Wel 10

Tum me ryal

1Rwot owaco bot Moses ni, 2“Yub tum aryo me ryal ma ibitetogi ki nyol, ci ibitic kwedgi me lwongo lwaki ki pi turu kemagi ki cako wot. 3Ka kikutu tum aryo ducu, ci lwak ducu bicoke kacel boti i dogola Kema me Rwate. 4Ento ka kikutu tum acel keken, ci lutel wic, ma gin ludito ma i kaka ducu pa jo Icrael, gibicoke kacel boti. 5Ka wukutugi okok malongo kicel, ci gony ma tung kunyango gibicako wot. 6Ka wukutugi okok malongo tyen me aryone, ci gony ducu ma tung kupiny gibicako wot. Kibikutu tum kok malongo me cako wot anyim. 7Ento ka wumito coko lwak kacel wubikutu, ento pe wukut okok malongo. 8Awobe pa Aron, ma gin aye ajwaki, gibikutu tum. Cik me kutu tum bibedo cik matwal botwu nio wa ikare pa likwayowu ducu. 9Ka wucito i mony kalweny ki lukworwu ma gidiyowu i lobowu, ci wubikuku oduru mony kun wukutu tum, wek Rwot Lubangawu opo pirwu ci olarwu ki bot lukworwu. 10Inino ma cwinywu yom iye bene, ki inino madito ma kicikowu pirgi, ki ikare me poo dwe ducu, wubikutu iye tum iwi gitum awanga mewu, ki iwi gitum mewu me gityer me berbedo; kibikutugi wek Lubanga opo pirwu; An a Rwot Lubangawu.”

Jo Icrael gua woko ki i Cinai

11I mwaka me aryone, i dwe me aryone, ikom nino dwe pyere aryo, pol ocako ware woko ki iwi kema lok me caden. 12Jo Icrael gucako wot, gua woko ki i tim Cinai kun giwoto, gikobo; ci pol ocito ocung wa i tim Paran. 13Jo Icrael gudak tyen mukwongo malube ki kit ma Rwot yam ociko ki Moses. 14Bendera me gony pa jo pa Juda aye gutelo yoo ki buca monygi ducu; lawimonygi aye Nakucon wod pa Aminadab. 15Lawimony me kaka pa Icakar obedo Netanel wod pa Juar, 16ki lawimony me kaka pa Jabulon obedo Eliab wod pa Kelon.

17Ka kema pa Rwot dong kiputu, ci likwayo pa Gercon ki likwayo pa Merari ma gin tingo kema, gucako wotgi. 18Ci bendera me gony pa jo pa Reuben ocako wot ki buca monygi ducu; lawimonygi obedo Elijur wod pa Cedeur. 19Lawimony me kaka pa Cimeon obedo Celumiel wod pa Juricadai. 20Lawimony me kaka pa Gad obedo Eliacap wod pa Deuel.

21Ka dong jo pa Kokat gucako wot, kun gitingo jami maleng ducu. Kema onongo dong kiguro ocung ma gin peya guo. 22Ka dok bendera me gony pa jo pa Epraim ocako wot ki buca monygi ducu; lawimonygi obedo Elicama wod pa Amikud. 23Lawimony me kaka pa Manace obedo Gamaliel wod pa Pedajur. 24Lawimony me kaka pa Benjamin obedo Abidan wod pa Gideoni.

25Lacen bendera me gony pa jo pa Dan ocako wot ki buca monygi ducu, kun gin aye gugiko ki inge gony ducu; lawimony meggi obedo Akiejer wod pa Amicadai. 26Lawimony me kaka pa Acer obedo Pagiel wod pa Okran. 27Lawimony me kaka pa Naputali obedo Akira wod pa Enan. 28Man aye onongo kit wot pa jo Icrael, ma lubu buca monygi, ikare ma gin mol me cako wot.

29Moses owaco bot Kobab wod pa Reuel ma Lamidian, won dakone ni, “Wan wacako wot me dak i kabedo ma Rwot ceng owaco pire ni ebimiyo botwa ni. Ber iwot kwedwa, ci wabitimi maber.” 30Ento Kobab owace ni, “An pe abicito; abidok i lobo tuwa ki bot lutuwa.” 31Moses ogamo ni, “Alegi, pe iwekwa, pien in ingeyo ni wabigony i tim, ci i bibedo botwa macalo wangwa. 32Dok ka ibiwoto kwedwa, gin maber ducu ma Rwot bitimo wa, wan bene wabitimi kitmeno.”

33Ci gucako a woko ki inyim got pa Rwot, ci guwoto wot me nino adek; ci Canduk me Gicike pa Rwot owoto otelo nyimgi i wot me nino adek pi yenyo kabedo me yweyogi, 34kun pol pa Rwot woto lamal kawigi ki i dyeceng, ikare ducu ma gitye kawot nia ki igonygi. 351

Kare ducu ka Canduk cako wot, ci Moses waco ni, “Dong ia malo, ai Rwot imii lumerok meri guket woko ata; wek jo ma dagi guring woko ki inyimi.” 36Ka dong ocung kayweyo, ci en dok waco ni, “Dong idwog cen, ai Rwot, bot lwak alip ki alip me Icrael.”