Wel 16

Jemo pa Kora, Datan ki Abiram

11

Kora wod pa Ijar, ma wod pa Kokat, wod pa Levi, kacel ki Datan ki Abiram awobe pa Eliab ki On wod pa Pelet, ma gin adek ducu gubedo likwayo pa Reuben, 2gupiyo dano ikom Moses. Gin guribe ki jo mukene ma ikin jo Icrael, lutel wi lwak miya aryo ki pyere abic ma guyero ki ikin lwak jo ma gin ngene mada. 3Gucoke kacel ikom Moses ki Aron ci guwaco botgi ni, “Mewu dong okato kakare woko! Pien jo magi ducu gin lwak maleng, gin ducu ki acel acel Rwot bene tye ikin gi. Ci pingo wun wukete kenwu malo tutwal makato lwak pa Rwot ducu?” 4Ka Moses owinyo, ci opoto aryeba ic pi cwercwiny. 5Ka dong owaco bot Kora ki lwake ducu ni, “Diki odiko Rwot aye binyutu danone ki ngat maleng ikinwa, ci bimiyo en nyiko cok bote; ngat ma en oyero aye en bimiyo nyiko cok. 6Dong wutim kit man; wukwany weer me wango odok eceta, Kora ki lwake ducu. 7Diki wuket mac iye, ci wuket iye odok eceta inyim Rwot, ci dano ma Rwot oyero aye bibedo maleng. Wun mewu dong okato kare woko, wun likwayo pa Levi!” 8Moses dok owaco bot Kora ni, “Kong dong wuwiny ya, wun likwayo pa Levi. 9Wun wubwono man ni gin matidi ce, ma Lubanga pa Icrael aye opokowu woko ki ikom lwak jo Icrael me kelowu cok bote pi tiyo tic i Kema pa Rwot, wek wucung inyim lwak katic pirgi? 10En dong okelowu kamacok kwede wun kacel ki utmegiwu ducu ma gin likwayo pa Levi, ci dok pud wuyenyo yo me doko ajwaki aye? 11Wun wubedo ka jemo ikom Rwot, ma omiyo wun ki lwakwu ducu wucoke kaceli. Aron kono gin ango ma omiyo wungur ikomeni?”

12Ci Moses dok ocwalo dano pi lwongo Datan ki Abiram ma awobe pa Eliab; ento gin guwaco ni, “Pe wabicito kunu. 13Pud ibwono man ni gin matidi mo, ma ikwanyowa woko ki i lobo ma miu ma ceko cam mapol, ma itye ka nekowa kwede i timi? Myero in dok ikete keni me bedo laker maloyowa? 14Dok bene peya ikelowa i lobo mo ma miu ma ceko cam mapol, peya imiyowa poti mogo ma waleyo, nyo poti olok, ci kombedi dong i mito umu wangwa woko. Wan pe wabicito kunu.”

15Ci kiniga omako Moses matek ci owaco bot Rwot ni, “Pe iye gityergi. An peya akwanyo kadi kanagi acel mo ki botgi, pe atimo gin marac ikom ngat mo ikin gi.” 16Lacen Moses owaco bot Kora ni, “In kacel ki lwaki wubed tye inyim Rwot diki. Aron bene bibedo tye. 17Ngat acel acel ikinwu omako atabo weene me wango odok eceta. Wuket iye odok eceta, ci ngat acel acel okel atabo weene inyim Rwot, atabo wee miya aryo ki pyere abic; ki in bene Aron, ngat man ki atabo weene.” 18Orwone ngat acel acel okwanyo atabo weene, ci guketo mac i igi, ka guketo odok eceta iye, ci gucung i dog Kema me Rwate, kacel ki Moses ki Aron. 19Kora ocoko lwake jo ducu ci gucung ma gukeme ki Moses ki Aron idogola Kema me Rwate. Ci deyo pa Rwot onen bot lwak ducu.

20Ci Rwot owaco bot Moses ki Aron ni, 21“Wupoke woko kenwu ki ikin lwak man, wek anekgi atyekgi woko kombedi.” 22Ento gin gupoto piny aryeba ic ci guwaco ni, “Ai Lubanga, in aye Lubanga ma won tipu kom jo ducu, pi bal pa dano acel keken miyo kiniga maki ikom lwak ducu?” 23Ci Rwot owaco bot Moses ni, 24“Cik lwak ni gua woko ki kama jo pa Kora, Datan ki Abiram gibedo iye.”

