Wel 21

Jo Kanaan gulwenyo ikom jo Icrael

11

Ka rwot me Arad, ma en Lakanaan ma bedo i Negeb, owinyo ni jo Icrael gitye kabino ki i yoo Atarim, ci olwenyo ikomgi, ci oyako jo mogo woko ki ikin gi. 2Ci jo Icrael gukwongo kwong bot Rwot kun giwaco ni, “Ka ibimiyo jo man i cingwa ada, ci wan wabidyerogi i cingi, wabijwero taun gi madito woko liweng.” 3Ci Rwot owinyo lega pa jo Icrael, omiyo guloyo Lukanaan, gudyerogi i cing Rwot kacel ki taun gi madito. Gujwero woko; ma omiyo nying kabedo meno kilwongo ni Korma.

Cal twol ma kiteto ki mola

42

Jo Icrael gua ki ite got Kor, gucako lubu yoo ma cito i Nam Makwar, kun girabo lobo Edom. Ci cwiny dano obale woko ikare ma gin tye i yo. 53Ci gucako loko lok marac ikom Lubanga ki ikom Moses kun giwaco ni, “Pingo wukwanyowa woko ki i Ejipt wek wato i tim? Cam peke, pii bene peke, cwinywa ocido woko ki cam ma konye pekeni.” 6Ci Rwot ocwalo twol ma kwirgi kec ikom lwak, ci gucako tongo dano; jo Icrael oto mapol. 7Dano gubino bot Moses, ci guwaco ni, “Dong watyeko balo, pien waloko lok akeca ikom Rwot ki ikomi. Leg Rwot wek okwany twol woko ki ikinwa.” Ci Moses olego pi lwak. 8Rwot owaco ki Moses ni, “Tet cal twol ma kwire keci, ci iket ingab malo ikom tal; ci dano ducu ma twol otongo, ka oneno kome, ci bedo kwo.” 94Kitmeno Moses oteto cal twol mola, ongabo malo iwi tal; ci ka twol otongo dano mo en neno kom cal twol mola, ci kwo.

Jo Icrael gurabo lobo Moab

10Jo Icrael gucako wot, ci gugony i Obot. 11Dok gua woko ki i Obot, ci gugony i Iye-Abarim, i tim ma okemo Moab, tung kunyango. 12Ka dok gua ki kunu, gumedo ki wot, ci gugony i nota me Jered. 13Gua ki kunu, gumedo wot, ci gugony loka kulu Arnon, matye i dye tim, ma oa wa iwang lobo pa jo Amor, Arnon en aye wang lobo pa jo Moab, ma ikin Moab ki jo Amor. 14En aye ma omiyo kitito pi kabedo magi i Buk me Lweny pa Rwot ni, “Wakeb ma i Cupa, ki nota me Arnon ducu, 15ki lung me nota mapol ma oyare nio wa ikabedo ma kilwongo ni Ar, ma ojenge wa iwang lobo me Moab.”

16Gua ki kunu, gubino i Beer.5 En aye wang it mayam Rwot owaco ki Moses ni, “Cok lwak kacel, wek amii pii botgi.” 17Ikare meno jo Icrael guwero wer man ni,

“Gunye malo, in wang it!

Wakori ki wer!

18Man wang it ma luker gukwinyo,

ma gin twoni pa lwak,

gugolo matut ki tal ker,

ki odoogi.”

Ka dok gua i dye tim, gucito i Matana, 19nia i Matana gucito Nakaliel, ki nia ki kunu gucito Bamot. 20Nia ki kunu gucito i nota ma otonge i lobo Moab, ite lacol got Piciga, ma neno piny tung tim aroo.

Jo Icrael guloyo Cikon rwot pa jo Amor

(Nwo 2:26—3:11)

21Jo Icrael gucwalo lukwena bot Cikon, rwot pa jo Amor, ma guwaco ni, 22“Ber iwek wawok ki i lobowu, pe wabingak wawok ki i poto mo, nyo i poto olok, pe wabimato pii ma iwang it. Wabimol ma walubu gudu pa Rwot maditi nio ka wawok wakato wang lobowu.” 23Ento Cikon pe oye ni jo Icrael guwok ki i lobone. Ocoko jone ducu, ogurugi kacel, ci ocito kalweny ikom jo Icrael i tim. Ka guo i Jakaj, ci gucako lweny ikom jo Icrael. 24Ento jo Icrael guneko jone mapol ki pala lucwan, ci gucamo lobogi cake ki i kulu Arnon nio kwede wa i Jajer matye iwang lobo pa jo Ammon. 25Jo Icrael gumako taun madito ducu pa jo Amor, ci gucako bedo iye, i Kecbon ki i taun matino ducu ma i ngete. 26Kecbon onongo obedo taun madit ma gangkal pa Cikon rwot pa jo Arnon tye iye. Cikon yam con kong olwenyo ikom rwot pa jo Moab ci okwanyo lobone woko ducu ki i cinge nio wa i Arnon. 27Ma omiyo lurut wer lwod guwaco ni,

“Wubin i Kecbon, i gangkal pa Cikon!

Wek kiger odoco, kiyub ocung matek.

28Pien mony pa Cikon yam oa ki i taun madit me Kecbon ci obalo piny macalo mac,

ma lyel matek ci obalo Ar taun madit pa jo Moab,

ki gin ducu matye iwi godi me Arnon.

29Can madwong opoto ikomi, in Moab!

Wuto wutum woko do, wun lwak pa Kemoc!

Jok Kemoc omiyo awobene guringo gularo komgi,

oweko anyirane kiyako kitero i cing Cikon rwot pa jo Amor.

30Kitmeno kityeko likwayogi woko nia ki i Kecbon nio wa i Dibon.

Wajwero piny woko nio ka mac omede naka wa i Medeba.”

Jo Icrael guloyo Og rwot me Bacan

(Nwo 3:1-11)

31Kitmeno jo Icrael gubedo i lobo pa jo Amor. 32Ka dok Moses ocwalo dano ka roto yoo maber ma omyero kimak ki Jajer. Gumako taun gi matino ma i ngete, ci guryemo jo Amor ma gibedo kunu. 33Ka guloke, gudok tung Bacan. Ci Og rwot me Bacan ocore kalweny ikomgi, en ki lwake ducu, ci lweny ogeto i Edrei. 34Ento Rwot owaco bot Moses ni, “Pe ilwore; pien atyeko miyo en i cingi, en ki lwake ducu, ki lobogi bene. Ibitimo en kit ma itimo Cikon rwot pa jo Amor mayam obedo Kecbon.” 35Kitmeno jo Icrael guneko Og ki awobene ducu, gujwero lwake ducu ma ngat acel mo pe odong ma obwot makwo; ci gucamo lobogi woko.