Wel 2

Gony pa kaka acel acel ki lutel wigi

1Rwot owaco bot Moses ki Aron ni, 2“Jo Icrael gibiguru kemagi ngat acel acel ite bendera pa kakane, kun giketo ki lanyut me odi pa kwarogi. Ci gibiguru kemagi ki tenge kun doggi kemo Kema me Rwate tungi ki tungi ducu. 3Jo ma biguru kemagi tung kunyango, kama ceng tuc ki iyeni, gin bibedo jo ma ite bendera pa Juda, kun gilubu buca monygi. Latel wi jo pa Juda aye Nakucon ma wod pa Aminadab, 4ma kikwano wel dano ma i buca monye oromo alip pyere abiro wiye angwen, ki miya abicel. 5Jo ma biguru kemagi macok kwede bibedo kaka pa Icakar. Latel wi jo pa Icakar aye Natanel ma wod pa Jura, 6ma kikwano wel dano ma i buca monye oromo alip pyere abic wiye angwen ki miya angwen. 7Ka dok kaka pa Jabulon; latel wi jo pa Jabulon aye Eliab ma wod pa Kelon, 8ma kikwano wel dano ma i buca monye oromo alip pyere abic wiye abiro, ki miya angwen. 9Wel jo ducu ma i gony pa Juda, i bucagi, oromo alip miya acel ki pyere aboro wiye abicel, ki miya angwen. Ka wot cake, gin aye gibitelo yoo.

10Ki tung kupiny en aye bendera me gony pa jo pa Reuben bicung iye, kun gilubu buca monygi; latel wi jo pa Reuben aye Elijur ma wod pa Cedeur, 11ma kikwano wel dano ma i buca monye oromo alip pyere angwen wiye abicel, ki miya abic. 12Jo ma biguru kemagi macok kwede bibedo kaka pa Cimeon; latel wi jo pa Cimeon aye Celumiel ma wod pa Juricadai, 13ma kikwano wel dano ma i buca monye oromo alip pyere abic wiye abongwen ki miya adek. 14Ka dok kaka pa Gad; latel wi jo pa Gad aye Eliacap wod pa Reuel, 15ma kikwano wel dano ma i buca monye oromo alip pyere angwen wiye abic, ki miya abicel ki pyere abic. 16Wel jo ducu ma i gony pa Reuben, i bucagi, oromo alip miya acel ki pyere abic wiye acel, ki miya angwen ki pyere abic. Ka wot cake, gin aye gibimol me aryone.

17Lacen Kema me Rwate bicako wot, kacel ki gony pa jo Levi, i dye gony ducu. Kitma kiguro ki kemagi gibicako wotgi kikore kitmeno, kun dul acel acel tye ki kabedone, kun gilube aluba bendera ki bendera.

18Ki tung kupotoceng bendera pa jo Epraim bicung iye, kun gilubu buca monygi; latel wi jo pa Epraim aye Elicama ma wod pa Amikud, 19ma kikwano wel dano ma i buca monye oromo alip pyere angwen, ki miya abic. 20Jo ma biguru kemagi macok kwede gibibedo kaka pa Manace; latel wi jo pa Manace aye Gamaliel ma wod pa Pedajur, 21ma kikwano wel dano ma i buca monye oromo alip pyere adek wiye aryo, ki miya aryo. 22Ka dok kaka pa Benjamin; latel wi jo pa Benjamin aye Abidan ma wod pa Gideoni, 23ma kikwano wel dano ma i buca monye oromo alip pyere adek wiye abic, ki miya angwen. 24Wel jo ducu ma i gony pa Epraim, i bucagi, oromo alip miya acel ki aboro, ki miya acel. Gin bimol me adeke.

25Ki tung kumalo bendera pa jo pa Dan bicung iye, kun gilubu buca monygi; latel wi jo pa Dan aye Akiejer ma wod pa Amicadai, 26ma kikwano wel dano ma i buca monye oromo alip pyere abicel wiye aryo, ki miya abiro. 27Jo ma biguru kemagi macok kwede bibedo kaka pa Acer; latel wi jo pa Acer en aye Pagiel ma wod pa Okran, 28ma kikwano wel dano ma i buca monye oromo alip pyere angwen wiye acel, ki miya abic. 29Ka dok kaka pa Naputali; latel wi jo pa Naputali aye Akira ma wod pa Enan, 30ma kikwano wel dano ma i buca monye oromo alip pyere abic wiye adek, ki miya angwen. 31Wel jo ducu ma i gony pa Dan oromo alip miya acel ki pyere abic wiye abiro, ki miya abicel. Gin gibimol me agikine, kun gilube aluba bendera ki bendera.”

32Meno aye jo Icrael kit ma kikwanogi kwede, kun lubu dog odi pa kwarogi; jo ducu ma i gonygi ma kikwanogi i buca monygi onongo guromo alip miya abicel ki adek, ki miya abic ki pyere abic nono. 33Ento jo pa Levi pe kikwano ikom jo Icrael, macalo Rwot onongo ociko ki Moses.

34Jo Icrael yam gutiyo kit macalo Rwot ociko Moses. Guguru kemagi kitmeno ite benderagi, gucako wot bene gumol kitmeno, ngat acel acel ki dogolane, macalo dog odi pa kwarigi tye kwede.