Lulevi 25

Mwaka me yweyo

11

Rwot owaco bot Moses iwi got Cinai ni, 2“Wac bot jo Icrael ni, ka dong wuo i lobo ma abimiyowuni, wubimiyo woro bot Rwot kun wuweko lobo biywe i mwaka me abirone ma pe kipuru. 3Wubicoyo kodi i potiwu mwaka abicel, wubingolo kin jang olokwu mwaka abicel, wubicoko nyige; 4ento mwaka me abirone en aye wubiweko lobo ywe mot ma pe kipuru iye pur mo, man aye mwaka ma kidyero bot Rwot; pe wubicoyo kodi i potiwu, pe wubingolo kin jang olokwu. 5Gin ma otwi kene i okang pe wubikayo, pe wubicoko nyig olokwu ma pe wungolo kin jange; bibedo mwaka ma lobo ywe iye mot. 6Ento wutwero camo gin mo keken ma dongo kene, in, ki opiini, ki angecani, ki lapakacani ki labedo ma bedo boti. 7Pi lee mewu bene, ki pi lee tim ducu ma gitye i lobowu, gin ma cek iye ducu bedo me acamagi.

8Dok ibikwano mwaka abiro tyen abiro; ci biromo mwaka pyere angwen wiye abongwen. 9Ci ikom nino dwe apar me dwe me abiro; inino me kwanyo bal en aye wubimiyo gwara kok romo lobowu ducu. 10Wubikwero mwaka me pyere abice obed maleng, wubitito ni jo ducu gitye agonya i lobo mewu, man aye bibedo kare me jubili, ma nongo ngom ducu ma kijengo kidwoko cen bot rwode ki ngat mo ducu ma ikinwu ma onongo kicato i opii bidok idogolagi. 11Mwaka me pyere abice aye bibedo jubili mewu; pe wubicoyo iye kodi, pe wubikayo gin ma otwi kene, pe wubicoko nyig olok ma pe wungolo kin jange. 12Pien obedo jubili, bibedo maleng botwu; wubicamo gin ma ocek pire kene.

13I mwaka man me jubilini ngat acel acel ikinwu bidok i dul lobone. 14Ka icato lobo mo, nyo ka i wilo lobo mo ki bot Laicrael lawoti, pe wubed ka bune kekenwu. 15Ka i wilo ki bot lawoti, wele biporo wel mwaka ma olubu jubili; en bicato boti kun poro wel mwaka ma ibinongo iye cam. 16Ka mwaka pud odong mapol, ibimedo wel ma iculu, ka mwaka dong odong manok, ci ibidwoko wele piny, pien gin ma en tye kacato boti en aye mwaka me cam ma bia iye. 17Pe wubune kekenwu, ento wulwor Lubangawu; pien An a Rwot Lubangawu.

18Pimeno wubilubu cika, wubigwoko gin ma angolo, wubicobone, wek wubed ma lobo okwe mot. 19Pien lobo biceko cam, wubicamo, wubiyeng kwede, ci wubibedo ma piny okwe mot. 20Kace wubiwaco ni, ‘Wabicamo gin ango mono i mwaka me abironu, kace pe wacoyo kodi, dok pe wacoko camwa ma a iye?’ 21An abimiyo guma poto ikomwu i mwaka me abicele, wek onyak nyige maromo pi mwaka aryo kulu. 22Ka wucoyo kodi i potowu i mwaka me aborone, nongo pud wutye kacamo cam macon ca; nio wa i mwaka me abongwen ikare ma cam dong ocek, kikayo, nongo pud wucamo en macon ca. 23Lobo pe kibicato me atera woko matwal, pien lobona gira; pien wun wuwelo, dok wun lubedona. 24I lobo ducu ma bibedo mewu wubiye ni rwod ngom okok ngome ma ceng ocatoni.

25Kace omeru odoko lacan, ce ocato ngome mo ci watgi macok aye ma bibino kakoko ngome meno ma omine ocato wokoni. 26Ka dano meno pe tye ki watgi mo matwero kokone, ce en kikome odoko lalonyo, ka onongo gin maromo kokone, 27wek en okwan wel mwaka nia ikare ma ocato, ci ocul dano mayam owiloni wel ma pud odong ca me o i mwaka me jubili, ci ngome bidok i cinge. 28Ento ka pe tye ki lim maromo dwokone i cinge, ci ngom ma ocatoni bidong i cing lawilone nio ka mwaka me jubili oromo; kibidwoko ngome ikare me jubili, bidok i cinge.

