Wel 4

Tic pa Lulevi ma i kaka pa Kokat

1Rwot owaco bot Moses ki Aron ni, 2“Kwan wel likwayo pa Kokat ma ikin likwayo pa Levi, kun ilubu dogolagi ki dog odi pa kwarogi, 3cake ki ikom jo ma ditogi romo mwaka pyere adek nio wa ikom jo ma ditogi romo mwaka pyere abic, jo ducu ma giromo donyo i dog tic pi tiyo tic ma i Kema me Rwate. 4Man aye tic ma likwayo pa Kokat gibitiyo i Kema me Rwate: gin bitic ikom jami maleng makato. 5Ka gony dong bicako wot, ci Aron ki awobene bidonyo i Kema ka kwanyo bongo kicika, ci kiumu kwede Canduk lok me Caden. 6Ka dok gibiumu wiye ki laa dyel, lacen gibiyaro bongo ma bulu ikom meno, ka dong gibirwako tale iye. 7Gin bipeto bongo ma bulu ikom meja me keto mugati ma kiketo inyim Rwot, ka dong gibiketo caani iwiye, ki atabo me odok eceta, ki wee, ki cupa me onyo gityer amata; mugati ma kicano inyim Rwot jwijwi bene obed iwiye. 8Lacen gin biyaro bongo makwar iwiye, ci meno gin biumu ki laa dyel laume, ka dong gibirwako tale iye. 9Ka dok gibikwanyo bongo ma bulu, ci kiumu ki lacib mac, kacel ki lapute, ki magace, ki caanine ki atabo moone ducu ma gitiyo kwede tice. 10Ci gin biboyo en ki jami tice ducu ki laa dyel laume, ka dong gin bipyelo iwi tal latinge.

11Ci gin biyaro bongo ma bulu ikom keno tyer me jabu, ka dok gin biumu kome ki gin ma kikwoyo ki laa dyel, ka dong gin birwako tale iye. 12Gin bikwanyo jami tic ducu ma kitiyo kwedgi i Kabedo Maleng, gin biboyogi ducu ki bongo ma bulu, ka dong gin biumugi ki gin ma kikwoyo ki laa dyel, ci gin bipyelo iwi tal latinge. 13Gin bijobo buru mac ma i keno me tyer woko, ci gin biyaro bongo ma lamarlamar iwiye; 14ka dok gibiketo iye jami tic ducu me keno tyer, ma kitiyo kwede tic ikome; wee lawang mac, gin lacob ringo, akwaya latoke ki becen, jami tic ducu me keno tyer; ka dok gibiyaro ikome laa dyel laume, lacen gibirwako tale. 15Ka Aron ki awobene dong gutyeko umu Kabedo Maleng ki jami ma i Kabedo Maleng ducu ikare ma guputu gony, lacen likwayo pa Kokat dong gibibino ka tingo jami me Kema, ento pe gugud kom jami maleng ducu, wek pe guto. Magi aye jami me Kema me Rwate ma likwayo pa Kokat bitingo.

16Eleajar wod pa Aron aye biloyo moo tara, ki odok ma ngwece kur, ki gityer me moko kwon me nino ducu, ki moo wir, kun dok loyo kom Kema ducu ki lwak jami ducu ma bedo iye, en aye Kabedo Maleng kikome ki jami tice.”

17Ci Rwot owaco bot Moses ki Aron ni, 18“Pe iwek dogola ducu me kaka pa jo pa Kokat guto gutum woko ki ikin jo pa Levi, 19ento ber i ti kwedgi kitmeno wek gubed makwo, ma pe guto ikare ma gibino cok ki jami maleng makato ducu. Aron ki awobene aye bidonyo ka nyutugi tic pa ngat acel acel ki yec ma gin bitingo. 20Ento gin pe bidonyo i iye kaneno kom jami maleng kadi matidi mo, wek pe guto.”

21Rwot owaco bot Moses ni, 22“Kwan wel likwayo pa Gercon bene, kun ilubu dogolagi ki dog odi pa kwarigi; 23ibikwano welgi cake ki ikom jo ma mwakagi romo pyere adek nio wa ikom jo ma mwakagi romo pyere abic, jo ducu ma giromo donyo i dog tic pi tiyo tic ikom Kema me Rwate. 24Man en aye dog tic ma dogola pa Gercon ducu gibitiyo, me tiyo tic ki me tingo yec: 25gin bitingo bongo cuka me kema, ki Kema me Rwate ki laum wiye, ki laa dyel ma kiumu kwede wiye malo, 26ki bongo cuka me angaba me rumu dyekal, ki bongo laum dog gang me dyekal ma orumu kema ki keno tyer, ki lwak tol lacikgi, ki jami tic ducu ma kitiyo kwedgi iye; gibitiyo tic ducu ma mite ikom jami magi. 27Tic ducu ma likwayo pa Gercon gibitiyo bibedo kit ma Aron ki awobene gibicikogi kwede; dok gin aye bipoko yecgi ducu botgi me agwoka. 28Man en aye tic pa ludogola weng pa likwayo pa Gercon ducu ki i Kema me Rwate; dog ticgi bibedo ite loc pa Itamar wod pa ajwaka Aron.”

