Wel 15

Cik mapatpat ma mako gityer

1Rwot owaco bot Moses ni, 2“Wac ki jo Icrael ni, ka dong wuo i lobo ma wubibedo iye, ma abimiyowuni, 3ce wutyero dyang nyo romo bot Rwot me gityer ma kiwango ki mac, nyo gitum awanga, nyo kit gitum mukene, nyo gityer me cobo kwong, nyo gityer ma ic opwoyo, nyo ka wutyero gityer i ninowu madito ma kiciko, gityer magi gibibedo gin ma ngwece kur ma yomo cwiny Rwot. 4Ngat ma okelo gityere bot Rwot omyero otyere bene moko kwon mapwot maromo agwata acel ma kirubu ki moo maromo lita acel, obed gityer me moko kwon. 5Dok wubikelo lita acel ki nucu me kongo bwino me gityer amata pi gitum awanga nyo gitum mukene ducu pi romo acel acel. 6Pi nyok romo wubikelo moko kwon mapwot maromo agwata aryo ma kirubu ki moo maromo cupa adek pi gityer me moko kwon. 7Pi gityer amata wubikelo lita acel ki nucu me kongo bwino makur ma yomo cwiny Rwot. 8Ka wuyubu twon pi gitum awanga, nyo pi gitum mukene, nyo pi cobo kwong, nyo pi gityer me berbedo ma wutyero bot Rwot, 9ci myero wutyer kacel ki moko kwon mapwot maromo agwata adek ma kirubu ki moo maromo lita aryo wek obed gityer me moko kwon. 10Pi gityer amata wubityero kongo bwino maromo lita aryo obed gityer ma kiwango ki mac. Gin ma ngwece kur ma yomo cwiny Rwot.

11Kibitiyo kitmeno pi twon acel acel, nyo pi nyok romo acel acel, nyo pi wod romo nyo latin nyok dyel acel acel. 12Magi ducu bilubu wel lim ma wukelo me atyera; wubitiyo kitmeno ikomgi ki acel acel macalo welgi tye. 13Anywali ducu me lobowu gibitiyo kitmeno ka gityero gityer ma kiwango ki mac wek obed gin ma ngwece kur ma yomo cwiny Rwot. 14Ka larok mo odoko labedo ikinwu, nyo ngat mo ma bibedo ikinwu wa ikare pa likwayowu ducu, ka en mito tyero gityer ma kiwango ki mac obed gin ma ngwece kur ma yomo cwiny Rwot, ci en bene bitimone kit ma wun wutimoni. 15Pi lwak mucoke cik bibedo acel pirwu ki pi larok ma odoko labedo ikinwu; meno bibedo cik matwal nio wa ikare pa likwayowu ducu; labedo bibedo marom ki wun inyim Rwot. 161Cik bibedo acel ki ngolo kop bene bibedo acel pi wun ki pi lurok ma gibedo ikinwu.”

17Rwot owaco bot Moses ni, 18“Wac bot jo Icrael ni, ka dong wuo i lobo ma atye ka terowu iyeni, 19ka wucamo cam ma ocek i lobo meno, ci wubityero gityer bot Rwot. 20Ikom moko kwon me ngano manyen mukwongo cek wubityero mugati acel obed gityer; wubityero macalo wutyero gityer ma wukwanyo ki ikom ngano ma wudino. 21Wubimiyo gityer bot Rwot ki ikom moko kwon me ngano manyen mukwongo cek, wa ikare pa likwayowu ducu.

22Ento kace wuroco, ma kun pe wumako cik magi ducu ma Rwot yam ociko ki Moses, 23ki gin ducu ma Rwot ocikowu kwede ki i dog Moses, nia wa inino mayam Rwot okwongo miyo iye cik, mede kwede wa ikare pa likwayowu ducu; 24kace dano guroco ma pe gubalo akaka, kun lwak pe ngeyo gin mo iye, ci lwak ducu bityero wod twon acel me gitum awanga obed gin ma ngwece kur ma yomo cwiny Rwot, ki gityer me moko kwon ki gityer amata ma otiko en macalo cik tye, kacel ki nyok dyel acel pi gitum me bal. 25Ajwaka pa Lubanga bitimo gin lakwany bal ki ikom lwak jo Icrael ducu, ci Rwot biweko balgi; pien onongo pe gubalo akaka dok gukelo gityergi, gityer ma kiwango ki mac bot Rwot, ki gitumgi me bal, inyim Rwot pi balgi ma pe gutimo akaka. 26Ci kibiweko bal pa lwak jo Icrael ducu, kacel ki pa lurok ma gibedo ikin gi, pien onongo bal meno omako lwak ducu. 272

Kace dano acel mo aye obalo ma pe otimo akaka, ci en bityero bwong dyel madite romo mwaka acel pi gitum me bal. 28Ci ajwaka pa Lubanga bitimo gin lakwany bal inyim Rwot pi dano meno ma opoto i bal ma pe otimo akaka, pi kwanyo bal ki ikome, ci Rwot biweko bale. 29Wubibedo ki cik acel pi dano ma obalo ma pe otimo akaka, kadi bed en anywali pa jo Icrael nyo labedo ma bedo ikinwu. 30Ento ka dano mo otimo bal akaka, kadi bed anywali me lobo nyo labedo, nongo dong ocayo Rwot; dano meno kibiryemo woko ki ikin jo Icrael. 31Nongo en ocayo lok pa Rwot, oturu cike, pimeno dano meno kibiryemo woko pe dok bibedo ikin jo Icrael.”

Dano ma pe ogwoko ceng Cabit

32Ikare ma jo Icrael gitye i tim, ci gunongo dano mo ka coko yen rido i ceng Cabit. 33Jo ma gunonge ka en coko yen ridoni gukele bot Moses ki Aron ki bot lwak ducu. 34Ci gukete iot kol, pien peya kinyutu botgi gin ma myero gutim ikome. 35Ci Rwot owaco bot Moses ni, “Dano meno kibineke woko. Lwak ducu bicele ki got woko inge gony.” 36Ci lwak ducu gukele woko inge gony, ci gucele ki got guneke woko, kit macalo Rwot onongo ociko ki Moses.

Keto jira i dog bongo

37Rwot owaco bot Moses ni, 383“Lok ki jo Icrael ci icikgi ni gukwo jira i twok dog bongigi, wa ikare pa likwayogi ducu, dok jira ma i twok dog bongo acel acel guket iye tol ma bulu. 39Man bibedo botwu jira dog bongo ma wuneno kome wek wupo ikom cik pa Rwot ducu, wulubgi, kun pe wulubu tamwu kenwu ki gin ma wuneno, ma wumaro lubu pi mitiwu kenwu. 40Kitmeno miyo wubipo cika ducu, dok wubicobogi, miyo wubibedo jo maleng pi Lubangawu. 41An a Rwot Lubangawu mayam akwanyowu ki i lobo Ejipt wek abed Lubangawu; An a Rwot Lubangawu.”