Wel 30

Cik ma mako kwong

1Moses owaco bot ludito wi kaka pa jo Icrael ni, man gin ma Rwot ociko. 21“Ka laco mo okwongo kwong mo bot Rwot, nyo ocike pi lok mo kun otwene kene ki cike me timo gin moni, myero pe otur cikene, ento myero ocob kakare kit ma ocike kwede.

3Nyo ka nyako mo okwongo kwong mo bot Rwot, otwene kwede ki cike me timo gin moni ma kun tye i paco pa wone ikare ma pud tidi, 4ka wone owinyo pi kwonge ki cike ma otwene kwede kekene, ci pe omedo ki waco iye lok mo bote, ci kwong ducu ma en okwongo ki cike ducu ma otwene kwede kekene bimoko ikome matwal. 5Ento ka wone ojuke woko inino ma owinyo iye loke ni, ci kwong pa nyako meno ki lok ma otwene kwede kekene pe bimoko ikome; Rwot bene bitime kica, pien wone onongo pe ocwako kwongeni.

6Kace kinyomo nyako mo ma nongo okwongo kwong nyo otwene kekene ki cike kun oloko labongo tamo tere, 7ce cware owinyo pire, ci pe omedo ki waco iye lok mo bote inino ma owinyo iyeni, ci kwonge ki cike ma otwene kwede kekene bimoko ikome matwal. 8Ento kace cware ojuke woko inino ma owinyo iye loke ni, ci cware bikwanyo kwong meno woko ki ikome, nyo lok mo ma onongo otwene kwede kekene kun oloko labongo tamo tere; Rwot bene bitime kica.

9Kace dato nyo dako ma cware oryemo okwongo kwong, ci lok ducu ma en otwene kwede kekene bimoko ikome.

10Ka dako mo okwongo kwong nyo otwene kekene ki cike ma dong kinyomo woko, 11ce cware owinyo pire ci pe omedo ki waco iye lok mo bote, dok pe ojuke, ci kwong ducu ma en okwongo, ki cike ducu ma otwene kwede, bimoko ikome. 12Ento kace cware ogenge woko inino ma owinyo pireni, ci lok ducu ma dako meno oloko ma mako kwong ma okwongo nyo cike ma otwene kwede pe bimoko, pien cware dong ogenge woko. Rwot bene bitime kica iye. 13Kwong ducu ma dako okwongo nyo ma otwene kwede me keto aroma ikome kekene, cware twero moko, dok cware twero gengo woko. 14Ento ka cware pe owaco lok mo bote, ce obedo kaling alinga nino ducu, miyo en moko kwede kwong pa dakone ducu ki cike ducu ma otwene kwede kekene, pien pe owaco lok mo bote inino ma owinyo iye pireni. 15Ento ka cware orii ma pe ogenge woko oyotoyot, ci bal pa dakone bidok iwiye ka pe ocobo.”

16Meno aye cik ma Rwot ociko ki Moses ma mako laco ki dakone ka okwongo kwong, ki won nyako ki nyare ka okwongo kwong ikare ma en pud tidi, ma nongo pud tye i gang pa wone.