyango me lobo ma Lubanga ocike me miyo botgi. Nying buk man oa ki i gin madit ma otime ikare meno. Man aye kwano wel dano mukwongo ki me aryone ma dok otime inge yalwak me aryo. Kwan mukwongo otime ma peya jo Icrael guweko got Cinai ki me aryo otime ki i Moab i tung kunyango me kulu Jordan. Kwan me aryo otime inge yalwak me acel. I kine me kwano wel dano me acel ki me aryo jo Icrael gucito Kadec-barnea tung kupiny me lobo Kanaan, ento pe gudonyo i lobo ma kiciko pireni ki kunu. I nge bedo kunu pi kare malac, gin gucito kunyango me kulu Jordan, kama jo mukene gunongo kabedo iye ki jo mukene guyube me ngolo kulu Jordan me cito i lobo ma Lubanga ociko pire.

Buk me Wel tito kit ma dano gubedo ma cwinygi ongabe angaba dok otur ikare ma gin obedo ka rwate ki peko mapol. Man oweko gin obedo ka jemo ikom Moses, ngat ma Lubanga owiro me telo wigi.

Buk man tito kit ma Lubanga gene kwede dok gwoko jone kadi bed gin obedo jo ma ludingo dok lujemo ikome. Moses kono ki tungcel obedo ngat ma tame atir kadi bed kare mukene diyo cwinye oloye woko ikom Lubanga ki ikom jo ma en obedo ka telogi.

Lacim wilok madito ma i buk man

Jo Icrael guyube me weko got Cinai

a. Kwano dano mukwongo

b. Cik mapatpat

c. Karama me Kato me aryone

A ki iwi got Cinai cito Moab

Gin mapatpat ma otime i Moab

Tito kit ma wot me a ki Ejipt nio Moab obedo kwede

Cik ma ki miyo bot lwak ma peya ki ngolo kulu Jordan