Wel 27

Koko pa anyira pa Jelopekad

(Wel 36:1-12)

1Ikare meno anyira pa Jelopekad gubino bot Moses. Jelopekad obedo wod pa Keper, wod pa Gilead, ma wod pa Makir, wod pa Manace; gin aye jo me dogola pa Manace wod pa Yucepu. Nying anyirane aye Makala, Noa, Kogla, Milka ki Tirja. 2Gin gubino gucung inyim Moses ki ajwaka Eleajar, ki inyim lutel wic ki lwak jo Icrael ducu idogola Kema me Rwate, ci guwaco ni, 3“Wonwa yam oto woko i tim, en yam peke ikin lwak jo ca ma gujemo ikom Rwot, i lwak pa Kora, ento oto mere pi bale kene gire; en yam pe onywalo awobe. 4Pi tyen lok ango mamiyo kikwanyo nying wonwa woko ki ikin dogolane? Pi lutino co ma en pe onywaloni bo? Mi ki wan dul lobo mo ikin omegi wonwa.”

5Ci Moses otero lok me kokogi inyim Rwot. 6Ci Rwot owaco ki Moses ni, 71“Lok pa anyira pa Jelopekad tye atir. Ibipoko lobo botgi ikin omego pa won gi obed me aleyagi, wek gule dul lobo ma myero obed pa won gi. 8Dok iwac bot jo Icrael ni, ‘Ka laco mo oto ma pe onywalo wode mo, ci wubimiyo ginaleyane bot nyare. 9Ka nyare mo peke, ci kimiyo bot omegine. 10Ka omine mo peke, ci kimiyo bot omin wone. 11Ka omin wone mo peke ci kimiyo ginaleyane bot watgi macok ma idogolagi, ci bidoko mere. Man aye bibedo cik bot jo Icrael, ki lok ma dong kingolo, macalo Rwot ociko ki Moses.’”

Kiyero Yocwa me leyo katyen Moses

(Nwo 31:1-8)

122

Rwot owaco bot Moses ni, “Cit malo iwi got man me Abarim, wek inen lobo ma abimiyo bot jo Icrael. 13Ka dong ineno, ci in bene dong ibito, idok bot lutuwu, macalo yam omeru Aron odok botgini; 14pien yam wujemo ikom loka i tim Jin ikare ma lwak okeco ikoma ca, kun pe wunyutu ni an aleng inyimgi, iwang pii kunu.” (Man aye pii me Meriba macok ki Kadec i tim Jin.)

15Moses olego Rwot kun waco ni, 16“Ai Rwot Lubanga maloyo tipu kom jo ducu, tim ber iket dano mo me loyo lwak, 173wek owire ikin gi macalo laditgi, dok otel nyimgi kama gin bicito iye ducu, wek lwaki pe obed macalo romi ma lakwatgi peke.” 184

Ci Rwot owaco bot Moses ni, “Kwany Yocwa wod pa Nun, dano matye ki cwiny, en aye iket cingi ikome. 19Imii en ocung inyim ajwaka Eleajar ki inyim lwak ducu, ci ibicike pi tice inyimgi ducu. 20Dok imiine tweroni mogo, wek lwak jo Icrael ducu gubed ka woro doge. 215En bicung inyim ajwaka Eleajar ma en aye bipenyo lok ma Rwot ongolo kun tiyo ki Urim inyim Rwot; kitmeno en kacel ki lwak jo Icrael ducu gibitiyo gin ducu kun gilubu lok pa Eleajar.” 22Moses otiyo kit ma Rwot ocike kwede; okwanyo Yocwa, omiyo ocung inyim ajwaka Eleajar inyim lwak ducu, 236ci oketo cinge iwiye, ocike pi tice, macalo Rwot ocike kwede.