Lulevi 27

Cik ma mako gin ma kidyero bot Rwot

1Rwot owaco bot Moses ni, 2“Wac bot jo Icrael ni, ka dano mo okwongo kwong ma pire tek me dyero dano bot Rwot, ce ki mito koko dano meno, 3ci wel ma kingolo pi laco ma mwaka me dite romo pyere aryo oo wa ipyere abicel bibedo cekel me ryal pyere abic, ma kiporo ki lapim i wel ma kimoko. 4Kace dano meno ma kwong otiko obedo dako, ci ibingolo wel me cekel pyere adek. 5Ka mwaka me dite romo abic o wa ipyere aryo, ibingolo pi laco cekel pyere aryo, pi dako cekel apar. 6Kace dite romo dwe acel o wa i mwaka abic, ibingolo cekel me ryal abic pi laco, cekel me ryal adek pi nyako. 7Ka mwaka me dite romo pyere abicel nyo makato, ibingolo cekel apar wiye abic pi laco, pi dako apar. 8Kace dano mo lacan tutwal, ma pe twero miyo wel ma ingole, ci en bitero dano ma kikwongo pireni inyim ajwaka ci ajwaka aye bingole wel, kun lubu gin ma dano ma okwongo kwongu twero nongone.

9Kace kwong otiko lee mo ma kityero me bedo gityer bot Rwot, lee ducu ma kitmeno ma dano miyo bot Rwot bedo pa Rwot. 10En pe bilokone woko ki gin mukene, nyo gwenyo loko ki wadi mo, mabere ki marace, nyo marace ki mabere; nyo ka en oloko lee mo ki lee wadi, ci gin aryo ducu ma kilokogini gibibedo pa Rwot. 11Kace obedo lee mo ma keni, ma pe kityero me bedo gityer bot Rwot, ci dano meno bitero leenu inyim ajwaka. 12Ajwaka bingolo wele, kadi leenu ber kadi rac; macalo ajwaka ongolo wele, ci bicung kitmeno. 13Ento ka en mito kokone woko, en bimedo acel me abic ikom wele.

14Ka dano mo odyero ode obed maleng bot Rwot, ci ajwaka bingolo wele, ka ber ka rac; ka ajwaka ongolo wele, ci bicung kitmeno. 15Kace ngat ma odyero odeni mito kokone woko, en bimedo acel me abic ikom wele ci bidok bote.

16Ka dano mo odyero but lobone bot Rwot ki ikom lobo ma oleyo ki bot kwarone, ci ibingolo wele kun poro kodi ma kitwero coyo iye; ka romo coyo iye kodi cayiri guniya aryo, kibingolo iye cekel me ryal pyere abic. 17Ka en odyero potone i mwaka me jubili, ci bicung iwel kikome ma kingolo. 18Ento ka odyero potone lacen inge jubili, ajwaka bingolo wel lim ma myero kicul iye kun poro wel mwaka ma pud odong nio i mwaka me jubili, ci wel mayam kingoloni kibidwoko piny. 19Kace dano ma odyero potoni mito kokone woko, en bimedo acel me abic ikom wele, ci poto bidok bote. 20Ento ka en pe okoko potonu, nyo ka en dok ocato poto woko bot dano mukene, pe dong kibikokone matwal. 21Poto meno ka kigonyo i jubili bibedo maleng pi Rwot, macalo poto ma kidyero matwal; ci ajwaka aye dong bibedo rwode.

22Ka odyero poto mo ma owilo awila bot Rwot, ma pe dul lobo ma oleyo ki bot kwarone, 23ci ajwaka bingolo wele nio i mwaka me jubili, ci danoni bimiyo wel ma kingolo inino meno wek obed maleng pi Rwot. 24Ci i mwaka me jubili poto bidok i cing ngat mayam ki wilo ki boteni, en ngat ma potonu obedo mere kun oleyo ki bot kwarone. 25Wel ducu ma kingolo bilubu ki lapim i wel ma kimoko.

26Ento lutino kayo pa lee, dano pe twero dyero, pien lutino kayo ducu gibedo pa Rwot; kadi bed twon nyo romo, meno pa Rwot gire. 27Ka lee ma keni, en biwilone ki boti iwel ma kingolo, kun medo acel me abic iwiye; nyo ka pe kikoko, kibicatone acata iwel ma kingolo. 281

Ento gin ducu ma onongo kidyero i cing Rwot matwal, kadi bed dano nyo lee nyo poto ma oleyo ki bot kwarone, pe kibicato dok pe kibikokone. Gin ducu ma kidyero i cing Rwot matwal bedo gin maleng makato pi Rwot. 29Dano moni ma kidyero i cing Rwot matwal, ma myero kinek woko ki ikin dano, pe kitwero kokone; kibineke woko aneka. 302

Acel me apar ducu ma oa i lobo, kadi bed kodi ma ocek i poto nyo nyig yat ma onyak, meno jami pa Rwot gire, gin maleng pa Rwot. 31Ka dano mo mito koko gin mo ikom gin me apare, en bimedo dul acel me abic iwiye. 32Dul acel me apar pa dyangi ki romi nyo dyegi ducu, lee me apare ducu ikin lee ducu makato ite odo pa lakwat, meno bibedo maleng pi Rwot. 33Rwode pe bipenyo ka ber nyo rac, dok pe bikoko kun gwenyo ki wadi mo; ka kiloko, ci gin aryo ducu ma kilokogini gibibedo pi Rwot; pe kibikokogi akoka.”

34Magi aye cik mayam Rwot ociko ki Moses pi jo Icrael ki iwi got Cinai.