Wel 7

Tyer pa Lutela

1Ka Moses otyeko guru kema, ci owiro ki moo ka dong okwero kacel ki jami ma i iye ducu. Ka dok owiro keno tyer ki moo bene, okwero kacel ki jami tice ducu. 2Ikare meno rwodi, ma gin ludito wi kaka ki i Icrael, lutel wi kaka mayam guloyo kwano wel dano, 3gutyero gityer ma meggi inyim Rwot. Gumiyo gadigadi abicel ma gitye ki gin umu wigi, ki twoni apar wiye aryo; lutel wic aryoaryo gumiyo gadigadi acel acel, ci ngat acel acel omiyo twon acel; gutyerogi ki inyim kema. 4Rwot dok owaco ki Moses ni, 5“Gam mot magi ducu ki botgi wek kitii kwedgi tic ma i Kema me Rwate, ci imigi bot Lulevi, macalo dog tic pa ngat acel acel tye kwede.” 6Ci Moses ogamo gadigadi ducu ki twoni, ci omiyogi bot Lulevi. 7Gadigadi aryo ki twoni angwen omiyo bot likwayo pa Gercon, ma oporo dog ticgi. 8Ka dok gadigadi angwen ki twoni aboro omiyo bot likwayo pa Merari, ma oporo dog ticgi, kun gitye ite loc pa Itamar wod pa ajwaka Aron. 9Ento pe omiyo gin mo bot likwayo pa Kokat, pien yam kiketogi i dog tic me gwoko jami maleng ki me tingogi iwi gwokgi. 10Ci lutel wic gutyero gityer me kwero keno tyer nino meno ma ki wiro iye ki mooni. Lutel wic gutyero gityergi inyim keno tyer. 11Rwot owaco bot Moses ni, “Lutela bityero gityergi kun latel wic acel acel tyero mere i ninone, pi kwero keno me tyer.”

12Ngat ma otyero gityere inino mukwongo en aye Nakucon wod pa Aminadab, ma i kaka pa Juda. 13En otyero caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi tyer me moko kwon. 14Ka dok atabo me jabu acel ma peke cekel apar ma opong ki odok eceta. 15Wod twon acel, nyok romo acel, ki wod romo acel matye ki mwaka acel pi gitum awanga. 16Nyok dyel acel pi gitum me bal; 17ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Nakucon wod pa Aminadab otyero.

18Inino me aryone Netanel wod pa Juar, ma en aye latel wi jo pa Icakar otyero tyer ma mege. 19En otyere caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko; gin aryo ducu igi opong ki moko kwon mapwot ma kirubu ki moo pi gityer me moko kwon. 20Ka dok atabo me jabu acel ma peke cekel apar ma opong ki odok eceta. 21Wod twon acel, nyok romo acel, ki wod romo acel madite romo mwaka acel pi gitum awanga. 22Nyok dyel acel pi gitum me bal. 23Ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Netanel wod pa Juar otyero.

24Inino me adeke obedo nino pa Eliab wod pa Kelon, ma en aye latel wi jo pa Jabulon. 25En otyero caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi tyer me moko kwon. 26Ka dok atabo me jabu acel ma peke cekel apar ma opong ki odok eceta. 27Wod twon acel, nyok romo acel, ki wod romo acel madite tye mwaka acel pi gitum awanga. 28Nyok dyel acel pi gitum me bal; 29ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Eliab wod pa Kelon otyero.

30Inino me angwene obedo nino pa Elijur wod pa Cedeur, ma en aye latel wi jo pa Reuben. 31En otyero caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi tyer me moko kwon. 32Ka dok atabo me jabu acel ma peke cekel apar ma opong ki odok eceta. 33Wod twon acel, nyok romo acel, ki wod romo acel matye mwaka acel pi gitum awanga. 34Nyok dyel acel pi gitum me bal; 35ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi mwaka acel acel. Man aye tyer ma Elijur wod pa Cedeur otyero.

36Inino me abice obedo nino pa Celumiel wod pa Juricadai, ma en aye latel wi jo pa Cimeon. 37En otyero caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi tyer me moko kwon. 38Ka dok atabo me jabu acel ma peke cekel apar ma opong ki odok eceta. 39Wod twon acel, nyok romo acel, ki wod romo acel matye mwaka acel pi gitum awanga. 40Nyok dyel acel pi gitum me bal; 41ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye gityer ma Celumiel wod pa Juricadai otyero.

42Inino me abicele obedo nino pa Eliacap wod pa Deuel, ma en aye latel wi jo pa Gad. 43En otyero caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi gityer me moko kwon. 44Ka dok atabo me jabu acel ma peke cekel apar ma opong ki odok eceta. 45Wod twon acel, nyok romo acel, ki wod romo acel matye mwaka acel pi gitum awanga. 46Nyok dyel acel pi gitum me bal; 47ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Eliacap wod pa Deuel otyero.

48Inino me abirone obedo nino pa Elicama wod pa Amikud, ma en aye latel wi jo pa Epraim. 49En otyero caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi gityer me moko kwon, 50ka dok atabo me jabu acel ma peke cekel apar ma opong ki odok eceta. 51Wod twon acel, nyok romo acel, ki wod romo acel matye mwaka acel pi gitum awanga. 52Nyok dyel acel pi gitum me bal; 53ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Elicama wod pa Amikud otyero.

