Wel 9

Kwero Karama me Kato

11

Rwot oloko ki Moses i tim Cinai i dwe mukwongo me mwaka me aryone ma onongo dong gua woko ki i lobo Ejipt kun waco bote ni, 2“Jo Icrael myero gukwer nino madit me Kato ikare ma kiciko. 3Inino dwe apar wiye angwen me dwe mukwongo i otyeno, ikare ma kiciko, en aye wubikwero iye Karama me Kato; wubikwero kun wulubu cike ducu ki lok ducu ma kiciko ikome.” 4Kitmeno Moses ociko jo Icrael ni gukwer Karama me Kato. 5Ci gukwero Karama me Kato i dwe mukwongo, inino dwe apar wiye angwen, i otyeno i tim Cinai. Kit mayam Rwot ociko ki Moses, jo Icrael bene gutimo kitmeno. 6Onongo tye jo mogo ma gudoko keni pi gudu kom dano ma oto, ma omiyo pe gutwero kwero Karama me Kato inino meno. Ci gucito bot Moses ki Aron inino meno, 7kun giwaco ni, “Wan dong wadoko keni pi gudu kom dano ma oto; pingo kigengowa ni pe watyer gityer pa Rwot ikin jo Icrael ikare ma kiciko?” 8Ci Moses owaco botgi ni, “Kong wukur wek kong awiny gin ma Rwot biciko ma makowu.”

9Rwot owaco bot Moses ni, 10“Wac bot jo Icrael ni, ‘Kadi bed ngati mo ikinwu, nyo ikin likwayowu, odoko keni pi gudu kom dano ma oto, onyo otingo wot mabor, en pud twero kwero Karama me Kato pa Rwot. 11Gin bikwerone i dwe malubu, inino dwe apar wiye angwen i otyeno. Gin bicamo iye mugati ma tobi pe iye ki dek mogo makec. 122Pe gibiweko gin mo dong nio odiko, cogone mo pe gibituru; gibikwero kun gilubu cik ducu ma mako Karama me Kato. 13Ento dano ducu matye ma olonye, ma pe ocito kawot mo, ento okwero kwero Karama me Kato, dano meno pe kibikwano ikin jo Icrael, pien onongo pe otyero gityer pa Rwot ikare ma kiciko; dano meno bale bidok iwiye. 14Ka larok mo obedo ikinwu, ka en kwero Karama me Kato pa Rwot, en bikwero kun lubu cik me Karama me Kato ki gin ma kiciko iye. Wubibedo ki cik acel pi labedo ki pi anywali me lobo.’”

Pol iwi Kema

(Nia 40:34-38)

15Ikom nino ma kiguro iye kema pa Lubanga, en aye pol obino, oboyo kom kema woko, en kema lok me caden; ki i otyeno oumu wi kema manen macalo mac nio wa odiko. 16Ci obedo kwede kitmeno jwijwi; pol umu wiye dyeceng, ki gin macalo mac umu dyewor. 17Kace pol oware woko ki iwi kema, ci jo Icrael gicako wot anyim; i kabedo ka mapol ocung iye, jo Icrael giguru iye kemagi. 18Jo Icrael gicako wot pi cik pa Rwot, dok pi cik pa Rwot giguru kemagi; kace pol pud oumu wi Kema pa Rwot, ci gin bene pud mede kibedo i gonygi. 19Ka pol omede ki umu wi Kema pi nino mapol, jo Icrael bene gin mede ki gwoko cik ma mako tic pa Rwot kun pe gidak. 20Ikare mukene pol umu wi kema pi nino mo manok, ci pi lubu cik pa Rwot gin bene mede ki bedo i gony megi kitmeno; dok pi lubu cik pa Rwot miyo gidak. 21I kine mukene pol bedo cake otyeno nio wa odiko; ka odiko pol oware woko ki iwiye, ci gicako wot; nyo ka omede orii pi nino acel ki dyewor acel, ci tek pol oware ki iwiye, ci gin bene cako wotgi. 22Kadi bed pol orii iwiye pi nino aryo, nyo dwe acel, nyo pi kare mo malac, kace pol pud omede ki umu wi kema, kun bedo kenyo, ci jo Icrael bene kong gibedo i gonygi kun pe gidak; ento ka oware woko, ci gin bene gicako wot. 23Pi lubu cik pa Rwot miyo giguru kemagi, dok pi lubu cik pa Rwot miyo gidak, kun gigwoko cik ma mako tic pa Rwot kit mayam Rwot ociko ki i dog Moses.