Wel 23

1Balaam owaco bot Balak ni, “Ber icana keno tyer abiro kany, ci ikela twoni abiro ki romi bene abiro.” 2Balak otiyo kit ma Balaam ocikoni; ci Balak ki Balaam gubedo katyero twon acel ki nyok romo acel iwi keno tyer ki acel acel. 3Ci Balaam owaco bot Balak ni, “Cung kany inget gitum awangani, ci an abicito kunu. Gwok onyo Rwot bibino ka rwate kweda, ci gin ducu ma en binyuta abitito ki in.” Ci ocito malo iwi got kama yadi pe iye.

4Ci Lubanga orwate ki Balaam. Balaam owaco bote ni, “Dong atyeko yubu keno tyer abiro, dok atyero twon acel ki nyok romo acel iwi keno tyer ki acel acel.”

5Ci Rwot oketo loke i dog Balaam kun waco bote ni, “Dok cen bot Balak ci iwace kit man.” 6Balam odok cen ci onongo Balak pud ocung kanget gitum awangane kacel ki ludito pa jo Moab ducu. 7Balaam ocako loke kun loko macalo lanebi. Owaco ni,

“Balak okela ki i Aram,

rwot me Moab ooma ki iwi godi matye tung kunyango kun waconi:

‘Bin wek icena jo pa Yakobo.

Bin wek icena jo Icrael!’

8Ento abiceno ningning jo ma Lubanga pe oceno?

Acenogi ningning ka Rwot pe ocenogi?

9Anenogi ki iwi pata got mabor,

abedo kanenogi ki iwi cere.

Nen, gin lwak ma gibedo kaken gi,

pe giribe kacel ki rok mukene ducu.

10Anga ma kwano jo pa Yakobo ma gipol macalo apwani?

Anga ma kwano jo Icrael ma gipol mada kit man ni?

Wek an ato kit to pa joni ma kitgi atiri!

Agiki kwona obed macalo meggi!”

11Ci Balak owaco ki Balaam ni, “Gin ango ma dong itimo tung bota? Akeli kany kaceno lumeroka, ci nen, in dok ilamo gum ikomgi keken.” 12Ento Balaam odok iye ni, “Omyero an pe agwoke kaloko gin ma Rwot oketo idoga?”

Lok me nebi me aryo pa Balaam

13Balak dok owaco bote ni, “Bin dong kweda i kabedo mukene kama iromo nenogi iye. Ibineno jo ma gitye cok keken, pe ibinenogi ducu; ci icengi pira ki kunu.” 14Ci otere i poto pa Jopim wa i lacol got Piciga. Ocano keno tyer abiro kunu, ci otyero twon acel ki nyok romo acel iwi keno tyer ki acel acel. 15Ci Balaam owaco bot Balak ni, “Cung kany kanget gitum awangani, kun an arwate ki Rwot kuca.” 16Ci Rwot orwate ki Balaam, oketo lok idoge kun waco ni, “Dok cen bot Balak, ci iwace kit man.” 17Ci Balaam odok bote ci onongo Balak pud ocung kanget gitum awangane ki ludito pa jo Moab kacel kwede. Balak openye ni, “Rwot dong oloko ningo?” 18Balaam ocako loke kun loko macalo lanebi. Owaco ni,

“A malo, Balak, ci iwiny;

winy an ya, in wod pa Jipor.

19Lubanga pe dano, matwero loko goba;

Lubanga pe wod pa dano, maloko tame.

Ka dong owaco lok mo, ci pe bitiyone?

Ka en oloko, ci pe cobe kakare?

20Nen ya, alimo cik me miyo gum;

ka Lubanga omiyo gum, pe atwero dwokone cen.

21Pe aneno can mo ma bipoto ikom Yakobo;

pe aneno aroma mo ma bibedo bot jo Icrael.

Rwot Lubangagi tye kwedgi,

awinyo ka gin dange kajolo rwotgi.

22Lubanga okwanyogi ki i Ejipt,

kerone calo kero pa jubi.

23Kit jok mo peke maloko can ikom Yakobo,

kit gin tyet mo peke ma mako kom Icrael.

Koni dong gibiwaco lok ikom Yakobo ki Icrael ni,

‘Lubanga otimo gin madit kuman!’

24Nen lwak meno! Gin a malo macalo min labwor,

gitinge macalo labwor

ma pe butu piny nio ka omwodo lee ma omako,

ci mato remo pa gin ma onekoni.”

25Ci Balak owaco bot Balaam ni, “Ka pe iye cenogi, ci omyero pe dok ilam gum ikomgi aye.” 26Ento Balaam odok iye ki Balak ni, “Yam pe awaco boti ni, ‘Gin ducu ma Rwot ocika kwede, meno aye myero atim?’” 27Ci Balak owaco bot Balaam ni, “Kong dok ibin, wek ateri i kabedo mukene; gwok Lubanga biye ni icengi ki kunu.” 28Balak dok otero Balaam iwi lacol got Peor ma neno piny tung tim aroo. 29Ci Balaam owaco bot Balak ni, “Cana bene keno tyer abiro kany, ikela twoni abiro ki nyogi romi abiro.” 30Balak otiyo kit ma Balaam owaconi, ci otyero twon acel ki nyok romo acel iwi keno tyer ki acel acel.