Wel 11

Jo Icrael gukok pi ringo

1Dano gubedo kalok ki akeca pi can ducu ma gitye iye, ci Rwot owinyo; ka Rwot otyeko winyone, kiniga omake, ci mac pa Rwot opoto, olyel ikin gi, owango kabedo mogo ma inget gony. 2Ka lwak gukok bot Moses, ci Moses olego Rwot, ka mac ocako pye. 3Ma omiyo nying kabedo meno kilwongo ni, Tabera,1 pien mac pa Rwot owang ikin gi.

4Ikare meno lwak lurok mogo ma onongo gitye ikin jo Icrael cwinygi opuke matek pi ringo, ma omiyo jo Icrael bene gucako koko, kun giwaco ni, “Lutuwa, anga ma bimiyowa ringo me acamawa? 5Pud wapoo pi rec mayam wacamo nono i Ejipt, ki pi okwer ki okono ki kitunggulu maboco ki kitunggulu matino ki kitunggulu matik; 6ento ikare man kero komwa dong peke, dok gin mo bene dong peke, kono nyo manna man ma waneno ni keken.” 72

Onongo manna nen macalo nyig koo, dok bene nen macalo odok yat ma kilwongo bedola. 83Dano gubedo kacito ka jobone, ka girego ki kidi nyo odo ki pany, ka gitedo ki agulu, nyo giyubu ki capat; ka gicamo. Mite rom ki mit pa capat ma kitedo ki moo. 9Ka toyo oluk i dye gony ki i dyewor, ci manna bene poto piny.

Moses oyero ludongo pyere abiro

10Moses owinyo ka dano gikok i dogolagi ducu, kun ngat acel acel tye i dog kemane; ci kiniga omako Rwot matek, Moses bene cwinye pe obedo yom. 11Moses owaco bot Rwot ni, “Pingo i tima marac kuman? Pingo an pe anongo gum mo inyimi, ma omiyo in dong iketo peko pa lwak man ducu ikoma? 12Onongo an aye abedo min lwak man ducu bo? An aye yam anywalogi bo, ma omiyo iwaco bota ni atinggi i kora, macalo lapidi tingo latin ma pud dot, atergi i lobo mayam ikwongo pire ni ibimiyo bot kwarigi? 13An kono abinongo ringo ki kwene me amiya ki lwak dano man ducu? Pien gitye ka kok inyima kun gin waco ni, ‘Mii ki wan ringo wek wacam.’ 14An pe atwero tingo lwak dano man pira kena; yece pek mukato kare. 15Ka man aye kit ma ibitiyo ki an, ci ber ineka woko ma kicel, kace anongo gum mo inyimi, wek pe abed kaneno can kuman.”

16Ci Rwot owaco bot Moses ni, “Cokka jo pyere abiro ki ikin ludongo pa jo Icrael, ma ingeyo ni gin ludongo ki ikin lwak ki ludito maloyogi; ci ikelgi i Kema me Rwate, wek gucung kunu kacel kwedi. 17An abilor piny abino kalok kwedi kunu; ci abikwanyo twero ma mera mukene matye i komini, ci abiketo ikomgi; miyo gibinywako tingo peko pa lwak kacel kwedi, wek in pe dong ibed katingone piri keni. 18Dok iwac bot lwak ni, ‘Wulonye kekenwu wubed maleng pi nino ma diki, ci wubicamo ringo; pien wubedo kakoko i it Rwot kun wuwaco ni, anga ma bimiyowa ringo me acamawa? Pien yam onongo watye maber giwa i Ejipt. Pimeno Rwot bimiyowu ringo ci wubicamo. 19Pe wubicamo pi nino acel keken, nyo nino aryo, nyo abic, nyo apar, nyo pyere aryo, 20ento wubicamo pi dwe acel kulu, nio ka bikati woko ki i umwu, nio ka bicido cwinywu woko, pien wutyeko kwero Rwot ma bedo i kinwuni kun wukok inyime ki pig wangwu, wuwaco ni, pingo yam waa woko ki i Ejipt?’” 21Ento Moses ogamo ni, “Jo ma abedo ikin gi welgi romo alip miya abicel, co ma gin woto ki tyen gi, ci in iwaco ni, ‘Abimiyogi ringo wek gucam pi dwe kulu!’ 22Kadi bed kinek lwak lee makwo, romi ki dyangigu, ci biromogi? Nyo kadi kicoko lwak rec ducu matye i nam kacel pirgi, ci biromogi?” 23Ci Rwot ogamo dog Moses ni, “Cing Rwot aye dong odoko cek bo? Ibineno tin kace loka bicobe boti kakare onyo pe.”

Ludongo guloko macalo lunebi

24Moses okato woko katito ki dano lok ma Rwot owaco; ci ocoko jo pyere abiro ki ikin ludongo pa jo Icrael, oketogi gurumu Kema me Rwate. 25Ka Rwot olor piny ki i pol, ci oloko kwedgi, ci Lubanga okwanyo twerone mukene matye ikom Moses ci, oketo ikom ludongo pyere abironi. Ka cwiny pa Lubanga opoto ikomgi, ci gucako lok macalo lunebi. Ento pe dok gumede ki timo kitmeno.

26Onongo jo aryo gudong cen igony, acel nyinge Eldad ki mukene nyinge Medad, ci cwiny pa Lubanga opoto ikomgi bene. Gin onongo gitye ikin jo mayam kicoyo nyinggini, ento pe gukato woko gucito i Kema me Rwate, ma omiyo gubedo kalok macalo lunebi i dye gony. 27Ci latin awobi mo oringo otito bot Moses ni, “Eldad ki Medad gitye kalok macalo lunebi i dye gony.” 28Ci Yocwa wod pa Nun, ma onongo obedo lakony pa Moses nicake wa itinone, owaco ni, “Moses, ladita, jukgi woko.” 29Ento Moses owaco bote ni, “In mono itye ka paro pira ce? Kono onongo jo pa Rwot ducu gubedo lunebi, kono onongo bera mada, wek Rwot oony cwiny mere ikomgi bene!” 30Ci Moses ki ludongo pa jo Icrael gudok cen igony.

Rwot ocwalo aluru

31Ka Rwot omiyo yamo okodo, ci okelo lwak aluru nia ki i nam, ci gupoto piny inget gony. Lace romo kilomita acel, ma orumu gony woko ducu, dok gudure piny maromo mita acel kulu me a ki i ngom. 32Dano gutware ka cokogi inino meno dyeceng ki dyewor benebene, ki orwone bene. Jo ma gucoko manok keken gucoko maromo guniya pyere adek; ci gucako moyone orumu gony weng. 33Ikare ma pud gitye ka mwodo ringo, ma peya gucamo otum, kiniga omako Rwot ikom dano, ci opwodo lwak ki two gemo mapek. 34Ma omiyo gulwongo nying kabedo meno ni, Kibrot-atava,4 pien jo ma gin lukee tutwal kiyikogi kunu. 35Nia ki i Kibrot-atava lwak gucako wot me cito Kajerot, ci gutiro gubedo kunu.