Wel 14

Jo Icrael gujemo ikom Rwot

1Lwak ducu gucako dange matek, ci dano gukok ki pig wanggi dyewor benebene. 2Jo Icrael ducu gubedo ka ngur ikom Moses ki Aron, ci lwakgi ducu guwaco botgi ni, “Kono nene wato giwa ki i Ejipt, kono ber! Nyo kono nene wato ki i tim kany! 3Pingo Rwot okelowa i lobo man wek kinekwa woko ki pala lucwan? Monwa ki lutinowa kibiyakogi woko bene; onongo bedo ber ka wadok giwa cen i Ejipt?”

4Ci gucako lok keken gi kun giwaco ni, “Wek wayeru laditwa mo, wek wadoku cen i Ejipt.” 5Ci Moses ki Aron gupoto piny inyim lwak jo Icrael aryeba ic pi cwercwiny. 6Ci Yocwa wod pa Nun ki Kaleb wod pa Jepune mayam gitye ikin jo ma guroto lobo meno guyeco bongigi keken gi pien cwinygi ocwer. 7Gin guwaco, bot lwak jo Icrael ducu ni, “Lobo mayam wawoto wabaro iye, waroto, wanongo ni lobone ber makato ducu. 8Ka Rwot iye yom ikomwa, ci en biterowa i lobo meno, ci miyo i cingwa, lobo ma miu maceko cam madwong. 91Ento pe wujem ikom Rwot; dok pe wulwor wegi lobo meno, pien gin mere kwon me acamawa. Gin mo magengo ngegi dong peke, dok Rwot tye tung botwa; pe wulworgi.” 10Ento lwak ducu guwaci kicel Yocwa ki Keleb acela ki got.

Ka dok deyo pa Rwot onen i Kema me Rwate inyim jo Icrael ducu. 11Ci Rwot owaco bot Moses ni, “Jo man gin bicaya pi kare marom mene? Gibikwero ye an pi kare marom mene, kadi bed atiyo lwak lanyut ducu marom man ikin gi? 12Abipwodogi ki two gemo, abitwonogi lobo ma nene myero obed me aleyagi, dok abimiyo in idoko rok madit mada ki matek makatogi.” 132

Ento Moses owaco bot Rwot ni, “Jo Ejipt dok gibiwinyo pire bene, pien in aye yam itingo jo man ki teki ci ikwanyogi woko ki ikin gi, 14dok gibitito bot jo ma gibedo i lobo man. Gin dong gutyeko winyo ni in Rwot itye idyewa, dok ni in Rwot aye bene inen wang ki wang botwa, ki pol meri obedo ka cung ka wiwa, dok ibedo kawot inyimwa iwir pol dyeceng ki i wir mac dyewor. 15Ka ineko jo man woko lawange acel, ci lurok ma gin winyo ywekani gibiwaco ni, 16‘Lubanga onongo ni tero jo man i lobo mayam en okwongo pire ni ebimiyo botgini dong oloye woko, en aye ma omiyo en onekogi woko i dye tim.’ 17Kombedi alegi ni, wek tek pa Rwot obed madit kit macalo yam iciko kun iwaco ni, 183‘Rwot kiniga pe mako oyot, mar mere ma pe loke dwong; en weko bal ki tim aranyi pa dano, ento pe kwanyo kop ki ikom lubalo. En keto can ikom likwayo ki ikom likwayo pa likwayogi pi bal pa kwarogi nio i yalwak me adek ki me angwen.’ 19Alegi ni i tim kica ki joni man pi rocgi, macalo in mari ma pe loke dwong tutwali, kit ma ibedo ka weko balgi cake wa ikare ma gua ki i Ejipt nio wa onyo.”