Tic pa likwayo pa Merari

29“Likwayo pa Merari ibikwano welgi kun ilubu dogolagi ki dog odi pa kwarogi; 30ibikwano welgi cake ki ikom jo ma ditogi romo mwaka pyere adek nio wa ikom jo ma ditogi romo mwaka pyere abic, jo ducu ma giromo donyo i dog tic pi tiyo tic i Kema me Rwate. 31Magi aye gin ma kimiyo botgi me atinga, ma en aye ticgi ducu ki i Kema me Rwate: lwak guti me Kema, riine, wire ki lwak tedi tere, 32ki wir ducu ma orumu dyekal, tedi tergi ducu, teke lagurgi ki tol lacikgi, jami ticgi ducu ki gin ma okemo tic ducu. Ibipoko botgi jami ma kimito ni guting kun inyutu ki nyinggi. 33Man aye tic pa ludogola weng pa likwayo pa Merari ducu, i dog ticgi ducu i Kema me Rwate; ma bibedo ite loc pa Itamar wod pa ajwaka Aron.”

34Moses ki Aron ki lutel wi lwak gukwano wel likwayo pa Kokat, kun lubu dogolagi ki dog odi pa kwarigi, 35cake ki ikom jo ma mwakagi romo pyere adek nio wa ikom jo ma mwakagi romo pyere abic. Jo ducu ma giromo donyo i dog tic, pi tiyo tic i Kema me Rwate. 36Welgi ma kikwano kun lubu dogolagi oromo alip aryo, ki miya abiro ki pyere abic. 37Meno aye wel dogola weng pa jo pa Kokat, jo ducu ma gutiyo tic i Kema me Rwate, ma Moses ki Aron gukwano welgi, macalo Rwot ociko kun wok ki i dog Moses.

38Man wel likwayo pa Gercon ma kikwano welgi kun lubu dogolagi ki dog odi pa kwarigi, 39cake ki jo ma mwakagi romo pyere adek nio wa jo ma mwakagi romo pyere abic, jo ducu ma giromo donyo i dog tic, pi tiyo tic i Kema me Rwate. 40Welgi ma kikwano kun lubu dogolagi oromo alip aryo, ki miya abicel ki pyere adek. 41Meno aye wel dogola weng pa likwayo pa Gercon, jo ducu ma gutiyo tic i Kema me Rwate, ma Moses ki Aron gukwano welgi, macalo Rwot ociko kun wok ki i dog Moses.

42Man aye wel likwayo pa Merari ma kikwano welgi kun lubu dogolagi ki dog odi pa kwarogi. 43Cake ki jo ma mwakagi romo pyere adek nio wa jo ma mwakagi romo pyere abic, jo ducu ma giromo donyo i dog tic, pi tiyo tic i Kema me Rwate. 44Welgi ma kikwano kun lubu dogolagi oromo alip adek, ki miya aryo. 45Meno aye jo me dogola pa likwayo pa Merari ma kikwanogi, ma Moses ki Aron gukwano welgi, macalo Rwot ociko kun wok ki i dog Moses.

46Jo ducu ki ikin jo pa Levi ma kikwano welgi, ma Moses ki Aron ki lutel wi Icrael gukwanogi kun lubu dogolagi ki dog odi pa kwarigi, 47cake ki jo ma mwakagi romo pyere adek nio wa jo ma mwakagi romo pyere abic, jo ducu ma giromo donyo i dog tic pi tiyo tic mapatpat ki pi tingo yec i Kema me Rwate. 48Jo ma ikin gi ma kikwano welgi guromo alip aboro, ki miya abic ki pyere aboro. 49Macalo Rwot yam ociko kun wok ki i dog Moses ci ki miyogi ticgi kitmeno, ngat acel acel i dog tice me tiyo tic nyo me tingo yec; kikwano welgi kitmeno, macalo Rwot ociko ki Moses.