Wel 26

Kwano wel dano tyen me aryo i Moab

11

I nge two gemo Rwot owaco bot Moses ki ajwaka Eleajar wod pa Aron ni, 2“Kwan wel jo Icrael ducu, cake ki ikom jo ma ditogi romo mwaka pyere aryo dok kwede malo, kun ilubu dog odi pa kwarigi, jo Icrael ducu maromo cito kalweny.” 3-4Ci Moses ki ajwaka Eleajar guloko ki ludito i lobo aroo me Moab inget Jordan macok ki Jeriko ni, “Wukwan wel dano cake ki ikom jo ma ditogi romo mwaka pyere aryo dok kwede malo,” macalo Rwot ociko ki Moses.

Jo Icrael mayam gua ki i lobo Ejipt obedo jo magi:

5Jo me kaka pa Reuben ma obedo latin kayo pa Yakobo gin ene: likwayo pa Kanok, Pallu, 6Kejeron ki Karmi. 7Man aye dogola pa jo pa Reuben; welgi ducu oromo alip pyere angwen wiye adek, ki miya abiro ki pyere adek. 8Likwayo pa Pallu gin aye Eliab, 9ki awobene Nemuel, Datan ki Abiram. Man aye Datan ki Abiram ma lwak oyerogi mayam opyem ki Moses ki Aron kun gibedo ikin lwak pa Kora ikare ma gin ojemo ikom Rwot. 10Lobo ongamo doge omwonyogi woko ci guto kacel ki Kora ikare ma mac owango dano miya aryo ki pyere abic, otyekogi woko, ci nyinggi odoko labol me juku dano. 11Ento awobe pa Kora pe guto.

12Jo me kaka pa Cimeon gin ene: likwayo pa Nemuel, Jamin, Jakin, 13Jera ki Caul. 14Man aye dogola pa jo pa Cimeon; welgi ducu oromo alip pyere aryo wiye aryo, ki miya aryo.

15Jo me kaka pa Gad gin ene: likwayo pa Jepon, Kagi, Cuni, 16Ojini, Eri, 17Arod ki Areli. 18Man aye dogola pa jo pa Gad; welgi ducu oromo alip pyere angwen, ki miya abic.

19Kaka pa Juda: Er ki Onan ma awobe pa Juda mayam gin oto con i lobo Kanaan. 20Dong jo me kaka pa Juda gin ene: likwayo pa Cela, Perej ki Jera, 21ki pa Kejeron ki Kamul ma awobe pa Perej. 22Man aye dogola pa jo pa Juda: welgi ducu oromo alip pyere abiro wiye abicel ki miya abic.

23Jo me kaka pa Icakar gin ene: likwayo pa Tola, Puwa, 24Jacub ki Cimron. 25Man aye dogola pa jo pa Icakar: welgi ducu oromo alip pyere abicel wiye angwen, ki miya adek.

26Jo me kaka pa Jabulon gin ene: likwayo pa Cered, Elon ki Jaleel. 27Man aye dogola pa jo pa Jabulon: welgi ducu oromo alip pyere abicel, ki miya abic.

28Jo me kaka pa Yucepu gin aye likwayo pa Manace ki Epraim.

29Kaka pa Manace: Makir wod pa Manace onywalo Gilead. 30Jo pa Gilead gin ene: likwayo pa Iejer, Kelek 31Aciriel, Cekem, 32Cemida ki Keper. 33Jelopekad wod pa Keper onywalo anyira keken, awobene peke, nying anyirane Makala, Noa, Kogla, Milka ki Tirja. 34Man aye dogola pa jo pa Manace: welgi ducu oromo alip pyere abic wiye aryo, ki miya abiro.

35Jo me kaka pa Epraim gin ene: likwayo pa Cutela, Beker, Takan, 36ki pa Eran ma wod pa Cutela. 37Man aye dogola pa jo pa Epraim: welgi oromo alip pyere adek wiye aryo, ki miya abic. Meno ducu gubedo likwayo pa Yucepu.

38Jo me kaka pa Benjamin gin ene: likwayo pa Bela, Acibel, Akiram, 39Cepupam, Kupam, 40ki pa Arud ki Naaman ma awobe pa Bela. 41Man aye dogola pa jo pa Benjamin: welgi ducu oromo alip pyere angwen wiye abic, ki miya abicel.

42Jo me kaka pa Dan gin ene: likwayo pa Cukam, 43dogola ducu pa likwayo pa Cukam wel danogi oromo alip pyere abicel wiye angwen, ki miya angwen.

44Jo me kaka pa Acer gin ene: likwayo pa Imna, Icivi ki Beria, 45ki pa Keber ki Malkiel ma awobe pa Beria. 46Nya pa Acer nyinge obedo Cera. 47Man aye dogola pa jo pa Acer: welgi ducu oromo alip pyere abic wiye adek, ki miya angwen.

48Jo me kaka pa Naputali gin ene: likwayo pa Jajeel, Guni, 49Jejer ki Cilem. 50Man aye dogola pa jo pa Naputali: welgi ducu oromo alip pyere angwen wiye abic, ki miya angwen. 51Wel jo Icrael ducu oromo alip miya abicel ki acel, ki miya abiro ki pyere adek. 522

Ci Rwot owaco bot Moses ni, 53“Ibipoko lobo ikin kaka magi obed me aleyagi kun ilubu wel nyinggi ma kicoyo. 54Ibimiyo dul lobo malac bot kaka maditone ki dul lobo manok bot kaka ma tino; dul lobo me aleyagi kibipoko ma oporo wel dano ma i kaka moni. 55Lobo kibipoko ki bolo kwir kun lubu kaka pa kwarigi. 56Gin bilimo lobo me aleyagi muporo dit pa kaka acel acel kun lubu kit ma kwir opoto kwede.”

Kaka pa Levi

57Jo me kaka pa Levi gin aye dogola pa Gercon, Kokat ki Merari, 58kacel ki likwayo pa Libni, Kebron, Makali, Muci ki Kora. Kokat onywalo Amram, 59ma dakone obedo Yokobedi nya pa Levi ma onywalo i Ejipt. Yokobedi onywalo Aron ki Moses ki lamingi Miriam. 603Aron onywalo Nadab, Abiu, Eleajar ki Itamar. 614Ento Nadab ki Abiu gin oto woko ikare ma gin otyero mac mapat inyim Rwot. 62Kikwano wel jo pa Levi ducu ma co, cake ikom jo ma ditogi romo dwe acel dok kwede malo. Welgi oromo alip pyere aryo wiye adek: ento welgi yam pe kikwano ikin jo Icrael, pien pe kipoko botgi dul lobo mo me aleyagi ikin jo Icrael.

Kaleb ki Yocwa aye gudong makwo

63Meno aye gin jo ma Moses ki ajwaka Eleajar okwanogi i lobo aroo me Moab inget Jordan, macok ki Jeriko. 64Ento pe tye ngat mo acel ikin gi ki ikin jo mayam Moses ki ajwaka Aron okwanogi ikare ma kikwano wel jo Icrael i tim me Cinai. 655Onongo yam Rwot owaco pirgi bot Moses ni, “Gin bito woko i tim,” ci dano mo pe odong ki ikin gi, kono Kaleb wod pa Jepune ki Yocwa wod pa Nun keken aye gudong.