Wel 5

Jo ma komgi ki keni

1Rwot owaco ki Moses ni, 2“Cik jo Icrael gucwal jo ducu ma twoyo two delkom gua woko ki igony, ki dano acel acel ma kome cwer tut, ki dano acel acel ma odoko keni pi gudu kom dano ma oto. 3Wubicwalo co wa ki mon bene, kun wucwalogi woko ki igony, wek pe gubal gony ma an abedo iyeni, ikin jona.” 4Jo Icrael gutimo kitmeno, ci gucwalogi woko i nge gony; macalo Rwot con owaco bot Moses.

Cik ma mako culu wang jami

51

Rwot owaco bot Moses ni, 6“Wac ki jo Icrael ni: ‘Kace laco mo nyo dako mo otimo bal mo ma dano timo kun gingayo wang Rwot, ce otingo alii, 7ci en bitucu bal mere ma otimo ni; ka dok en biculu wang gin marac ma otimo; bimedo iye acel me abic, ci miyo bot dano ma en otimo maraci. 8Ento ka dano meno wate mo peke ma omyero kicul wang gin maraci bote, lacul wang gin marac meno bedo pa Rwot, kibiculune bot ajwaka pa Lubanga, kun kibamo iye nyok romo me kwanyo bal ma kitimo kwede gin lakwany bali ki ikome. 9Gityer ducu, nyo jami ducu maleng pa jo Icrael ma kikelo bot ajwaka pa Lubanga bibedo mere. 10Jami maleng ma dano acel acel okelo bibedo pa ajwaka pa Lubanga; gin ducu ma dano mo omiyo bot ajwaka pa Lubanga bibedo pa ajwaka pa Lubanga.’”

Cik ma mako dako ma cwiny cware gung ikome

11Rwot owaco bot Moses ni, 12“Wac ki jo Icrael ni, ka laco mo cwinye gung ikom dakone kun tamoni dakone tye katimo abor, 13ma oweko laco mo obutu kwede, ce cware pe ongeyo, ma dako ojere kekene kun loke okane woko, dok pe tye caden mo ma moko lok kom dako meno, pien pe kinonge iye; 14ka cwiny me nyeko omako laco, ma nyeko omake ikom dakone ma ojere kekeneni, nyo ka cwiny me nyeko omako laco, kun nyeko omake ikom dakone, kadi bed dako pe otimo abor mo keken, 15ci laco bitero dakone bot ajwaka pa Lubanga, kun tero gityer ma ki mito pi dakone, agwata moko kwon acel me moko cayiri; pe bionyo moo ikome, pe biketo iye odok luban, pien meno gityer me moko kwon me nyeko, en gityer me moko kwon me lapowic, ma bimiyo kipo pi bal meno.

16Ci Ajwaka pa Lubanga bikelo dakonu cok, ci cibo inyim Rwot. 17Ka dok ajwaka pa Lubanga bitero pii maleng ki otako, ci jobo apwa ma i dye ot me Kema, onyo i pii. 18Ka ajwaka pa Lubanga bicibo dako inyim Rwot, ci bigonyo yer wi dakonu wek oket ata lijayi, ci keto gityer me moko kwon me lapowic i cinge, ma en aye gityer me moko kwon me nyeko. Ci Ajwaka pa Lubanga bimako pii makec me ceno dano i cinge. 19Ka ajwaka pa Lubanga bimiyo dako meno kwongo kwong, kun waco ni, ‘Ka laco mo pe obutu kwedi, ka pe ingak woko, kun ijere kekeni ma kun itye ite twero pa cwari, ci gin marac mo pe otimi pi pii man makec me ceno danoni. 20Ento kace wangi odoko tar, ma kun pud itye ite twero pa cwari, ma ijere kekeni, ma laco mo ma pe cwari obutu kwedi, 21ci ajwaka pa Lubanga bimiyo dako meno kwongo kwong makelo ceno dano kun waco ki dako meno ni, Rwot omii in idok ngat ma kiceno ki ikin dano, kun nyingi odok ongon ikin lutuwu, ikare ma Rwot bitweyo ot nyodoni woko dok bimiyo ii bene deng woko; 22wek pii man me ceno dano ocit i cin ii, omii ii odeng, ci otwe ot nyodoni woko.’ Ci dakonu bigamo ni, ‘Amen, Amen.’

23Lacen ajwaka pa Lubanga bicoyo lok me ceno dano ni ikaratac, ka dok lwoko coc woko ki pii makeci, 24ci bimiyo dako meno mato pii makec ma kiceno ki danoni, ci pii me ceno dano bidonyo i iye, miyo iye mwode matek. 25Ka dok ajwaka pa Lubanga bikwanyo gityer me moko kwon me nyeko woko ki i cing dako meno, ci kwato gityer me moko kwon inyim Rwot, tero ikeno tyer. 26Ka ajwaka pa Lubanga bijobo moko me gityer pong cing acel obed gin me po ikome, ci biwango iwi keno tyer; ka dok lacen en bimiyo dako meno mato pii. 27Ka dong omiyo omato pii, kace onongo en otyeko jere kekene kun otimo abor, ci pii me ceno dano bidonyo i iye, miyo iye mwode matek; iye bideng woko, ot nyodone bitwene woko, ci nying dakoni bidoko ongon ikin lutugi. 28Ento ka dako meno pe ojere kekene, ma bal mo pe ikome, ci gin mo marac pe bitime ikome, ci en binywalo lutino.

29Man aye cik ma mako lok me nyeko, ka dako matye ite twero pa cware ma nongo wange tar, ci ojere kekene, 30nyo ka cwiny me nyeko omako laco mo, kun cwinye gung ikom dakone; en bicibo dako inyim Rwot, ci ajwaka pa Lubanga bitic ikom dako kun lubu cik man ducu. 31Laco pe bibedo ki bal mo, ento bal bidok iwi dako ka obalo.”