Wel 28

Tyer me nino ducu

(Nia 29:38-46)

1Rwot owaco bot Moses ni, 2“Cik jo Icrael kun iwaco botgi ni, ‘Myero wunen ni wukelo bota tyera ikare ma kiciko, en aye cama me gityer ma kiwango ki mac me bedo gin ma ngwece kur ma yomo cwinya.’

3Dok iwac botgi ni, man aye gityer ma kiwango ki mac ma wubityero bot Rwot: lutino nyogi romi aryo ma ditogi mwaka acel acel ma komgi pe kimwonyo, inino acel acel, obed gitum awanga me nino ducu. 4Wubityero latin romo acel odiko, ki latin romo mukene wubityero otyeno, 5kacel ki moko kwon mapwot maromo agwata acel ma kirubu ki moo nyig jeituni ma kiodo aoda maromo lita acel pi gityer me moko kwon. 6Meno aye gitum me nino ducu mayam kiciko pire iwi got Cinai obed gin ma ngwece kur, tyer ma kiwango ki mac bot Rwot. 7Gityer amata ma otiko en bibedo kongo bwino maromo lita acel pi latin romo acel acel; wubiliyo kongo bwino makec me gityer amata i Kabedo Maleng inyim Rwot. 8Latin romo mukene wubityero otyeno kacel ki gityer me moko kwon ki gityer amata kit macalo wutimo ki gityer me odiko; bibedo gityer ma kiwango ki mac, gin ma ngwece kur ma yomo cwiny Rwot.”

Gityer me nino me Cabit

9“Ikom nino me Cabit wubityero nyogi romi aryo ma ditogi mwaka acel acel, ma komgi pe kimwonyo, ki moko kwon mapwot maromo agwata aryo, ma kirubu ki moo pi gityer me moko kwon, ki gityer amata ma otiko en. 10Man aye gitum awanga me nino me Cabit acel acel ma wubimedo ikom gitum awanga me nino ducu ki gityer amata ma otiko en.”

Gityer me por dwe

11“I acaki dwe ducu en aye wubityero iye gitum awanga bot Rwot: lutino twoni aryo, nyok romo acel ki lutino nyogi romi abiro ma ditogi mwaka acel acel, ma komgi pe kimwonyo; 12kacel ki moko kwon mapwot ma kirubu ki moo maromo agwata adek pi twon acel acel, agwata aryo pi nyok romo acel 13ki agwata acel pi latin romo acel acel; bibedo gitum awanga ma ngwece kur ma yomo cwiny, gityer ma kiwango ki mac bot Rwot. 14Gityer amata ma otikogi bibedo kongo bwino maromo lita aryo pi twon, lita acel ki nucu pi nyok romo, ki lita acel pi latin romo. Man aye gitum awanga me dwe acel acel pi dwe ducu ma i mwaka. 15Dok bene wubityero nyok dyel acel bot Rwot pi gitum me bal; wubimedo ikom gitum awanga me nino ducu ki gityer amata.”

Gityer me nino madito me Mugati ma Tobi pe iye

(Lev 23:5-14)

161

“Inino dwe apar wiye angwen me dwe mukwongo en aye nino madit me Karama me Kato pa Rwot. 172Dok ikom nino dwe apar wiye abic me dwe acelu en aye nino madit; wubicamo mugati ma tobi pe iye pi nino abiro. 18Ikom nino mukwongone wubibedo iye ki gure maleng; pe wutii iye tic mo. 19Ento wubityero iye gityer ma kiwango ki mac, gitum awanga bot Rwot: lutino twoni aryo, nyok romo acel, ki lutino nyogi romi abiro ma ditogi mwaka acel acel; wunen ni komgi pe kimwonyo. 20Wubityero bene gityer me moko kwon mapwot ma kirubu ki moo. Wumii maromo agwata adek pi twon acel acel, agwata aryo pi nyok romo, 21ki agwata acel pi latin romo acel acel. 22Wubityero bene nyok dyel acel bot Rwot pi gitum me kwanyo bal ki ikomwu. 23Wubityero gitum magi kun wumedo ki gitum awanga me odiko, ma en gitum awanga me nino ducu. 24Wubityero cam me gityer ma kiwango ki mac, gin ma ngwece kur ma yomo cwiny Rwot, kitmeno pi nino abiro ki ipiny maruu ducu; wubityero kun wumedo ki gitum awanga me nino ducu ki gityer amata ma otiko en. 25Inino me abirone wubibedo ki gure maleng: pe wutii iye tic mo.”

Gityer me nino madit me pwoyo kac

(Lev 23:15-22)

263

“Ikom nino me tyero cam me wi mwaka, ma wukelo iye gityer me moko kwon manyen bot Rwot i ninowu madit me kwero Karama me Kac, wubibedo iye ki gure maleng. Pe wutii iye tic mo. 27Ento wutyer iye gitum awanga, gin ma ngwece kur ma yomo cwiny Rwot: lutino twoni aryo, nyok romo acel, ki lutino nyogi romi abiro ma ditogi mwaka acel acel; 28kacel ki gityer me moko kwon mapwot ma kirubu ki moo. Wumii maromo agwata adek pi twon acel acel, agwata aryo pi nyok romo, 29ki agwata acel pi latin romo acel acel. 30Wubityero bene nyok dyel acel pi kwanyo bal ki ikomwu. 31Wubityerogi kacel ki gityer amata ma otikogi kun wumedo ki gitum awanga me nino ducu. Wunen ni komgi pe kimwonyo.”