Wel 3

Awobe pa Aron

1Man aye likwayo pa Aron ki Moses ikare ma Rwot obedo kalok ki Moses iwi got me Cinai. 21Magi aye nying awobe pa Aron: Nadab latin kayone ki Abiu, Eleajar ki Itamar; 3meno aye nying awobe pa Aron, gin aye ajwaki ma ki wirogi ki moo, ma Moses yam okwerogi pi tiyo tic me bedo ajwaki. 42Ento Nadab ki Abiu gin oto inyim Rwot ikare ma gutyero mac mapat inyim Rwot i tim Cinai. Gin gubedo peke ki lutino. Ma omiyo Eleajar ki Itamar gutiyo tic pa ajwaki ikare ma won gi pud kwo.

5Rwot owaco bot Moses ni, 6“Kel kaka pa Levi cok, ci iketgi inyim ajwaka pa Lubanga wek guti bote. 7Gin bitiyo tic pire ki pi lwak ducu inyim Kema me Rwate, dok gibitiyo tic pi jo Icrael kun gitiyo ticgi i Kema. 8Gin aye gibigwoko jami ducu ma i Kema me Rwate, dok gibitiyo tic pi jo Icrael kun gitiyo ticgi i Kema. 9Ibimiyo Lulevi bot Aron ki awobene; pien tic ma ki miyo botgi matwal eno. 10Ci ibiketo Aron ki awobene, me tiyo ticgi me bedo ajwaki; ento ka ngat mo mukene mapat ki awobe pa Aron onyiko cok i Kema katiyo meno, kibineke woko.”

11Ci Rwot dok owaco bot Moses ni, 123“Nen, dong atyeko kwanyo jo pa Levi ki ikin jo Icrael ma ka lutino kayo ducu mukwongo yabo ic ikin jo Icrael. Jo pa Levi aye gibibedo jona, 13pien lutino kayo ducu mera. Inino mayam aneko iye lutino kayo ducu ma i lobo Ejipt ca, en aye akwero iye lutino kayo ducu ma i Icrael gubed mera, pa dano ki pa lee; gibibedo mera; An a Rwot.”

14Ci Rwot owaco bot Moses ki i tim Cinai ni, 15“Kwan wel likwayo pa Levi, kun ilubu dog odi pa kwarigi, ki dogolagi; ibikwano co ducu cake ki ikom jo ma ditogi romo dwe acel dok kwede malo.” 16Kitmeno Moses okwano welgi kit ma Rwot owaconi, macalo yam ocike kwedeni. 17Magi aye awobe pa Levi ma kiyeko nyinggi: Gercon, Kokat ki Merari. 18Magi aye nying awobe pa Gercon kun lubu dogolagi: Libni ki Cimei. 19Awobe pa Kokat kun lubu dogolagi gin aye: Amram, Ijar, Kebron ki Ujiel. 20Awobe pa Merari kun lubu dogolagi gin aye: Makali ki Muci. Meno aye dogola pa Lulevi, kun lubu dog odi pa kwarigi.

21Jo pa Gercon aye dogola pa jo pa Libni ki dogola pa jo pa Cimei; meno aye dogola pa jo pa Gercon. 22Welgi ma kikwano wel co ducu cake ki ikom jo ma ditogi romo dwe acel dok kwede malo oromo alip abiro, ki miya abic. 23Dogola pa jo pa Gercon yam guguru kemagi i nge kema tung kupotoceng, 24kun Eliacap wod pa Lael obedo ladit ki i ot pa kwaro pa jo Gercon. 25Tic pa likwayo pa Gercon i Kema me Rwate obedo me gwoko kema; en aye kema kikome ki laum wiye, bongo cuka laum dogola me dogola Kema me Rwate, 26bongo cuka me angaba me larum dyekal, bongo cuka laum dogola me dyekal ma orumu kema ki keno tyer, ki lwak tol lacikgi; dog tic ducu ma mite pi jami magi.

