Wel 25

Jo Icrael guworo jok Baal me Peor

1Ikare ma jo Icrael gubedo i Citim, gucako timo abor ikom anyira Moab. 2Anyira Moab gubedo kalwongo jo Icrael kama kitumu iye gitum bot jogigi, ci jo Icrael gucamo ringo ma kityero bot jogi dok gin guryebe inyim jogi kaworogi. 3Kitmeno jo Icrael guribe ken gi ka woro jok Baal me Peor, ci kiniga omako Rwot ikomgi. 4Ci Rwot dong owaco bot Moses ni, “Kwany ludito ducu ma ikin lwak, wek idegi iwi yat malo i dyeceng inyim Rwot, wek kiniga pa Rwot mageri oa woko ki ikom jo Icrael.” 5Ma omiyo Moses owaco ki lungolkop pa jo Icrael ni, “Ngat acel acel ma ikinwu onek jo me kakane ma gin oribe keken gi ka woro jok Baal me Peor.”

6Dano mo acel ki ikin jo Icrael obino ki nya jo Midian otero iganggi, kun Moses ki lwak jo Icrael ducu gineno, ma onongo lwak tye kakoko inyim dogola Kema me Rwate. 7Ka Finekaci wod pa Eleajar ma wod pa ajwaka Aron oneno, en oa malo, oweko lwak, omako tong, 8ocito olubu kor Laicrael wa i kicika ma ityelo, ci ocobo gin aryo ducu, Laicrael ki dako meno, ocobo igi pil. Kitmeno omiyo two gemo oa woko ki ikom jo Icrael. 9Ento onongo jo ma dong two gemo onekogi onongo giromo alip pyere aryo wiye angwen.

10Ci Rwot owaco bot Moses ni, 11“Finekaci wod pa Eleajar ma wod pa ajwakana Aron otyeko dong dwoko akecana cen ki ikom jo Icrael, pien nyeko ma omake oweko en otiyo maka an ikin gi, omiyo pe atyeko jo Icrael woko. 12Pimeno in iwac bote ni, atyeko miyo bote gicikena me kuc. 13En kacel ki likwaye ma bilube gibibedo i tic me bedo ajwakana matwal pi gicike man ma aketo kwedgi, pien nene nyeko omake pi Lubangane, ci otimo gin lakwany bal ki ikom jo Icrael.”

14Nying Laicrael ma kineko kacel ki nya jo Midian obedo Jimri wod pa Calu, ma ladit wi kaka i ot pa kwarogi ikin jo pa Cimeon. 15Nying dako ma nya jo Midian ma kineko ni Kojibi nya pa Jur mayam ladit wi kaka i ot pa kwarogi ikin jo Midian.

16Ci Rwot owaco bot Moses ni, 17“Cit dong magwa ikom jo Midian, ilweny ikomgi; 18pien gin obwolowu kun gin omiyo wupoto ibal ilok me woro jok me Peor, ki ilok pa lamingi Kojibi nya pa rwot ma kineko ikare ma two gemo opoto.”