54Inino me aborone obedo nino pa Gamaliel wod pa Pedajur, ma en aye latel wi jo pa Manace. 55En otyero caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi gityer me moko kwon. 56Ka dok atabo me jabu acel ma peke cekel apar ma opong ki odok eceta. 57Wod twon acel, nyok romo acel, ki wod romo acel matye ki mwaka acel pi gitum awanga. 58Nyok dyel acel pi gitum me bal; 59ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Gamaliel wod pa Pedajur otyero.

60Inino me abongwene obedo nino pa Abidan wod pa Gideoni, ma en aye latel wi jo pa Benjamin. 61En otyero caani me ryal acel ma peke romo cekel miya acel ki pyere adek, ki becen me ryal acel ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi tyer me moko kwon. 62Ka dok atabo me jabu acel ma peke cekel apar ma opong ki odok eceta. 63Wod twon acel, nyok romo acel ki wod romo acel matye mwaka acel pi gitum awanga. 64Nyok dyel acel pi gitum me bal. 65Ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Abidan wod pa Gideoni otyero.

66Inino me apar obedo nino pa Akiejer wod pa Amicadai, ma en aye latel wi jo pa Dan. 67En otyero caani me ryal acel ma peke romo cekel miya acel ki pyere adek, ki becen me ryal ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi gityer me moko kwon. 68Ka dok atabo me jabu acel ma peke cekel apar ma opong ki odok eceta. 69Wod twon acel, nyok romo acel, ki wod romo acel matye mwaka acel pi gitum awanga. 70Nyok dyel acel pi gitum me bal. 71Ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi mwaka acel acel. Man aye tyer ma Akiejer wod pa Amicadai otyero.

72Inino me apar wiye acel obedo nino pa Pagiel wod pa Okran, ma en aye latel wi jo pa Acer. 73En otyero caani me ryal acel ma peke romo cekel miya acel ki pyere adek, ki becen me ryal ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi tyer me moko kwon. 74Ka dok atabo me jabu acel ma peke cekel apar ma opong ki odok eceta. 75Wod twon acel, nyok romo acel, ki wod romo acel matye mwaka acel pi gitum awanga. 76Nyok dyel acel pi gitum me bal; 77ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Pagiel wod pa Okran otyero.

78Inino me apar wiye aryo obedo nino pa Akira wod pa Enan, ma en aye latel wi jo pa Naputali. 79En otyero caani me ryal acel ma peke romo cekel miya acel ki pyere adek, ki becen me ryal ma peke cekel pyere abiro, ka kiporo ki wel ma kimoko. Gin aryo ducu igi opong ki moko kwon mapwot ma kirubu ki moo pi gityer me moko kwon. 80Ka dok atabo me jabu acel ma peke cekel apar ma opong ki odok eceta. 81Wod twon acel, nyok romo acel, ki wod romo acel matye mwaka acel pi gitum awanga. 82Nyok dyel acel pi gitum me bal. 83Ka dok pi tyer me berbedo otyero twoni aryo, nyogi romi abic, nyogi dyegi abic, ki lutino nyogi romi abic ma ditogi tye mwaka acel acel. Man aye tyer ma Akira wod pa Enan otyero.

84Man aye obedo tyer me kwero keno tyer, ma kityero nino ma kiwiro iye ki moo, ma oa ki bot lutel wi Icrael: caani me ryal apar wiye aryo, becen me ryal apar wiye aryo, ki atabo me jabu apar wiye aryo, 85kun nongo caani me ryal acel acel peke romo cekel miya acel ki pyere adek, ki becen acel acel peke romo cekel pyere abiro, ma omiyo ryal me jami ducu pekgi oromo cekel alip aryo, ki miya angwen ka kiporo ki wel ma kimoko. 86Atabo me jabu onongo tye apar wiye aryo, ma odok eceta opongo igi, kun atabo acel acel peke romo cekel apar ka kiporo ki wel ma kimoko, ma omiyo jabu me atabo ducu oromo cekel miya acel ki pyere aryo. 87Lee makwo ducu pi gitum awanga giromo twoni apar wiye aryo, nyogi romi apar wiye aryo, ki lutino nyogi romi apar wiye aryo ma ditogi tye mwaka acel acel, kacel ki gityer me moko kwon ma otikogi; ki nyogi dyegi apar wiye aryo pi gitum me bal. 88Lee makwo ducu pi tyer me berbedo gubedo twoni pyere aryo wiye angwen, nyogi romi pyere abicel, nyogi dyegi pyere abicel, ki lutino nyogi romi ma ditogi tye mwaka acel acel pyere abicel. Meno aye obedo tyer me kwero keno tyer, ma kityero ma dong kityeko wirone ki moo.

89Ikare ma Moses ocito i Kema me Rwate kalok iye ki Rwot, owinyo dwon Rwot ka tye kalok kwede kun a ki malo iwi kom me kica ma iwi Canduk lok me Caden, kun winye ki ikin lukerubi aryo, ma kun loko kwede.