27Jo pa Kokat aye dogola pa jo pa Amram, ki dogola pa jo pa Ijar, ki dogola pa jo pa Kebron, ki dogola pa jo pa Ujiel; meno aye dogola pa jo pa Kokat. 28Welgi ma kikwano wel co ducu cake ki ikom jo ma ditogi romo dwe acel dok kwede malo oromo alip aboro, ki miya abicel ma gitiyo ticgi i Kabedo Maleng. 29Dogola pa jo pa Kokat yam giguru kemagi inget Kema tung kupiny, 30kun Elijapan wod pa Ujiel obedo ladit ki i ot pa kwaro me dogola pa jo pa Kokat. 31Ticgi obedo me gwoko canduk, meja, lacib mac, keno tyer, jami me Kabedo Maleng ma ajwaki gitiyo kwedgi ducu, ki bongo kicika; i dog tic ducu ma mite pi jami magi. 32Ladit maloyo ludito ducu pa Lulevi obedo Eleajar wod pa ajwaka Aron. En onongo loyo jo ma gitiyo ticgi i Kabedo Maleng.

33Jo pa Merari aye dogola pa jo pa Makali ki dogola pa jo pa Muci; meno aye dogola pa jo pa Merari. 34Welgi ma kikwano wel co ducu cake ki ikom jo ma ditogi romo dwe acel dok kwede malo oromo alip abicel, ki miya aryo. 35Ladit wi ot pa kwarogi ma i dogola pa jo Merari obedo Juriel wod pa Abikail. Gin yam giguru kemagi inget Kema tung kumalo. 36Tic ma kimiyo bot likwayo pa Merari obedo me gwoko lwak guti me kema, riine, wire, lwak tedi tere ki gin ducu ma okemo tice; i dog tic ducu ma mite pi jami magi ducu. 37Ka dok lwak wir ducu ma gurumu dyekal, tedi tergi, teke lagurgi, ki lwak tole.

38Jo mayam guguru kemagi inyim kema tung kunyango, inyim Kema me Rwate tung kama ceng tuc ki iyeni, gin aye Moses ki Aron ki awobe pa Aron. Gin onongo kityeko ketogi i dog tic ma i Kabedo Maleng, pi tiyo tic ducu ma mite pi jo Icrael; ka ngat mo mukene onyiko cok, omyero kinek woko. 39Wel jo Levi ducu mayam Moses ki Aron gukwano, welgi pi lubu cik pa Rwot, kun lubu dogolagi, co ducu cake ki ikom jo ma ditogi romo dwe acel dok kwede malo, oromo alip pyere aryo wiye aryo.

Lulevi guleyo kaka lutino kayo

40Ci Rwot owaco bot Moses ni, “Lutino kayo ducu ma co ki ikin jo Icrael, ducu mera. Coo nyinggi piny, cake ki ikom jo ma ditogi romo dwe acel dok kwede malo. 41Ibikwanyo jo pa Levi gubed mera ma ka lutino kayo ducu ma ikin jo Icrael. Dok iter lim makwo pa jo Levi ma ka lutino kayo lim ducu ma ikin lim makwo pa jo Icrael. An a Rwot!” 42Kitmeno Moses okwano wel lutino kayo ma ikin jo Icrael ducu, macalo Rwot ocike. 43Lutino kayo ducu ma co, macalo wel nyinggi tye, cake ki ikom jo ma ditogi romo dwe acel dok kwede malo, ka kikwano welgi onongo guromo alip pyere aryo wiye aryo, ki miya aryo ki pyere abiro wiye adek.

44Ci Rwot owaco bot Moses ni 45“Kwany jo pa Levi gubed ma ka lutino kayo ducu ma ikin jo Icrael, dok iter lim makwo pa jo Levi ma ka leegi; pien jo pa Levi gibibedo jona. 46Pi koko lutino kayo miya aryo ki pyere abiro wiye adek ma ikin jo Icrael ma gudong ma wel pa jo pa Levi orem woko pirgi ni, 47ibigamo cekel abicabic pi dano acel acel; ibigamo kun ilubu wel cekel ma kimoko. Ma cekel acel romo gera pyere aryo nono 48Lim meno ma kikoko kwede wel jo ma gudongi ibimiyo bot Aron ki awobene.” 49Ma omiyo Moses ogamo lim me kok ki bot jo ma odong ma wel pa jo Levi orem me kokogi. 50Moses ogamo lim ryal ki bot lutino kayo pa jo Icrael maromo cekel alip acel, ki miya adek ki pyere abicel wiye abic, kun lubu wel cekel ma kimoko. 51Moses omiyo lim meno me kok bot Aron ki awobene, kit ma Rwot owaconi, macalo Rwot yam ociko ki Moses.