Wel 22

Balak ocwalo lukwena kalwongo Balaam

1Jo Icrael dok gucako wot ci guguru kemagi i lobo aroo me Moab loka Jordan mukemo Jeriko. 2Balak wod pa Jipor oneno gin ducu ma jo Icrael gutimo ikom jo Amor. 3En kacel ki jo Moab gubedo ki lworo madwong ikom jo Icrael, pien onongo gipol mada, ma omiyo lworo oloco kom jo Moab woko. 4Ci jo Moab owaco ki ludongo pa jo Midian ni, “Lwak jo man gibijwerowa woko kacel ki gin ducu ma orumuwa, macalo twon dyang ma camo lum ki i bar tyeko woko.” Pimeno Balak wod pa Jipor ma onongo obedo rwot me Moab ikare meno, 51ocwalo lukwena bot Balaam wod pa Beor i Petor macok ki kulu Euprate i lobo Amau ka lwonge kun waco ni, “Nen, rok mo obino ma oa ki i Ejipt, oumu lobo woko lipuk; kombedi dong gitye ma okemo an. 6Tim ber ibin icen jo meno woko pira, pien gitek makato an woko. Gwok onyo miyo abitwero loyogi ci aryemogi woko ki i lobo kany; pien angeyo ni ngat ma ilego gum ikome, kome bedo gum, ki ngat ma iceno nongo dong kiceno.”

7Kitmeno ludongo me Moab ki ludongo me Midian guwoto ki lim me tyet i cinggi. Gin gucito bot Balaam, ci gutite kwena ma Balak ocwalo. 8Ci Balaam owaco ki gin ni, “Tin wubut kany, ci abidwoko lok botwu gin ma Rwot biloko bota.” Kitmeno ludito pa jo Moab gubedo bot Balaam. 9Ci Lubanga obino bot Balaam, owaco ni, “Jo mene ma gin tye boti ni?” 10Ci Balaam owaco ki Lubanga ni, “Balak wod pa Jipor, ma rwot me Moab, en aye ocwala kwena ma kun waco ni, 11‘Nen, rok mo obino ma oa ki i Ejipt, ma oumu lobo woko lipuk. Tim ber ibin wek icen jo meno woko pira; miyo gwok onyo abitwero lweny kwedgi ci aryemogi woko.’” 12Ento Lubanga owaco ki Balaam ni, “In pe ibiwot kwedgi; pe ibiceno jo meno, pien gin jo ma kimiyogi gum wacon.” 13Ka Balaam oa malo odiko, ci owaco ki ludito pa Balak ni, “Wudok giwu i lobowu; pien Rwot otyeko kwero ni pe acit kwedwu.” 14Ma omiyo ludito pa jo Moab gua gudok bot Balak, guwaco ni. “Balaam okwero bino kwedwa woko.”

15Ento Balak dok omede ki cwalo ludito mapol, ki dano ma gigene makato jo ma okwongo ca. 16Gin gucito bot Balaam, guwaco bote ni, “Balak wod pa Jipor owaco kuman ni, ‘Pe iwek gin mo ogengi bino bota; 17pien ada abiketi ideyo madit, dok gin ducu ma ibiwaca abitiyo.’” 18Ento Balaam odok iye ki lutic pa Balak ni, “Kadi bed Balak onongo omiya ryal ki jabu ducu ma i ode, pe atwero kalo wi cik pa Rwot Lubangana pi tiyo gin mo ma tidi nyo madit. 19Dong alegowu ni wun bene tin wubed kany wek ange gin ma Rwot dok biwaca.” 20Ci Lubanga obino bot Balaam i dyewor meno owaco bote ni, “Ka jo meno obino kalwongi, ci ia malo icit kwedgi ento gin ma aciko boti aye ibitiyone.”

Balaam ki kanane

21Kitmeno Balaam oa malo odiko con, otweyo del kom kanane, ocito ki ludito pa jo Moab. 22Ento kiniga omako Lubanga pi citone; ci lamalaika pa Rwot ocung woko i yoo macalo lameroke. Balaam onongo oito iwi kana, ki lutice aryo onongo gin tye kwede. 23Ka kana oneno lamalaika pa Rwot kun ocung i dye gudu, kun nongo owoto pala lucwane, omako i cinge, ci kana oloke, oa woko ki i gudu, ocito i poto. Balaam ogoyo kana omiyo odok woko i yoo. 24Ci lamalaika dok ocung i yoo kamading ma ikin poto olok ma kigengo ki cel got tungi ki tungi. 25Ka dok kana oneno lamalaika pa Rwot, ci oyoke ki cel got, odiyo tyen Balaam ikom cel, omiyo en dok ogoye aye. 26Ka dok lamalaika pa Rwot omede ki wot anyim ci ocung i apiding ma kaweyo peke tung lacuc nyo tung lacam. 27Ka kana oneno lamalaika pa Rwot, obutu woko piny katyen Balaam, ci kiniga omako Balaam, ogoyo kana ki odoone. 28Ka dong Rwot oyabo dog kana ci owaco bot Balaam ni, “An atimo gin ango ikomi ma omiyo igoya tyen adek kuluni?” 29Ci Balaam owaco ki kana ni, “Pien ibedo kanywara. Kono onongo atye ki pala i cinga, kono aneki kwede woko cut.” 30Ci kana owaco ki Balaam ni, “An pe akanani ma ibedo ikoma kare me kwoni ducu nio wa onyo? Onongo yam kong anyebe katimo kit man ikomi?” Ci en ogamo ni, “Pe.”

31Lacen Rwot oyabo wang Balaam, ci oneno lamalaika pa Rwot ka ocung i dye yoo ma omako pala lucwan i cinge; ci Balaam okulu wiye piny, opoto piny aryeba cwiny. 32Lamalaika pa Rwot owaco bote ni, “Pingo igoyo kanani tyen adek kulu? Nen, an abino anyim ka juki, pien woti akakani pe oyomo cwinya. 33Kana onena ci oloke oa woko ki inyima tyen adek kulu. Kono en pe onongo oloke oa woko ki bota, kono onongo dong aneki woko tin ada, kun aweko en makwo.” 34Ci Balaam owaco bot lamalaika pa Rwot ni, “Dong abalo, pien onongo pe angeyo ni icung i yoo pi lweny ikoma. Piman kace atime marac ma pe ipwoyo wota man, ci abidok gira cen ki ngeya.” 35Ento lamalaika pa Rwot ogamo dog Balaam ni, “In dong icit ki jo meno; ento gin ma aciki aye ibiloko.” Pimeno Balaam omede ki wot kacel ki ludito pa Balak.

Balak ojolo Balaam

36Ka Balak owinyo ni Balaam dong obino, ci ocito karomo kwede i Ar taun madit me Moab ma iwang lobo ma kulu Arnon opoko. 37Ci Balak owaco bot Balaam ni. “An yam pe acwalo kwena ka lwongi? Pingo pe nene ibino bota? Onongo itamoni pe atwero keto deyo ikomi?”

38Ci Balaam ogamo ni, “Nen dong abino boti. Kombedi an atye ki twero ango me loko gin mo boti? Lok ma Rwot biketo idoga, en aye myero aloki.” 39Balaam ocito gin ki Balak, ci gucito i Kiriat-kujot. 40Ka Balak ocako tumu twoni ki romi opoko ringo ocwalo bot Balaam ki ludito mayam gitye kwede.

Lok me nebi pa Balaam mukwongo

41Orwone Balak otero Balaam ocito kwede malo wa i Bamot-Baal, ci Balaam oneno jo Icrael ma gitye cok ki kunu.