Wel 6

Cik ma mako ngat ma odyere bot Lubanga

1Rwot owaco bot Moses ni, 2“Wac bot jo Icrael ni, ka laco mo nyo dako mo okwongo kwong ma pire tek, kwong me bedo latic pa Lubanga, ci nongo en okone gire kene pi bedo dano pa Rwot.1 32Dano meno bikone gire kene kun pe mato kongo bwino nyo gin ma mero dano. En pe bimato kongo mawac ma oa ikom bwino nyo gin mo ma mero dano. En bene pe bimato pig nyig olok, kadi camo nyige madyak nyo mutwone. 4Ikare ducu ma en okone iye gire kene, pe bicamo gin mo ma oa ikom olok, kadi nyige matino ma i iye, wa odune.

5Ikare ducu ma nongo en okwongo pire ni ebikone gire kene, lyedi pe bigudu wiye; en bibedo dano maleng nio wa ikare ma karene me kone pi bedo dano pa Rwot dong otum; ci biweko yer wiye lot maboco ma pe kilyelo.

6Ikare ma en okone iye gire kene pi bedo dano pa Rwot, pe binyiko cok ikom dano ma oto. 7En pe bibale doko keni kadi pi wone nyo mine, nyo omine, nyo lamine kace guto, pien gin ma nyutu konene kene pi bedo dano pa Lubanga pud tye iwiye. 8Ikare ducu me konene kene en bibedo maleng pi Rwot.

9Ka dano mo oto atura kangete, ma weko wiye ma okweroni doko keni, ci en bilyelo wiye inino me lonyene; bilyelo inino me abirone. 10Ikom nino me aborone en bitero amam aryo nyo lutino akuri aryo bot ajwaka pa Lubanga i dogola Kema me Rwate. 11Ajwaka pa Lubanga bityero acel pi gitum me bal ki acel pi gitum awanga, kun timo gin lakwany bal ki dano meno, pien onongo obalo pi gudu kom dano ma oto. En bikwero wiye inino meno kikome, 12ci bikone gire pi bedo dano pa Rwot pi karene me kone kene, dok bikelo wod romo madite tye mwaka acel wek obed gitum me tingo alii; ento kare mukwongo ca nongo obale nono, pien yer wiye ma okweroni odoko keni.

13Man aye cik ma mako dano ma odyere bot Lubanga ka karene me kone kene dong otum. Kibikele i dogola Kema me Rwate, 14ci en bityero mote bot Rwot, bityero wod romo acel me mwaka acel, ma kome pe kimwonyo, pi gitum awanga, ki bwong romo acel madite tye mwaka acel ma kome pe kimwonyo pi gityer me berbedo, 15kacel ki aduku me mugati ma tobi peke iye, capat me moko kwon mapwot ma kirubu ki moo, ki capat marep ma tobi pe iye ma kireyo moo ikomgi, ki gityer me moko kwon ki gityer amata ma otikogi.

16Ajwaka pa Lubanga bikelo gityer magi inyim Rwot, ci tyero gitum me bale ki gitum me tingo alii. 17Ka dok bityero nyok romo obed gityer me berbedo bot Rwot, kacel ki aduku mugati ma tobi pe iye. Ka dok ajwaka pa Lubanga bityero gityer me moko kwon ki gityer amata. 18Dano ma odyere bot Lubanga bilyelo yer wiye me kone kene i dogola Kema me Rwate, ci bikwanyo yer wiye me dyereni, keto imac matye ite gityer me berbedoni. 19Ajwaka pa Lubanga bikwanyo bat nyok romo ka dong kitedo, ki capat acel ma tobi peke iye, ki i aduku, ki capat marep acel ma tobi peke iye, biketogi i dye cing ngat ma odyere, ka dong olyelo yer wiye me kone keneni. 20Ajwaka pa Lubanga bikwatogi me bedo gityer me akwata inyim Rwot; gin aye wang wat maleng pa ajwaka pa Lubanga, kacel ki gok ma kikwatoni ki em ma kityero; lacen dano ma odyereni dong twero mato kongo bwino.

21Man aye cik ma mako dano ma odyere ma okwongo kwong. Gityere bot Rwot bibedo ma oporo kwonge ma okwongo me bedo latic pa Lubanga, ma en miyo kacel ki gin ma en romo nongone, wek en otii ma oporo kwong mayam okwongo, kun lubu cik ma mako konene kene me bedo ngat ma odyere.”

Lamo gum pa Ajwaki

22Rwot owaco bot Moses ni, 23“Wac bot Aron ki awobene ni, Wubilamo gum ikom jo Icrael kit man:

24Rwot omini gum,

ogwoki;

25Rwot oneni ki wang me kica,

otimi ber;

26Rwot oneni dok omini kuc.

27Ci Rwot owaco ni ka Aron ki awobene bitucu nyinga pi miyo gum ikom jo Icrael kitmeno, ci an abimiyogi gum.”