Wel 12

Lubanga opwodo Miriam

1Onongo Moses onyomo dako mo ma nya jo Kuc, ci Miriam ki Aron gucako loko lok marac ikom Moses pi dako meno. 2Gubedo kawaco ni, “Rwot obedo kalok ki dog Moses kene bo? Pe obedo kalok ki dogwa bene?” Ci Rwot owinyo. 3Moses onongo yam mwol adada, mwol makato dano ducu ma onongo yam gitye iwi loboni. 4Cutcut Rwot owaco bot Moses ki Aron ki Miriam ni, “Wukat woko, wun adek ducu, wubin i Kema me Rwate.” Ci gin adek ducu gukato woko. 5Ci Rwot olor piny ki i wir me pol, ocung i dog Kema me Rwate, ka olwongo Aron ki Miriam. Gin aryo ducu gukato anyim. 6Ci owaco botgi ni, “Wuwiny loka. Kace tye lanebi mo ikinwu, ci An a Rwot aweko en ngeya ki iginanyuta, aloko kwede ki iwang lek. 71Ento bot latica Moses pe bedo kitmeno; pien atyeko keto lwaka ducu i cinge. 8Abedo kalok kwede wang ki wang, kamaleng atyer, pe agongo lok mo; en neno kit ma Rwot cal kwede. Pingo pe wulworo loko lok marac ikom latica Moses?”

9Kiniga omako Rwot ikomgi, ci ocito woko. 10Ka pol oware woko ki iwi Kema me Rwate, ci nen, kom Miriam orugu woko cut, okwor matar macalo pee. Ka Aron oloke tung bot Miriam, oneno kome orugu woko matar 11ci owaco bot Moses ni, “Ai, ladita, pe iket can ikomwa pien watimo lok me mingo, dong wabalo. 12Pe iwek en obed macalo latin ma kinywalo ma dong oto, ma ringo kome nucune dong obale woko ma pud oa aaya ki ii mine.” 13Ci Moses okok bot Rwot kun waco ni, “Cange ba, ai Lubanga, abako doga boti do.” 142Ento Rwot owaco bot Moses ni, “Ka nene wone ongulu laa i wange keken, kono onongo pe en obedo ki lewic pi nino abiro? Wek kong kitweye woko inge gony pi nino abiro, ka lacen kibikele dong igony.” 15Kitmeno kitweyo Miriam woko inge gony pi nino abiro; ci lwak pe gumedo ki dak kamukene nio ka Miriam odwogo igony. 16Ka dong lacen dano gucako wot nia ki i Kajerot, ci gugony i tim me Paran.