Lulevi 26

Gum ma bino pi gwoko cik

(Nwo 7:12-24; 28:1-14)

11

“Pe wutim cal lubanga mo keken pirwu, pe wucib cal apaya nyo wir jok mo, pe wucib got mo ma kigoro kome ocung i lobowu pi ryebe inyime, pien An a Rwot Lubangawu. 2Wubigwoko ceng Cabita dok wubiworo ot mera maleng; An a Rwot. 32

Kace wubibedo ma wulubu cika kun wugwoko gin ma aciko ducu wucobo kakare, 4ci abimiyo kot bicwer i karene kikome, lobo biceko cam, ki yadi ma i poto bene binyako nyiggi. 5Camwu bicek atika ma bimiyo kare me kac biromo ki kare me pwono nyig olok, dok pwono nyig olok bene biromo ki kare me coyo kodi. Wubicamo cam romowu dok dong, wubibedo i lobowu ma piny okwe mot. 6Abimiyo kuc bedo i lobo, wubibutu piny dok dano ma bimiyowu lworo bibedo peke. Abikwanyo nguu woko ki i lobo dok mony mo pe bibedo i lobowu. 7Wubiryemo lumerok mewu, ci wubinekogi woko. 8Jo abic ki ikomwu biryemo jo miya kulu, jo miya ki ikomwu biryemo jo alip apar; wubineko lumerokwu ducu. 9Abiparo pirwu, abimiyo wunywal, wunya, dok abimoko gicikena kwedwu. 10Wubicamo cam macon i derowu pi kare malac, wubionyo macone woko wek kabedo odong pi manyene. 11Abiyubu kabedona ikinwu, tipu koma pe bikwerowu. 123Abibedo kawot ikinwu, abibedo Lubangawu, wun bene wubibedo jona. 13An a Rwot Lubangawu mayam akwanyowu ki i lobo Ejipt wek pe wubed opiigi; aturu rii okol ma kiriyo ingutwu, amiyowu wutire, wuwoto atir.

Pwod pi dingo me turu cik

(Nwo 28:15-68)

14Ento ka pe wubiwinya, ka pe wubilubu cik magi ducu ma aketoni, 15kace wucayo cika, ce iwu okwero gin ma angolo, mamiyo pe wubicobo gin ma aciko ducu, ento wuturu gicikena, 16ci abitimowu kit man: abimiyo lworo poto ikomwu atura, ki kwayi two ma pe cang ma coro wangwu kun balo komwu woko. Dok wubicoyo kodiwu me nono, pien lumerokwu bicamone woko. 17Abikwerowu, merok bigoyowu ki inyimgi; jo ma gidagwu aye gibiloyowu; dok wubiringo ata ma kun ngat mo pe ma ryemo korwu. 18Ka pe wuwinyo loka kadi bed atimo kumeno, ci abimede ki keto can ikomwu tyen abiro pi balwu. 19Abituro tek me wakewu woko, kot pe bicwer i lobowu, miyo lobo bital matek liking calo nyonyo. 20Wubitiyo tic matek nono pien lobowu pe biceko cam, ki yadi bene pe gibinyako nyiggi.

21Ka wun wuketo jemo ikoma, ma pe wuwinyo loka, ci abimede ki kelo two matego ikomwu, maromo lwak balwu tyen abiro. 22Dok abicwalo nguu me tim ikinwu, ma bimako lutinowu, ma bityeko lim makwo ma i cingwu, ci bijwikowu wudoko jo manok, wa yoowu birido woko bidoko obur.

23Ka pe wujuke, wudwogo bota pi kit can meno, kun pud wuketo jemo ikoma aye, 24ci an bene abikemowu marac, kun an ki koma aye abipwodowu tyen abiro pi balwu. 25Abikelo mony ikomwu me pwodowu pi turu gicikena. Ka wugure i gangwu, ci abicwalo two gemo magwa ikinwu, ci gibimiyowu i cing lumerokwu. 26Abikwanyo cam ma wukwo kwede woko, ci weko mon apar gibitedo mugatiwu i keno acel, dok gibipokiwu mugati kun gipimo botwu apima; ka wubicamo, ci pe biyengowu.

27Ento ka inge magi ducu pe wuwinyo loka, ce pud wumede ki jemo ikoma, 28ci an bene abikeme kwedwu malyet, kun anyayo can ikomwu tyen abiro pi balwu. 29Wubicamo ringo kom lutino awobewu ki ringo kom anyirawu. 30Abituro ka woro jogiwu ma iwi godi, abitongo keno tyerwu ma wuwango iye odok ma ngwece kur, kun abolo komwu ma oto ikom cal lubangawu, ci tipu koma bikwerowu woko. 31Abijwero taunwu madito woko ducu, abimiyo kabedowu ducu maleng dong nono, dok pe abijolo gityer awangawu ma wubityero bota. 32Abibalo lobowu woko, wek lumerokwu ma bibedo iye gubed ki ur pire. 33Abikelo mony ikomwu, abiketowu woko ata ikin lurok. Lobowu bidong nono, dok taunwu madito bene bidong obur.

34Ikare meno lobo binongo yweyo ma oromo pi mwaka ducu ma wubibedo peke iye ma nongo wutye i lobo pa lumerokwu; kun nongo tye kakwero karene me yweyo mot macalo i mwaka me yweyo. 35Pi kare ducu ma nongo lobo pud odong nononi, lobo biywe pien wun yam pe wumiyo lobo oywe ikare ma onongo wun wubedo iye. 36Jo ma ikinwu ma bidong makwo i lobo ma lumerokwu biterowu iyeni, abicwalo lworo i cwinygi miyo gibiringo dwon pot oboke keken ma yamo yengo. Gibiringo macalo ngat ma ringo mony, ci gibipoto piny kun ngat mo pe ma ryemo korgi. 37Gibiyoke keken gi ngat man ikom lawote, macalo giringo ngat ma otingo pala lucwan me lweny, kadi bed ngat mo peke ma ryemo korgi, dok pe wubibedo ki twero me cung inyim lumerokwu. 38Wubitum woko ki ikin lurok, lobo pa lumerokwu bicamo komwu woko ducu. 39Jo ma ikinwu ma bidong, komgi bilwal woko i lobo pa lumerokwu pi bal megi, ki pi bal pa kwarogi bene.

40Ento ka gibitucu balgi ki bal pa kwarogi pi tim roro ma gutimo ikoma, ma gujemo kwede ikoma, 41ma omiyo an bene akemogi marac kun aterogi i lobo pa lumerokgi; ka gugiko jemo i cwinygi, ci gudoko mwol ma guye pwod pi balgi, 424ka dong abipo pi gicikena ma acike ki Yakobo ki ma acike ki Icaka ki gicikena ma acike ki Abraim, ka dok abiroco gicikena me miyo lobo bot jona. 43Ento lobo kong bidong nono wek kong oywe mot ma dano pe iye. Ci gibiculu ka wang balgi, pien gubedo kacayo gin ma aciko, dok gukwero lubu cika. 44Ento kadi bed kumeno, ka pud nongo gitye i lobo pa lumerokgi, pe abijalogi, dok tipu koma pe bikwerogi maromo miyo atyekogi woko liweng kun aturu gicikena kwedgi, pien An a Rwot Lubangagi. 45Pi gin, abipo pi gicikena ma acike ki kwarogi mayam akwanyogi woko ki i lobo Ejipt ma rok ducu gineno, wek abed Lubangagi. An a Rwot.”

46Magi aye cik ki gin ma Rwot ongolo, ki cik ma en oketo ikin en ki jo Icrael iwi got Cinai ki i dog Moses.