29Ka dano mo ocato ode matye i taun madit ma kicelo ki cel, en twero kokone ma peya mwaka acel oromo; bibedo ki twer me kokone kadi pi mwaka kulu. 30Ento ka ot meno pe kikoko ikine ma peya mwaka acel oromo, ci dong bibedo pa ngat ma owiloni matwal, wa ikare pa likwayone ducu; pe kibidwoko cen ikare me jubili. 31Ento odi ma i caro ata ma pe kicelo ki cel ma orumugi kibikwanogi kacel ki poti ma i caro; kitwero kokogi, dok kibidwokogi cen ikare me jubili.

32Lulevi gitye ki twero me koko gangi ma kimiyogi me bedo megi ikare ducu. 33Kace ngat mo ikin Lulevi ocato ot mo ma i taun ma kimiyo me bedogi, ce pe kikoko, ci ot ma kicatoni bidok bot rwode ikare me jubili, pien odi ma i taun pa Lulevi obedo jami ma meggi matwal ma kimiyo botgi ikin jo Icrael. 34Ento olet ma orumu gangi megi pe kicato; meno lobogi matwal. 352

Kace omeru ma bedo ka ngeti odoko lacan ma pe twero konye kekene, in ibikonye; en bibedo boti macalo weloni nyo labedo. 36Pe igam lim mo me magoba dok pe imed wel bot Laicrael mo, ento lwor Lubangani, wek omeru obed kwo ki ka ngeti. 373Pe ibimiyo en mako banya boti wek inong iye magoba, pe imiye cam wek odwok boti kun medo wiye. 38An a Rwot Lubangawu mayam akwanyowu ki i lobo Ejipt me miyo botwu lobo Kanaan, wek abed Lubangawu. 394

Ka omeru ma bedo ka ngeti odoko lacan, ci ocate boti kekene, pe ibimiyo en tiyo boti macalo opii. 40En bibedo boti macalo lapakaca nyo labedo. En bitic boti nio wa i mwaka me jubili. 41Ka lacen en bia woko ki boti, en kacel ki lutinone bene. Bidok cen idogolane, bidok i lobo pa kwarogi. 42Pien gin lutica mayam akwanyogi woko ki i lobo Ejipt; pe kibicatogi me bedo opii. 43Pe wubiloyogi ki loc magwa, ento wubilworo Lubangawu.

44Ka wumito opii ki angeca; wutwero wilogi ki bot lurok ma orumu ka ngetwuni. 45Wutwero wilo ki ikin lubedo ma bedo botwu, dok ki ikin dogolagi ma bedo botwu, ma kinywalogi i lobowu; gibidoko limwu. 46Wutwero miyogi bot lutino awobewu ma bilubuwu, gubed ginaleyagi. Wutwero miyogi gibedo opiiwu, ento omegiwu ma jo Icrael pe wubiloyogi kitmeno kun ngat man loyo wadi ki loc magwa.

47Ka welo mo nyo labedo mo matye boti odoko lalonyo, kun omeru matye ka ngete odoko lacan, ci ocate kekene bot welo nyo labedo matye botini, nyo ocate bot wat ma i dogola pa welo meno, 48ka dong otyeko cate, ci kitwero koko; ngat mo ma ikin omege twero koke woko. 49Nyo omin wone nyo latin pa omin wone twero koke, nyo watgi mo ma idogolagi twero koke; nyo ka en odoko lalonyo, ci koke gire kene. 50En bikwano wel kacel ki ngat ma con owilenu, kun cako i mwaka mayam owile iye nio wa i jubili, wel me koke bibedo ma poro wel mwaka; kare ma en obedo kwede bot rwode kibikwano macalo kare pa lapakaca. 51Kace mwaka pud odong mapol me o i jubili, en biculu lim me koke, kun lube ki wel lim mayam ki wile kwede. 52Ka pud odong mwaka manok me o i mwaka me jubili, en bikwano wel ki dano ma owilenu; ci biculu lim me koke ma oporo wel mwaka me tice ma pud odong. 53En bibedo bot rwode macalo lapakaca ma kiculu mwaka ki mwaka; pe rwode ma labedoni biloye ki loc magwa kun in ineno. 54Kace pe gikoke ikit yo meno, ci kibigonye i mwaka me jubili, en kacel ki lutinone bene. 55Pien jo Icrael gin aye lutica mayam akwanyogi woko ki i lobo Ejipt. An a Rwot Lubangawu.”