Wel 19

Buru roya makwar

1Rwot owaco bot Moses ki Aron ni, 2“Man aye cik ma An a Rwot aye aciko. Wac bot jo Icrael ni gukeli roya makwar mabere ma kome pe kimwonyo, ma peya kitiyo kwede. 3Ibimiyo bot ajwaka Eleajar ci kibitero woko inge gony, ka dong kibineko inyim Eleajar. 4Ajwaka Eleajar bigwelo remone ki nyig cinge, ci kiro remone tyen abiro mukemo nyim Kema me Rwate. 5Kibiwango kom roya woko ma kun en neno; pyene, ringone, remone ki cete, kibiwangone ducu. 6Dok ajwaka bikwanyo yat cedar ki anyero ki uci makwar ci bibologi i dye mac me wango ringo royani. 7Ka dok ajwaka pa Lubanga bilwoko bongine, ki lwoko kome, ka dong lacen bidok i gony; ento ajwaka pa Lubanga bibedo keni nio wa otyeno. 8Ngat ma owango royani bene bilwoko bongine, lwoko kome, ci bene bibedo keni nio wa otyeno. 91Ci dano mo ma olonye, ma pe kome kikeni aye bijobo buru royani, ci biketo i kabedo mo ma olony, woko ki inge gony. Kibikano pi lwak jo Icrael pi yubu pii me lwoko kwer; meno kibitimo pi kwanyo bal. 10Ngat ma ojobo buru bene bilwoko bongine ci bedo keni nio wa otyeno. Man bibedo cik matwal bot jo Icrael ki bot lurok ma bedo ikin gi.”

Gudu kom dano ma oto

11“Jo ma ogudu kom dano mo ma oto gibedo keni pi nino abiro. 12Gin bilonye keken gi ki pii me lwoko kwer inino me adeke ki me abirone, ci miyo gibedo ma olony. Ento ka pe gulonye keken gi inino me adeke ki me abirone, ci pe dong gibedo ma olony. 13Jo ducu ma ogudu kom dano ma oto, ma pe gulonye nongo gitye keni pien pii me lonye pe kionyo ikomgi. Gin nongo gubalo kema pa Rwot, pimeno pe dong kibikwanogi ikin jo Icrael.

14Ka dano oto i kemawu mo cik tye kit man: dano ducu ma gin bedo i kema kama dano meno oto iye, ki dano acel acel ma donyo i kema, gibedo keni pi nino abiro. 15Agulu ki atabogu ducu ma i kema ma pe kiumu wigi bedo keni. 16Kit dano mo keken ka tye i tim ce ogudu kom dano ma kineko ki pala lucwan, nyo kom dano mo ma oto kene, nyo cogo dano mo, nyo lyel ma kiyiko iye dano, bibedo keni pi nino abiro.

17Pi lonyo dano ma odoko keni kitmeno, kibikwanyo buru ki buru roya mayam kineko me kwanyo bal, kibiketo i otako, ci kimedo iye pii mamol. 18Pi ngat ma oto i kema, dano ma olonye bikwanyo anyero ci lutu i pii meno, ka dong kiro kema ki ikom jami ducu matye iye, ki ikom dano ducu ma onongo gitye i kema. Kibitimo kitmeno bene pi ngat ma ogudu cogo dano nyo ma ogudu kom dano ma kineko nyo ma oto kene, nyo ma ogudu lyel ma kiyiko iye dano. 19Dano ma olony bikiro pii meno ikom dano makeni inino me adeke ki inino me abirone. En bilonyo dano makeni ni inino me abirone, dok dano meno bilwoko bongine, lwoko kome, ci otyeno en doko ma olony.

20Jo ducu ma odoko keni, ma pe gulonye gibedo keni, pien pii me lonye peya kionyo ikomgi. Gin gubalo kema pa Rwot, pimeno pe kibikwanogi ikin jo pa Lubanga. 21Meno bibedo cik botwu matwal. Ngat ma okiro pii me lwoko kwer bilwoko bongine; ki ngat mo ma ogudu pii me lwoko kwer bibedo keni nio wa otyeno. 22Gin ducu ma dano ma kenini ogudu bibedo keni; ngat ma ogudu jami meno bene bibedo keni nio wa otyeno.”