Wel 31

Jo Icrael guculu kwor ikom jo Midian

1Rwot owaco bot Moses ni, 2“Dong icul kwor pa jo Icrael ikom jo Midian; ka lacen dong ibito, idok bot lutuwu.” 3Ci Moses owaco ki lwak ni, “Wumii lumony ma gitye ikinwu guruke ki jami lwenygi, wek gucit kalweny ikom jo Midian, wek gucul kwor pa Rwot ikomgi. 4Wucwal dano alip acel acel ma gia ki i kaka acel acel ma i Icrael gucit ilweny.”

5Kitmeno gin onongo dano alip apar wiye aryo ma guyube pi lweny ma gua ki i kaka mapatpat i Icrael. 6Moses ocwalogi woko kalweny, kacel ki Finekaci wod pa ajwaka Eleajar ma omako jami maleng pa Lubanga ki tum me goyo oduru. 7Gulwenyo ikom jo Midian macalo Rwot ociko ki Moses, ci guneko co ducu. 8Luker abic pa jo Midian gubedo tye ikin dano ma kinekogi. Nyinggi ene; Evi, Rekem, Jur, Kur ki Reba. Gin bene oneko Balaam wod pa Beor ki pala lucwan.

9Jo Icrael guyako mon ki lutino pa jo Midian, guterogi woko; ki dok gumayo leegi makwo madito ki matino ducu, ki jamigi ducu. 10Taun madito pa jo Midian ki kabedo mapatpat ma gibedo iye, kiwango woko. 11Jo Icrael gucito ki jami ducu ma kiyako nyo ma kimayo, dano wa ki leegu. 12Gin okelogi bot Moses ki ajwaka Eleajar ki bot lwak jo Icrael, i gonygi ma i lobo aroo me Moab inget Jordan, macok ki Jeriko.

Lumony gudwogo ki i lweny

13Moses ki ajwaka Eleajar ki lutel wi lwak ducu gucito woko karwate kwedgi inge gony. 14Ci kiniga omako Moses ludito me mony ikom lulo dano alip ki lulo dano miya ma gudwogo ki katero dano i mony. 15Moses owaco botgi ni, “Man wuweko mon ducu gudong makwo pingo? 161Nen, mon magi aye yam gulubu tam pa Balaam ci omiyo jo Icrael gungayo wang Rwot ilok me woro Baal, ma omiyo Rwot ocwalo two gemo opoto ikom lwak pa Rwot ki i Peor. 17Kombedi dong wunek lutino co woko ducu ma ikin lutinogi, dok wunek mon ducu ma dong gutyeko ngene ki co.

18Ento lutino anyira ducu ma peya gubutu ki co wugwokgi makwo gin obed mewu. 19Kong wubut woko inge gony pi nino abiro. Jo ducu ma ikinwu ma guneko dano, ki jo ducu ma gugudu kom dano ma oto myero wulonye kekenwu, kacel ki dano ma wuyakogi, inino me adeke ki inino me abirone. 20Wulony bongi aruka ducu, gin ducu ma kiyubu ki laa, nyo ma kicweyo ki yer dyegi, ki jami ducu ma kiyubu ki bao nyo ki yat.”

21Ci ajwaka Eleajar owaco bot lulweny ma onongo gucito i mony ni, “Man aye cik ma kiketo, mayam Rwot ociko ki Moses: 22jami ma obedo jabu, ryal, mola, nyonyo, koc, nyo racac, 23ki jami ducu ma mac pe balo, omyero owok okato ki i mac ci bilony woko. Ento kadi bed kitmeno, pud dok kibilonyogi ki pii me lwoko kwer; ci jami ducu ma mac balo woko wubimiyo wok kato ki ipii. 24Myero wulwok bongiwu inino me abirone, ci dong wubibedo ma wulony; ka lacen wubibino i gony.”

