Wel 13

Kicwalo lurotpiny apar wiye aryo i lobo Kanaan

(Nwo 1:19-33)

1Rwot owaco bot Moses ni, 2“Cwal dano acel ki i kaka acel acel kun dano meno nongo latela ki i kakane wek gucit gurot lobo Kanaan ma abimiyo bot jo Icrael.” 3Ci Moses ocwalogi ki i tim me Paran, kit macalo Rwot ociko. Gin ducu onongo gin ludito ikin jo Icrael.

4Nyinggi ene: i kaka pa Reuben, Camua wod pa Jakur; 5i kaka pa Cimeon, Capat wod pa Kori; 6i kaka pa Juda, Kaleb wod pa Jepune; 7i kaka pa Icakar, Igal wod pa Yucepu; 8i kaka pa Epraim, Kocea wod pa Nun; 9i kaka pa Benjamin, Palti wod pa Rapu; 10i kaka pa Jabulon, Gadiel wod pa Codi; 11i kaka pa Yucepu, en aye kaka pa Manace, Gadi wod pa Cuci; 12i kaka pa Dan, Amiel wod pa Gemali; 13i kaka pa Acer Cetur wod pa Mikael; 14i kaka pa Naputali, Nabi wod pa Vopci; 15i kaka pa Gad, Geuel wod pa Maki. 16Meno aye nying jo ma Moses ocwalogi ka roto lobo Kanaan. Moses ocako nying Kocea wod pa Nun ni Yocwa.

17Moses ocwalogi ka roto lobo Kanaan kun waco botgi ni, “Wucit i Negeb kuca, wuit malo wa i lobo godi, 18wek wunen kit ma lobo meno tye kwede, kace jo ma bedo iye jo matego nyo jo magoro, kace ginok nyo gipol, 19kace lobo ma gibedo iyeni ber nyo rac, kace taun ma gibedo iye tye apero nyo kirumu ki cel matego, 20kace lobone ceko cam nyo pe ceko, kace yadi tye i lobone nyo peke. Wucam co ki i cwinywu, ci wudwog ki nyig yadi mogo ma ocek i lobo kunu.” Kare ma gicito onongo obedo kare ma nyig olok cako cek iye.

21Kitmeno gucito ka roto piny nia ki i tim Jin nio kwede wa i Rekob, macok ki yoo madonyo i Kamat. 22Gucito nio wa i Negeb ka guo kwede i Kebron; kama Akiman, Cecai ki Talmai likwayo pa Anak onongo gitye kunu. (Kebron onongo dong kigero orii mwaka abiro ma peya kigero Joan ma i Ejipt.) 23Lurot piny guo wa i nota me Ecikol, ci gungolo jang tug olok acel ma olugu, gutingo ki tal mabor kun jo aryo aye lebo, ki bene gukelo nyig pomegranat ki nyig oduru. 24Kabedo meno yam kilwongo ni nota me Ecikol,1 pien jo Icrael gungolo iye jang tuga olok.

25I nge nino pyere angwen lurot piny gudwogo ki ka roto piny ma i lobo meno. 26Gudwogo bot Moses ki Aron ki lwak jo Icrael ducu ma i tim Paran, i Kadec. Gin gukelo lok bot lwak ducu, dok bene gunyutu botgi gin ma ocek ki i lobo meno. 27Ci gutito ki Moses ni, “Wacito i lobo ma icwalowa iye; lobone miu dok ceko cam mabup, man aye nyig yadine ma wakelo ki kunu. 28Ento jo ma bedo i lobone jo matego, taun gi madito bene kicelo ki cel ma tego, dok gidito tutwal; medo ki meno, waneno iye likwayo pa Anak. 29Jo Amalek gibedo meggi i lobo ma i Negeb; jo Kit, jo Jebuc ki jo Amor gibedo i lobo godi; jo Kanaan gibedo i lobo murabo dog Nam Mediterranean, ki murabo dog Jordan.”

30Kaleb ojuku dano guling woko inyim Moses ci owaco ni, “Wan watugi cito kunu makicel, wek wacamu woko; pien wan waromo loyogi.”

31Ento dano mayam gunywako kwede wot kunu guwaco ni, “Wan pe waromo ette me cito ikom jo meno, pien gitego, makatowa woko.” 32Ci gukelo lok marac ma obalo cwiny jo Icrael woko ikom lobo ma gurotoni, kun giwaco ni, “Lobo ma wawoto wabaro iyeni, waroto ducu, lobone konye peke, ma pe ceko cam. Dok jo ducu ma wanenogi iye kunu jo ma komgi pek madito. 332Dok waneno twoni oluma kunu, likwayo pa Anak ma kwarigi ducu twoni oluma. Wan giwa watino warom ki otwongo mamwa, dok wanen kitmeno ki tung botgi.”