Wel 8

Aron oketo lacib mac

11

Rwot owaco ki Moses ni, 2“Wac bot Aron ni, ‘Ka icibo laput abironi iwi lacib mac, omyero iket ikabedo ma menyo nyim lacib mac.’” 3Ci Aron otimo kitmeno; ocibo mac lapute malo wek gumeny kabedo ma inyim lacib mac, macalo Rwot ociko ki Moses. 4Man aye kit tic ma kiyubu kwede lacib mac, kiyubu ki jabu ma kiteto ki nyol. Nia ki itedi tere nio kwede wa cal aturene, kiyubu kun kiteto ki nyol. Moses oyubu lacib mac kun lubu kit cal ma Rwot onongo onyutu bote.

Kwero Lulevi pi tic maleng

5Rwot owaco ki Moses ni, 6“Kwany Lulevi woko ki ikin jo Icrael, ci ilonygi. 7Ibitimogi kit man pi lonyogi: kir pii me lwoko balgi, ci wek gin gulyel komgi woko ducu ki lyedi, gulwok bongigi, gulonye keken gi. 8Lacen wek gin gukwany wod twon kacel ki gityer me moko kwon mapwot ma kirubu ki moo, ka dok in ibikwanyo wod twon mukene pi gitum me bal. 9Ka dong ibitero Lulevi inyim Kema me Rwate, kun nongo icoko lwak jo Icrael ducu kacel. 10Ka itero Lulevi inyim Rwot, jo Icrael gibiketo cinggi iwigi. 11Ka Aron bityero Lulevi inyim Rwot gubed gityer akwata ma oa ki bot jo Icrael, wek gubed katiyo tic pa Rwot. 12Ka dok Lulevi gibiketo cinggi iwi twoni, ci ibityero acel pi gitum me bal, ki acel pi gitum awanga bot Rwot, pi kwanyo bal ki ikom Lulevi. 13Ibitero Lulevi inyim Aron ki awobene, ci ibityerogi gubed gityer akwata bot Rwot.

14Ibipoko Lulevi woko ki ikin jo Icrael kitmeno, ci Lulevi dong bibedo jona. 15Ka dong lacen Lulevi gibidonyo katiyo tic ma i Kema me Rwate, ka dong ityeko lonyogi kun ityerogi macalo gityer akwata. 16Pien kityeko miyogi bota matwal ki ikin jo Icrael; atyeko kwanyogi pira kena ma ka lutino, kayo ma co pa jo Icrael ducu. 172Pien lutino kayo ma co ducu ma ikin jo Icrael gin mera, pa dano ki pa lee bene; yam akwerogi gubed mera inino ma aneko iye lutino kayo ma co ducu ma i lobo Ejipt. 18Ci dong atyeko kwanyo jo pa Levi me leyo katyen gi, gin lutino kayo ma co ducu ma ikin jo Icrael. 19Dok atyeko miyo Lulevi bot Aron ki awobene me mot, kun gia woko ki ikin jo Icrael pi tiyo tic i Kema me Rwate pi jo Icrael, dok pi kwanyo bal ki ikom jo Icrael, wek gemo mo pe opot ikom jo Icrael pi nyiko cok ki Kabedo Maleng.”

20Moses, Aron ki lwak jo Icrael ducu gudyero Lulevi kit mayam Rwot ociko ki Moses. 21Lulevi gulonye keken gi ikom balgi; gulwoko bongigi; ka Aron otyerogi macalo gityer akwata inyim Rwot, ci Aron otimo gin lakwany bal ki ikomgi wek gubed ma gulony.

22Lacen Lulevi gudonyo katiyo ticgi i Kema me Rwate me konyo Aron ki awobene; kit ma onongo Rwot ociko ki Moses lok ma dok ikom Lulevi, ci kitimogi kitmeno.

Kare me tic pa Lulevi

23Rwot owaco ki Moses ni 24“Man aye lok ma mako Lulevi: jo ma ditogi romo mwaka pyere aryo wiye abic dok kwede malo gibidonyo ka cobo dog ticgi ma gitiyo pi Kema me Rwate. 25Ka mwaka me ditogi oromo pyere abic, ci dong gibiweko ticgi ma gitiyo, pe dong gibitic matwal. 26Ento gibikonyo omegigi ma i Kema me Rwate wek gugwok cik ma mako ticgi, ento pe gibitiyo tic kikome. Ibitimo bot Lulevi kitmeno pi lok ma dok ikom ticgi.”