Wel 18

Tic pa Ajwaki ki pa Lulevi

1Ci Rwot owaco bot Aron ni, “In ki awobeni kacel ki jo me ot pa kwarowu wubitingo alii me bal pi Kabedo Maleng, dok in kacel ki awobeni wubitingo alii me bal pi ticwu me bedo ajwaki. 2In ibikelo utmegini ma i kaka pa Levi cok kacel kwedi, ma en aye kaka pa woru, wek guribe kwedi, gukonyi ma nongo in ki awobeni wutye katic inyim Kema lok me Caden. 3Gin gibibedo kwedwu i dog ticwu, dok gibitiyo tic ducu mamite i kema; ento pe gibicito cok ikom jami ducu ma i Kabedo Maleng, pe gibinyiko cok ki keno tyer, wek pe to opot ikom gin ki wun. 4Gin binywako tic kwedwu i Kema me Rwate pi tic ducu ma i Kema; pe ngat mukene mo bibino cok botwu. 5Wun wubitiyo tic ma i Kabedo Maleng, ki tic ikom keno tyer, wek kiniga pa Rwot pe dok opot ikom jo Icrael. 6Nen, dong akwanyo utmegiwu, gin Lulevi, ki ikin jo Icrael; gin gitye macalo mot ma kimiyowu, gin aye jo ma kimiyo bot Rwot pi tiyo tic i Kema me Rwate. 7In ki awobeni keken aye wubitiyo ticwu me bedo ajwaki ilok ducu ma kemo kom keno tyer nyo matye i tyelo ma bongo kicika oumuni. Amiyowu tic me bedo ajwakina macalo mot ma amiyo botwu. Ka ngat mo ata ma pe kiyero obino cok, kibineke woko.”

Dul cam ma kimiyo ki ajwaki

8Rwot dok owaco bot Aron ni, “Nen, dong atyeko miyo i cingi gityer ducu ma kimiyo bota, jami maleng ducu ma jo Icrael gikelo. Atyeko miyogi gubed wang wat ma tung boti, ki bot awobeni me bedo wang wat ma myero kimii botgi kare ducu. 9Magi aye bibedo meri ki ikom jami maleng makato ducu ma pe kiwango ki mac: gityer ducu ma jo Icrael gimiyo bota, gityer me moko kwon ducu, gitum me bal ducu, gitum me tingo alii ducu; gibibedo maleng makato piri ki pi awobeni. 10Wubicamo ki i kabedo mo maleng makato; cowu ducu gitwero camo; pien tye maleng pirwu. 11Man bene mewu: gin ducu ma kikwanyo ki ikom motgi me bedo gityer akwata; atyeko miyogi botwu ki bot awobewu ki anyirawu obed wang watwu me kare ducu. Jo ducu ma i odi ma gulonye gitwero camo. 12Moo mabecone ducu, pig olok mabecone ducu ki bel mabere ducu, man gin mot ma kimiyo bot Rwot me wi mwaka dong amiyo botwu. 13Cam ducu mukwongo cek i lobogi ma kikelo bot Rwot bibedo mewu; dano ducu ma i odi ma olonye twero camo. 141

Gin ducu ma i Icrael ma kidyero i cing Rwot bibedo mewu.

15Lutino ducu ma kikwongo nywalogi, kadi bed pa dano nyo pa lee, ma kityero bot Rwot bibedo mewu. Ento lutino kayo ducu pa dano kibikokogi akoka ki lim, ki lutino kayo pa lee ma keni ma pe kicamo bene kibikokogi akoka. 16Kibikokogi ka ditogi dong romo dwe acel. Wel me kokogi kibimoko obed cekel me ryal abic, kun lubu wel ma kimoko. 17Ento latin kayo pa dyang nyo pa romo nyo pa dyel pe kibikoko; pien gin leng. Ibikiro remogi ikom keno tyer, dok ibiwango dwologi obed gityer ma kiwango ki mac, gin ma ngwece kur ma yomo cwiny Rwot. 18Ringogi bibedo mewu, macalo gok ma kikwato ki em ma lacuc bene mewu. 19Gityer maleng ducu ma jo Icrael gimiyo bot Rwot dong amiyo botwu ki bot awobewu ki anyirawu me bedo pok ma tung botwu me nino ducu. Man aye gicike ma amoko matwal ki in ki likwayu ducu.” 20Rwot dok owaco bot Aron ni, “Pe wubilimo ginaleya mo nyo dul lobo mo ikin jo Icrael; an kikoma aye abedo ginaleyawu.”

Dul cam ma kimiyo ki Lulevi

212

Ci Rwot owaco ni, “Bot Lulevi atyeko miyogi dul acel me apar ikom jami pa jo Icrael me bedo meggi pi culu ticgi ma gitiyo, i Kema me Rwate. 22Dok nia tin jo Icrael pe gibinyiko cok ki Kema me Rwate, wek pe gunong bal ma kelogi to. 23Ento Lulevi keken aye gibitiyo tic ma i Kema me Rwate, gin aye gibibedo lubalo ka gin mo oroce iye. Man bibedo cik matwal nio wa ikare pa likwayowu ducu; dok pe gibileyo dul lobo mo ikin jo Icrael. 24Pien dul acel me apar ma a ki bot jo Icrael, ma kimiyo obed gityer bot Rwot, atyeko miyo bot Lulevi me ginaleyagi; ma omiyo aloko ikomgi ni, pe gibibedo ki dul lobo mo me aleyagi ikin jo Icrael.”

Dul acel me apar

25Rwot owaco bot Moses ni, 26“Dok iwac bot Lulevi ni, ‘Ka wugamo dul acel me apar ki bot jo Icrael, ma atyeko miyo botwu obed mewu, wun dok wubimiyo gityer ma a ki iye bot Rwot, dul acel me apar ki ikom dul acel me apar ma kikelo botwu. 27Gityerwu man kibikwano pirwu macalo wumiyo ki ikom ngano ma wudino ki ikom kongo olok ma oa ki i nyig olokwu ma wubiyo. 28Kitmeno wun bene wubimiyo gityer bot Rwot ki ikom dul acel me apar ducu ma wubigamo ki bot jo Icrael; wubikwanyo gityer pa Rwot ki ikome, wumiyo bot ajwaka Aron. 29Mot ducu ma kimiyo botwu en aye wubikwanyo iye gityer ducu ma myero bot Rwot, ki mabecone ducu, ci bedo gin ma kikwero wek obed maleng.’ 30Ma omiyo ibiwaco bot Lulevi ni, ‘Ka dong wutyero mabecone woko, ci mudonge bibedo mewu macalo oa ki i laro dino nganowu nyo i kabiyo nyig olokwu. 31Wutwero camo i kabedo ducu, wun ki jo ma i odiwu; pien en aye kiculuwu kwede pi ticwu i Kema me Rwate. 32Pe wubinongo iye bal mo, teke wutyeko kwanyo mabecone pi gityer. Ento pe wupyed jami maleng ma jo Icrael gimiyo, wek pe wuto.’”