Wel 29

Gityer pi acaki mwaka manyen

(Lev 23:23-25)

1“Inino dwe acel me dwe me abiro wubibedo iye ki gure maleng; pe wutii iye tic mo. En aye nino ma wubimiyo gwara kok iye. 2Dok wubityero iye gitum awanga, gin ma ngwece kur ma yomo cwiny Rwot: wod twon acel, nyok romo acel ki lutino nyogi romi abiro ma ditogi mwaka acel acel, ma komgi pe kimwonyo; 3kacel ki gityer me moko mapwot ma kirubu ki moo ma otikogi, agwata adek pi wod twon, agwata aryo pi nyok romo 4ki agwata acel pi latin romo acel acel. 5Wubityero bene nyok dyel acel pi gitum me bal me kwanyo bal ki ikomwu. 6Meno ducu wubityero kun wumedo ki gitum awanga me poo dwe ki gityer me moko kwon ma otiko en, ki gitum awanga me nino ducu ki gityer me moko kwon, ki gityer amatagi kit ma cikgi tye. Gibibedo gin ma ngwece kur ma yomo cwiny, gityer ma kiwango ki mac bot Rwot.”

Gityer pi Nino madit me Kwanyo Bal

(Lev 23:26-32)

71

“Inino dwe apar me dwe me abiro wubibedo ki gure maleng, kun wurii kec; pe wutii iye tic mo. 8Ento wutyer gitum awanga bot Rwot, gin ma ngwece kur ma yomo cwinye: wod twon acel, nyok romo acel ki lutino nyogi romi abiro ma ditogi mwaka acel acel; wunen ni komgi pe kimwonyo. 9Wumii bene gityer me moko kwon mapwot ma kirubu ki moo, agwata adek pi wod twon, agwata aryo pi nyok romo, 10ki agwata acel pi latin romo acel acel. 11Wubityero bene nyok dyel acel pi gitum me bal ma ki medo ki gitum me bal me lakwany bal, ki gitum awanga me nino ducu, ki gityer mere me moko kwon, ki gityer amata ma otikogi ducu.”

Gityer pi nino madito me Bolo

(Lev 23:33-44)

12“Inino dwe apar wiye abic me dwe me abiro wubibedo ki gure maleng; pe wutii iye tic mo. Wubikwero nino madito me woro Rwot pi nino abiro. 13Wubityero gitum awanga inino man ma okwongoni, gityer ma kiwango ki mac wek obed gin ma ngwece kur ma yomo cwiny Rwot. Lutino twoni apar wiye adek, nyogi romi aryo ki lutino nyogi romi apar wiye angwen ma ditogi mwaka acel acel; gin obed ma komgi pe kimwonyo. 14Wubimiyo gityer me moko kwon ma otikogi, moko mapwot ma kirubu ki moo maromo agwata adek pi twoni apar wiye adek ki acel acel, agwata aryo pi nyogi romi aryo pi acel acel, 15ki agwata acel pi lutino romi apar wiye angwen pi acel acel. 16Wubityero bene nyok dyel acel pi gitum me bal kun kimedo ki gitum awanga me nino ducu, ki gityer me moko kwon ki gityer amata ma otiko en.

17Inino me aryone wubimiyo lutino twoni apar wiye aryo, nyogi romi aryo ki lutino nyogi romi apar wiye angwen ma ditogi tye mwaka acel acel, ma komgi pe kimwonyo, 18kacel ki gityer me moko kwon ki gityer amata pi twoni ki nyogi romi ki lutino romi malubu welgi, macalo cik tye. 19Wubityero bene nyok dyel acel pi gitum me bal kun kimedo ki gitum awanga me nino ducu, ki gityer me moko kwon mere ki gityer amata ma otikogi ducu.

20Inino me adeke wubimiyo lutino twoni apar wiye acel, nyogi romi aryo ki lutino nyogi romi apar wiye angwen ma ditogi mwaka acel acel, ma komgi pe kimwonyo, 21kacel ki gityer me moko kwon ki gityer amata pi twoni ki nyogi romi ki lutino romi malubu welgi, macalo cik tye. 22Wubityero bene nyok dyel acel pi gitum me bal kun kimedo ki gitum awanga me nino ducu, ki gityer me moko kwon ki gityer amata ma otiko en.

23Inino me angwene wubimiyo lutino twoni apar, nyogi romi aryo ki lutino nyogi romi apar wiye angwen ma ditogi mwaka acel acel, ma komgi pe kimwonyo. 24Wubityero kacel ki gityer me moko kwon ki gityer amata pi twoni ki nyogi romi ki lutino romi malubu welgi, macalo cik tye. 25Wubityerogi bene nyok dyel acel pi gitum me bal kun kimedo ki gitum awanga me nino ducu, ki gityer me moko kwon ki gityer amata ma otiko en.

26Inino me abice wubimiyo lutino twoni abongwen, nyogi romi aryo ki lutino nyogi romi apar wiye angwen ma ditogi tye mwaka acel acel, ma komgi pe kimwonyo. 27Wubityerogi kacel ki gityer me moko kwon ki gityer amata pi twoni ki nyogi romi ki lutino romi malubu welgi, macalo cik tye. 28Wubityero bene nyok dyel acel pi gitum me bal kun kimedo ki gitum awanga me nino ducu, ki gityer me moko kwon ki gityer amata ma otiko en.

29Inino me abicele wubimiyo lutino twoni aboro, nyogi romi aryo ki lutino nyogi romi apar wiye angwen ma ditogi tye mwaka acel acel ma komgi pe kimwonyo. 30Wubityerogi kacel ki gityer me moko kwon ki gityer amata ki twoni, nyogi romi ki lutino romi malubu welgi, macalo cik tye. 31Wubityero bene nyok dyel acel pi gitum me bal kun kimedo ki gitum awanga me nino ducu, gityer me moko kwon ki gityer amata ma otiko en.

32Inino me abirone wubimiyo lutino twoni abiro, nyogi romi aryo ki lutino nyogi romi apar wiye angwen ma ditogi tye mwaka acel acel, ma komgi pe kimwonyo. 33Wubityerogi kacel ki gityer me moko kwon, gityer amata pi twoni ki nyogi romi ki lutino romi malubu welgi, macalo cik tye. 34Wubityero bene nyok dyel acel pi gitum me bal kun kimedo ki gitum awanga me nino ducu, ki gityer me moko kwon ki gityer amata ma otiko en.

35Inino me aborone wubibedo iye ki gure madit me woro Lubanga; pe wutii iye tic mo, 36ento wutyer iye gitum awanga, gityer ma kiwango ki mac wek obed gin ma ngwece kur ma yomo cwiny Rwot: twon acel, nyok romo acel ki lutino nyogi romi abiro ma ditogi tye mwaka acel acel, ma komgi pe kimwonyo. 37Wubityerogi kacel ki gityer me moko kwon, gityer amata pi twon ki nyok romo ki lutino romi malubu welgi, macalo cik tye. 38Wubityero bene nyok dyel acel pi gitum me bal kun kimedo ki gitum awanga me nino ducu, ki gityer me moko kwon ki gityer amata ma otiko en.

39Meno aye gin ma wubityero bot Rwot i ninowu madito ma kiciko, kun wumedo iye gityerwu me cobo kwongwu ki gityer mukene ma iwu opwoyo, pi gitumwu me awanga, gityer me moko kwon ki me amata, dok pi gityerwu me berbedo.”

40Moses otito ki jo Icrael lok ducu ma Rwot ocike kwede.