Wel 1

Kwano wel dano mukwongo pa jo Icrael

1Rwot oloko ki Moses i tim Cinai, i Kema me Rwate, ikom nino dwe mukwongo me dwe me aryo, i mwaka me aryone nicake ki ikare ma dong gua woko ki i lobo Ejipt. Rwot owaco ni, 2“Wun ki Aron wubikwano wel jo Icrael ki bucagi ducu, kun wulubu ki dogolagi ki dog odi pa kwarigi kit ma wel nyinggi tye kwede. Coo nying co ducu kun i kwanogi ki acel acel. 3Cake ki ikom jo ma ditogi romo mwaka pyere aryo dok kwede malo, jo Icrael ducu ma giromo cito kalweny.

4Dok wubikwanyo latela acel acel ki i kaka ducu ma bibedo ladit wi kaka ki i ot pa kwarone. 5Man aye nying lutela ki odi ma gin a ki iye ma gin bicung ka konyowu:

Jo pa Reuben: Elijur wod pa Cedeur. 6Jo pa Cimeon: Celumiel wod pa Juricadai. 7Jo pa Juda: Nakucon wod pa Aminadab. 8Jo pa Icakar: Netanel wod pa Juar. 9Jo pa Jabulon: Eliab wod pa Kelon. 10Jo ma a ki ikin awobe pa Yucepu, jo pa Epraim: Elicama wod pa Amikud, jo pa Manace: Gamaliel wod pa Pedajur. 11Jo pa Benjamin: Abidan wod pa Gideoni. 12Jo pa Dan: Akiejer wod pa Amicadai. 13Jo pa Acer: Pagiel wod pa Okran. 14Jo pa Gad: Eliacap wod pa Deuel. 15Jo pa Naputali: Akira wod pa Enan.” 16Man aye gin co ma kiyerogi ki ikin lwak, ma gin aye lutel wi kaka pa kwarigi, gin ludito ma i kaka pa jo Icrael.

17Ci Moses ki Aron gukwanyo jo meno ma dong kikwano nyinggi. 18Ikom nino mukwongo me dwe me aryo gucoko lwak ducu kacel. Gin gucoyo nying wadigi kun gilubu dogolagi ki dog odi pa kwarigi, cake ki ikom jo ma mwakagi romo pyere aryo dok kwede malo, 19kit macalo Rwot ociko ki Moses. Ci Moses okwano dano i tim Cinai.

20Jo pa Reuben; latin kayo pa Icrael, kikwano wel likwayone kun kicoyo nyinggi ki acel acel malubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 21wel jo ma i kaka pa Reuben oromo alip pyere angwen wiye abicel, ki miya abic.

22Jo pa Cimeon; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny; 23wel jo ma i kaka pa Cimeon oromo alip pyere abic wiye abongwen, ki miya adek.

24Jo pa Gad; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 25wel jo ma i kaka pa Gad oromo alip pyere angwen wiye abic, ki miya abicel ki pyere abic.

26Jo pa Juda; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 27wel jo ma i kaka pa Juda oromo alip pyere abiro wiye angwen, ki miya abicel.

28Jo pa Icakar; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 29wel jo ma i kaka pa Icakar oromo alip pyere abic wiye angwen, ki miya angwen.

30Jo pa Jabulon; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 31wel jo ma i kaka pa Jabulon oromo alip pyere abic wiye abiro, ki miya angwen.

32Jo pa Yucepu; ki tung bot Epraim, kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 33wel jo ma i kaka pa Epraim oromo alip pyere angwen, ki miya abic. 34Jo pa Manace; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 35wel jo ma i kaka pa Manace oromo alip pyere adek wiye aryo, ki miya aryo.

36Jo pa Benjamin; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 37wel jo ma i kaka pa Benjamin oromo alip pyere adek wiye abic, ki miya angwen.

38Jo pa Dan; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 39wel jo ma i kaka pa Dan oromo alip pyere abicel wiye aryo, ki miya abiro.

40Jo pa Acer; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 41wel jo ma i kaka pa Acer oromo alip pyere angwen wiye acel, ki miya abic.

42Jo pa Naputali; kikwano wel likwayone kun kicoyo nyinggi ki acel acel ma lubu dogolagi ki dog odi pa kwarogi, co ducu cake ki ikom jo ma mwakagi romo pyere aryo dok kwede malo, jo ducu ma giromo cito kalweny, 43wel jo ma i kaka pa Naputali oromo alip pyere abic wiye adek, ki miya angwen.

44Meno aye gin jo ma kikwano welgi, mayam Moses ki Aron okwanogi, kun lutel wi Icrael gukonyogi, jo apar wiye aryo, ma ngat acel acel ocung pi ot pa kwarone. 45Kitmeno wel jo Icrael ducu ma kikwano kun ki lubu odi pa kwarigi, nia ki ikom jo ma mwakagi romo pyere aryo dok kwede malo, jo Icrael ducu maromo cito kalweny, 46welgi ducu onongo oromo alip miya abicel ki adek, ki miya abic ki pyere abic nono.

Kiketo jo pa Levi kaloyo kema pa Lubanga

47Ento kaka pa Levi pe kikwano welgi ikin kaka mukeneni, 48pien onongo Rwot owaco ki Moses ni, 49“Pe ibikwano wel pa Levi ikin jo Icrael maromo cito ka lweny. 50Ento ibiketo jo pa Levi bibedo ludito maloyo tic i Kema me Rwate, wek gulo jamine ducu matye iye. Gin aye bitingo kema ki jami matye iye ducu, gibitic iye, dok gibiguru kema me butugi rumu kema pa Lubanga. 51Ka kare me kobo kema oromo, ci Lulevi aye gibiputune; ki dok Lulevi aye gibigurune. Kace dano mo ata onyiko cok ki kema, ci ki bineke woko. 52Jo Icrael gibiguru kemagi ki dog buca monygi, dano acel acel ki dog gonygi, ki dano acel acel ite benderane. 53Ento jo pa Levi gibiguru kemagi rumu kema lok me caden, wek akemo pa Rwot pe opot ikom lwak jo Icrael.” 54Ci jo Icrael gutimo kitmeno, gutiyo gin ducu kit ma onongo Rwot ociko ki Moses.