Wel 17

Odo pa Aron

1Rwot owaco bot Moses ni, 2“Lok ki jo Icrael ci igam odo ki botgi, odo acel pi dog ot pa kwarogi ki acel acel. Gam ki bot lutel wigi ducu, ma oporo dog odi pa kwarigi, odo ducu apar wiye aryo. Ci i coo nying dano acel acel ikom odoone. 3Coo nying Aron ikom odo pa likwayo pa Levi. Pien odo bibedo acel pi dog ot acel acel pa kwarigi. 4Ibicibogi i Kema me Rwate inyim Canduk lok me Caden kama an arwate iye ki wun. 5Ci odo pa dano ma abiyero en aye bilot. Meno aye abinongo iye yo me juku jo Icrael ma gin bedo ka ngur ikomani.” 6Moses oloko ki jo Icrael, ci lutel wigi ducu gukelo odoogi bote, odo acel pi lutel wigi ki acel acel, ma oporo wel odi pa kwarigi, odo apar wiye aryo; odo pa Aron bene onongo tye ikin odoogi. 7Ci Moses ocibo odo ducu inyim Rwot i Kema lok me caden. 81

Orwone Moses odonyo i kema lok me caden; ci, nen, odo pa Aron ma ocung pi dog ot pa Levi ni aye olot woko, okico ki obolo olang, oturu onyako nyig yaa ma ocek. 9Ka Moses okelo odo ducu nia ki inyim Rwot, otero bot jo Icrael ducu, guneno, ci dano acel acel okwanyo odoone. 10Ci Rwot owaco bot Moses ni, “Dwok odo pa Aron inyim Canduk lok me Caden kakare, wek kigwok obed lanyut pi jo mujemo, wek ijuk ngurgi atata ikomani, ogik woko, wek to pe opot ikomgi.” 11Ci Moses otimo kit ma Rwot ocike kwede.

12Ci jo Icrael guwaco bot Moses ni, “Nen ba, watum woko do, keckom opoto ikomwa omiyo wato, watum woko. 13Nen jo ducu ma gibino cok ki kema pa Rwot, gito woko. Wan ducu bene myero wato woko bo?”