Wel 20

Pii ma oa i pata got

(Nia 17:1-7)

1Jo Icrael ki lwakgi ducu guo i tim Jin i dwe mukwongo, ci gutiro i Kadec, gubedo iye. Miriam oto, ka kiyike bene ki kenyo.

2Pii onongo peke me amata pa lwak, ci gucoke kacel ikom Moses ki Aron. 3Gin gukeco ikom Moses kun giwaco ni, “Kono yam wato woko ikare ma utmegiwa guto inyim Rwot, kono ber. 4Pingo nene ikelo lwak pa Rwot i tim ata kany, wek wato woko, wan kacel ki leewa? 5Pingo nene imiyo waa woko ki i Ejipt, ikelowa i kabedo man maraci? Kabedo ma pe ceko ngano, kadi wa oduru nyo olok nyo pomegranat; pii mo bene peke me amata.” 6Ci Moses ki Aron gua woko ki inyim lwak, gucito i dogola Kema me Rwate, gupoto piny aryeba ic ki cwercwiny. Ci deyo pa Rwot onen botgi. 7Rwot owaco ki Moses ni, 8“Kwany odo ki inyim Canduk lok me Caden, ci igur lwak kacel, wun ki omeru Aron, ci iwac ki pata got ki inyim lwak ni wek piine okati woko. Kitmeno ibikelo pii pirgi nia ki i pata got wek lwak gumati, ki leegi bene.” 9Ci Moses okwanyo odo ki inyim Rwot kit macalo ocike kwede.

10Moses ki Aron gucoko lwak kacel inyim pata got, ci Moses owaco botgi ni, “Dong wuwiny ba, wun lujemoni. Wumito ni wan wakel pii nia ki ipata got man pirwu?” 11Ci Moses oilo odo malo, ogoyo pata got ki odoone tyen aryo kulu; ci pii ocore limayi, lwak gumato, ki leegi makwo bene.

12Ento Rwot owaco bot Moses ki Aron ni, “Pien wun pe wuye an, kun pe wunyutu ki inyim jo Icrael ni an aleng, pimeno wun pe dong wubitero lwak man i lobo ma abimiyo botgini.” 13Man en aye pii me Meriba,1 kama jo Icrael gukeco iye ikom Rwot ci en onyute kene ni eleng.

Jo Edom gukwero ni jo Icrael pe owok ki i lobogi

14Moses ocwalo lukwena ocito bot rwot me Edom nia ki i Kadec ci gin owaco ni, “Omeru Icrael owaco kuman ni in ingeyo can madito ducu ma opoto ikomwa. 15Kit mayam kwariwa guwoto kwede i Ejipt, ma wabedo i Ejipt pi kare malac, ci jo Ejipt gutimowa magwa, wan ki kwariwa ducu. 16Ka yam wakok bot Rwot, ci en owinyo dwonwa, ka ocwalo lamalaika, okwanyowa woko ki i Ejipt. Ci kombedi dong watye i Kadec, i taun madong cok ki wang lobowu. 17Ber wuwek wawok ki i lobowu. Pe wabingak wawok ki i poto mo, nyo i poto olok, pe wabimato pii ma iwang it. Wabimol ma walubu gudu madit pa Rwot, pe wabingak wadok tung acam nyo tung acuc, nio ka wawok wakato wang lobowu.”

18Ento jo Edom guwaco ni, “Pe wubiwok ki i lobowa, ka wutemo ci miyo wan aye wabino ikomwu ki pala lucwan.”

19Ci jo Icrael gugamo ni, “Wabiwok igudu madit keken. Ka wamato piiwu mo, wan nyo leewa makwo, wabiculu wange. Wek wawok wakat ki tyenwa keken, lok mo mukene peke.”

20Ento jo Edom dok guwaco ni, “Pe wubiwok ki i lobowa.” Ci jo Edom gubino kalweny ikomgi ki lwak co mapol ki mony matek. 21Kitmeno jo Edom gukwero miyo jo Icrael me kato kun giwok ki i lobogi; omiyo jo Icrael gua guloke, guceyo yoo mukene.

Aron oto iwi got Kor

22Lwak jo Icrael ducu gua ki Kadec, gubino ite got Kor. 23Ci Rwot owaco bot Moses ki Aron ite got Kor, iwang lobo Edom ni, 24“Aron aye dong bito, bidok bot lutugi; en pe bidonyo i lobo ma amiyo bot jo Icrael, pien yam wujemo ikom cika i dog pii me Meriba. 25Ter Aron ki wode Eleajar, icit kwedgi malo iwi got Kor, 26iluny bongo tic pa Aron ducu ki ikome, ci iruk ki wode Eleajar, pien Aron dong bidok bot lutugi, en bito ki kunu.” 27Moses otiyo kit ma Rwot ocike kwede. Guito malo iwi got Kor kun lwak ducu neno. 282Ci Moses olunyu bongo tic pa Aron woko ducu, ci oruku kwede wode Eleajar. Aron oto woko ki kunu iwi got. Lacen Moses ki Eleajar gulor woko piny ki iwi got. 29Ka lwak jo Icrael ducu guneno ni Aron dong oto, ci gin gukumu pire pi nino pyere adek.