Poko jami ma kiyako ki imony

25Rwot owaco ki Moses ni, 26“Dong ikwan wel jami ma kiyako ki i mony, dano ki lee bene; kwan wun ki ajwaka Eleajar ki ludito kaka ma iot pa kwarigi ma ikin lwak. 27Ci ipok jami ma kiyako imony i dul aryo, tung cel pi lulweny ma gin gucito i mony, tung cel pi lwak ducu. 28Dok i jog ajog pa Rwot ki bot lulweny ma gucito imony kun i kwanyo acel ikom miya abic ki ikom dano ma kimako, ki twoni, ki kana, ki romi ki dyegi. 29Kwany ki ikom nucu ma megi, ci imii bot ajwaka Eleajar obed gityer bot Rwot. 30Ikom nucu ma tung bot jo Icrael ibikwanyo iye acel ikom pyere abic ki kom dano, ki twoni, kana, romi nyo dyegi, ki ikom lim makwo ducu, ci imii bot Lulevi ma gin gwoko kema pa Rwot.” 31Ci Moses ki Eleajar otiyo kit ma Rwot ociko ki Moses.

32Jami ma lulweny oyako, ma odong, onongo obedo romi alip miya abicel ki pyere abiro wiye abic, 33dyangi alip pyere abiro wiye aryo, 34kana alip pyere abicel wiye acel, 35ki dano alip pyere adek wiye aryo ma gin ducu aye anyira ma peya gubutu ki co. 36Nucune ma kipoko bot jo ma gucito i mony obedo romi alip miya adek ki pyere adek wiye abiro, ki miya abic; 37romi ma kijogo pi Rwot oromo miya abicel ki pyere abiro wiye abic. 38Dyangi oromo alip pyere adek wiye abicel; dyangi ma kijogo pi Rwot oromo pyere abiro wiye aryo. 39Kana obedo alip pyere adek, ki miya abic; ki kana ma kijogo pi Rwot oromo pyere abicel wiye acel. 40Dano oromo alip apar wiye abicel; ci dano ma kijogo pi Rwot oromo pyere adek wiye aryo. 41Moses omiyo dul ma kijogo me gityer pa Rwot bot ajwaka Eleajar, macalo Rwot ocike.

42Nucu ma kipoko ki jo Icrael, ma Moses opoko obedo pat ki pa jo mayam gucito i mony, 43obedo romi alip miya adek ki pyere adek wiye abiro, ki miya abic, 44dyangi alip pyere adek wiye abicel, 45kana alip pyere adek, ki miya abic, 46ki dano alip apar wiye abicel. 47Ikom nucu man ma obedo pi lwak Moses okwanyo iye acel ki ikom pyere abic, ikom dano ki ikom lee, ci omiyogi bot Lulevi ma gin gwoko kema pa Rwot, macalo Rwot ocike kwede.

48Ka dong ludito ma gin loyo lumony ducu, lulo dano alip ki lulo dano miya, gubino bot Moses. 49Gin owaco ni, “Wan lutici watyeko kwano wel lumony ma gitye ite locwa, ci wanongo ni pe tye dano acel mo ma orwenyo ki ikin gi. 50Wan dong wakelo gityerwa bot Rwot, gin ma dano acel acel onongo i lweny, jami me jabu, mola me bad, atego ngut cing, agit cing ki tiko ngut, pi kwanyo bal ki ikomwa inyim Rwot.” 51Moses ki ajwaka Eleajar ogamo jabu meno ki botgi; gin ducu obedo jami me deyo kom ma kiyubu ki diro. 52Jabu ducu ma lulo dano alip ki lulo dano miya otyero bot Rwot pekke romo kilo miya aryo. 53Lulweny ducu ma pe ludito mony gugwoko jami ducu, ma ngat acel acel oyako pire kene. 54Moses ki ajwaka pa Lubanga gugamo jabu ki bot ludito wi mony, gutero i Kema me Rwate obed gin me poyo wi Rwot ikom jo Icrael.