Wel 24

Lok me nebi me adek pa Balaam

1Balaam, onongo dong oniang ni Rwot mito miyo gum ikom jo Icrael, ma omiyo pe dok ocito kayenyo tyet kit ma onongo ocito ikare mukeneni, ento oloko wange oneno tung tim. 2Ka Balaam oilo wange malo, ci oneno jo Icrael ma gin oguru kemagi kaka ki kaka. Cwiny pa Lubanga obino ikome, 3ci ocako loke kun loko macalo lanebi. En owaco ni,

“Man lok pa Balaam wod pa Beor,

lok pa twon laco ma wange dong kiyabo,

4lok pa ngat ma winyo gin ma Lubanga waco,

ki ma neno gin ma Won Twer Ducu nyutu bote,

ma ryebe piny inyime ento wange bedo twolo.

5Kemawu nen maber kuman, wun jo pa Yakobo,

gonywu ber kuman, wun jo Icrael!

6Nen calo nota ma oryene mabor,

macalo poti ma kipuru inget kulu;

cal ki yadi ma ngwece kur ma Rwot opito,

nyo yadi cedar ma obake inget pii.

7Pii bipong libic i agulugi kare ducu,

likwayogi bibedo rom ki pii mamol madwong;

rwotgi bibedo dit makato Agag,

kibiketo deyo mamalo mada ikom kere.

8Lubanga ma kerone calo kero pa jubi

okwanyogi woko ki i Ejipt.

Icrael bicamo lurok ma lukwore,

bituru cogogi, ngido matinotino;

bicelogi pil ki aterone. 91

En nyongo piny, butu calo labwor,

macalo min labwor; anga ma bituge?

Gum obed ikom dano ducu ma bilamo gum ikom Icrael,

cen opot ikom dano ducu ma bicene.”

10Ci kiniga omako Balak matek ikom Balaam, ci odongo cinge kekene kun waco bot Balaam ni, “Alwongi kaceno lumeroka, ento in dong ilego gum ikomgi odoko tyen adek kulu. 11Pimeno in dong iring woko oyot idok dong gang. Yam awaco ni abiketo deyo ikomi ada, ento Rwot dong ogengi woko ka limo deyo mo ki bota.” 12Balaam ogamo dog Balak, kun waco ni, “Yam atito ki lukwenani mayam icwalogi bota ni, 13‘Kadi bed Balak omiya ryal ki jabu ducu ma i ode, pe atwero turu cik pa Rwot pi timo gin mo kadi ber onyo kadi rac kit ma an aye amito; gin ma Rwot biwaco keken aye abiwaco.’”

Lok me nebi pa Balaam me agikine

14Lacen Balaam owaco bot Balak ni, “Kombedi, nen, an dong abidok woko bot lutuwa. Bin wek kong amii inge gin ma jo me rok man bitimo ikom joni ikare matye anyim.” 15Ci ocako loke kun loko macalo lanebi, kun waco ni,

“Man lok pa Balaam wod pa Beor,

lok pa twon laco ma wange dong kiyabo,

16lok pa ngat ma winyo gin ma Lubanga owaco,

ngat matye ki ngec ma oa ki bot En Mamalo Twal,

ma neno gin ma Won Twer Ducu nyutu bote,

kun ryebe piny inyime ento wange bedo twolo.

17Anene, ento pe kombedi,

anene, ento pe tye cok.

Lakalatwe bibino kun a ki bot Yakobo,

odo ker bia ki i Icrael;

bityero tur nyim jo Moab,

bituru wi jo ducu ma gimaro woo me lweny.

18En bimayo lobo pa jo Edom.

Jo Ceir ma lukwore en bimayo lobo ki botgi,

kun jo Icrael gitye kalweny ki tek.

19Jo pa Yakobo gibiloyo loc;

jo ma obwot ki i gang pa jo Moab kibinekogi woko liweng.”

20Ka dok oneno tung bot jo Amalek, Balaam oloko macalo lanebi kun waco ni,

“Jo Amalek yam gutelo wi rok mukene ducu, ento i agiki kibityekogi woko matwal.”

21Dok oneno tung bot jo Kenit, oloko macalo lanebi kun waco ni,

“Kabedowu birii nakanaka,

kalarewu kigero ipata got;

22ento wun jo Kenit kibiyakowu,

wubitum woko.

Jo Aciria gin biterowu i opii pi kare marom mene?”

23Dok oloko macalo lanebi kun waco ni,

“Anga ma bikwo ka Lubanga otimo man?

24Lukwang mel gibibino ma gin a ki tung Caiprac,

gibiyelo jo Aciria ki jo Eber matek;

gin bene kibinekogi kityekogi woko matwal.”

25Lacen Balaam oa malo odok cen kama en bedo iye; ki Balak bene ocito woko.