Can ma Lubanga oketo ikom jo Icrael

(Nwo 1:34-40)

20Ci Rwot ogamo ni, “Dong atimo kica botgi kit macalo iwaconi. 214Ento i ada, macalo atye kwo ni, dok macalo deyo pa Rwot bipongo lobo ducuni, akwongo ni: 22ikom jo ma guneno deyona ki lwak lanyut mayam atiyo i Ejipt ki i tim, ento ma gubedo kaomo iya madong odoko tyen apar kuluni, ma pe guwinyo doga bene, pe tye ngat mo ikin gi 23ma bineno lobo mayam akwongo pire bot kwarogi ni abimiyogi ni. Pe tye ngat mo ikin jo ma gicaya ma binenone. 245Ento latica Kaleb abitero i lobo mayam ocito iyeni, ci likwaye bicamo, pien en tye ki cwiny mapat, dok en tye kalubu gin ma amito ducu kakare atir. 25Jo Amalek ki jo Kanaan gin bedo i nota ducu; pimeno wun diki wuloke wucak wot wudok tung tim i yoo ma kemo Nam Makwar.”

26Rwot dok owaco bot Moses ki bot Aron ni, 27“Lwak man maraci biweko nguru ikoma wa awene? Dong atyeko winyo lwak nguru ma jo Icrael gitye kanguru kwede ikoma. 28Wac botgi ni an a Rwot awaco ni, ‘Macalo atye makwo ni, lok ducu ma wuloko ma awinyo ki ita abitiyo botwu. 296Komwu ma oto birade piny i dye tim man. Ikin jo ma kikwanogi ni, mayam kikwano welgi cake ki ikom jo ma ditogi romo mwaka pyere aryo dok kwede malo, ma gubedo ka ngur ikomani, 30pe tye ngat acel mo ma bio i lobo mayam akwongo pire ni abimiyogi bedo iye; kono Kaleb wod pa Jepune ki Yocwa wod pa Nun keken. 31Ento lutinowu ma wuwaco ni kibiyakogi wokoni, gin aye abiterogi kunu, gin aye gibingeyo lobo ma wun wucayoni. 32Wun aye komwu ma oto birade piny i dye tim man. 337Lutinowu gibibedo ka lak i tim macalo lukwat pi mwaka pyere angwen kun gineno can pi balwu, nio ka kom danowu ma oto me agikine obutu i dye tim. 34Wubineno can pi balwu pi mwaka pyere angwen, muporo wel nino mayam wuroto ki loboni, nino pyere angwen, mwaka acel pi nino acel acel, ci wubingeyo ni iya oari woko ki ikomwu.’ 35An a Rwot madong aloko; ada abitiyo man ikom lwak man maraci ducu ma guribe me pyem kweda; gibitum woko i dye tim kany, gin bito megi kunu.”

36Jo mayam Moses ocwalogi ka roto loboni, mayam gudwogo ci gumiyo lwak ducu gungur ikom Rwot pi lok marac ma gutito ikom lobo meno, 37jo meno ducu guto woko ki two gemo inyim Rwot. 38Ento Yocwa wod pa Nun ki Kaleb wod pa Jepune aye gudong makwo ki ikin lwak dano ma gucito ka roto loboni.

Kiloyo jo Icrael ki i Korma

(Nwo 1:41-46)

39Moses otito lok meno ducu bot jo Icrael, ci dano gukok matek. 40Ci gua malo odiko con, gucito guito malo wa i lacol me godi, kun giwaco ni, “Nen, wan dong watye kany, wabicito wa i kabedo ma Rwot ociko pire; pien dong wabalo.” 41Ento Moses owaco botgi ni, “Pingo wun dok wumede ki turu cik ma Rwot oketo? Pien meno pe bitwere wa ki acel. 42Pe wucit kunu, wek pe lumerokwu guradwu woko piny, pien Rwot pe tye ikinwu. 43Jo Amalek ki jo Kanaan gitye inyimwu kunu, pala lucwangi bityekowu woko; pien wun wukwero lubu kor Rwot, omiyo Rwot pe bibedo kwedwu.” 44Ento gin guete ni gimito ito malo wa i lacol lobo godi ca, kadi bed Canduk me Gicike pa Rwot, ki Moses bene pe gua woko ki i gony. 45Ci jo Amalek ki jo Kanaan ma gibedo i lobo godi kunu gulor piny, guloyogi, ci guryemogi nio wa i Korma.