25Ci Moses oa ocito bot Datan ki Abiram, ci ludongo pa jo Icrael gulubu kore. 26Ci owaco bot lwak ni, “Alegowu ni, wua wupoke ki inget kema pa jo magi ma giraconi, pe wugud kom jamigi mo, wek pe kijwerwu woko kacel kwedgi pi bal meggi ducu.” 27Omiyo dano gua woko ki inget kema pa Kora, Datan ki Abiram; ci Datan ki Abiram gukati woko gucung i dog kemagi kacel ki mon gi ki awobegi ki lutinogi matino. 28Ci Moses owaconi, “Man aye gin ma bimiyo wungeyo ni Rwot onongo ocwala katiyo tic man ducu, pe abedo katiyone pira kena. 29Kace jo man bito ikit ma dano gito kwede jwijwini, nyo kit keckom ma poto ikom dano ducu en aye bipoto ikomgi, ci pe nongo Rwot aye ma ocwala. 30Ento ka Rwot oketo gin mo manyen, ce lobo ongamo doge omwonyogi woko ducu, lwakgi ki jamigi ducu, miyo gilor piny i bur lyel ma pud gikwo, ci wubingeyo ni, jo man gubedo kacayo Rwot.”

31Ka Moses otyeko waco lok meno ducu, ci ngom ma gucung iyeni obar oyabe woko, 32lobo ongamo doge omwonyogi woko, kacel ki jo me odigi, ki lwak jo pa Kora ducu ki jamigi ducu liweng. 33Kitmeno gin ki lwakgi ki jamigi ducu gulor piny i bur lyel ma gin kwo; ci lobo oumu wigi woko gurwenyo woko ki ikin lwak. 34Jo Icrael ducu ma onongo gurumugi ni guringo woko ka guwinyo kokogi, kun giwaco ni, “Wek lobo pe dok omwonywa bene!” 35Ka dok mac bene oa ki bot Rwot, owango jo meno miya aryo ki pyere abic ma gubedo ka tyero odok ecetani, otyekogi woko.

36Ka Rwot dok owaco bot Moses ni, 37“Cik Eleajar wod pa ajwaka Aron ni okwany atabo wee me wango odok eceta woko ducu ki imac ma lyeli, ci oony mac ma i igi ni kamabor, pien gin jami maleng. 38Atabo wee pa jo meno ma balgi okelo can me to ikomgini myero kipadgi woko malac ki nyol gudok laum wi keno tyer; pien onongo yam dong kityerogi woko inyim Rwot ma omiyo pud gin jami maleng. Ci bibedo lanyut bot jo Icrael.” 39Kitmeno Eleajar okwanyo atabo wee me mola mayam jo ma mac owangogi ni gutyero, ci kipadogi weng gudoko laum wi keno tyer. 40Man obedo lanyut bot jo Icrael, ni ngat mo ma pe ajwaka pa Lubanga, ma pe lakwar Aron, pe onyik cok ka wango odok eceta inyim Rwot, wek pe odok macalo Kora ki lwake. Kit macalo Rwot owaco bot Eleajar ki i dog Moses.

Aron olaro lwak

41Ento orwone lwak jo Icrael ducu dok gucako ngur ikom Moses ki Aron kun giwaco ni, “Wun aye wuneko jo pa Rwot woko.” 42Ka lwak gutyeko coke ikom Moses ki Aron, ci Moses ki Aron oloke okemo Kema me Rwate; ci nen, pol oumu kome woko, deyo pa Rwot ocako nen. 43Ci Moses ki Aron gucito inyim Kema me Rwate, 44ci Rwot owaco bot Moses ni, 45“Wua woko ki ikin lwak man wek atyekgi woko kombedi.”

Ento Moses ki Aron gupoto piny aryeba cwiny, 46ci Moses owaco bot Aron ni, “Kwany atabo weeni me wango odok eceta, wek iket iye mac ma itoko ki ikeno tyer, ci iket iye odok eceta, iting iter kama lwak tye iye oyotoyot. Tim gin lakwany bal ki ikomgi, pien kiniga pa Rwot dong ocako bino woko, two gemo dong ocake woko.” 47Ci Aron okwanyo atabo wee kit ma Moses owaco, cut oringo kwede i dye lwak; ci nen, two gemo onongo dong ocake ikin dano. Ci oketo odok eceta i atabo wee, ocako timo gin lakwany bal ki ikom lwak. 48Ci Aron ocung ikin jo ma oto ki jo makwo, ci two gemo ogik woko. 49Jo ma two gemo onekogi giromo dano alip apar wiye angwen ki miya abiro, kun pe kiribo iye jo ma guto i alii pa Kora. 50Ka two gemo dong ogik woko ci Aron odok cen bot Moses i dog Kema me Rwate.