Wel 32

Kaka ma onongo kabedo inge kulu Jordan tung kunyango

(Nwo 3:12-22)

1Jo me kaka pa Reuben ki pa Gad gubedo ki lwak lim makwo mapol tutwal. Ka guneno lobo Jajer ki lobo Gilead obedo lobo maber tutwal me kwat, 2ci gucito bot Moses ki ajwaka Eleajar ki bot lutel wi lwak, ci guwaco ni, 3“Taun magi; Atarot, Dibon, Jajer, Nimra, Kecbon, Eleale, Cebam, Nebo ki Beon 4ma i lobo mayam Rwot oloyo inyim lwak jo Icrael, lobogi ber tutwal me kwat. Dong wan luticwuni watye ki lim madwong. 5Ka in bene ipwoyo tamwani, ci iye lobo man kimii botwa obed mewa, pe dong iterwa wangol loka Jordan.”

6Ento Moses owaco bot jo pa Gad ki pa Reuben ni, “Omegiwu bicito kalweny ma nongo wun wudong kany bo? 7Pingo wumito balo cwiny jo Icrael, ni pe gucit loka ca i lobo mayam Rwot omiyo botgi? 81Kwariwu bene yam kong gutimo kitmeno ikare ma acwalogi ki i Kadec-barnea pi neno lobo. 9Pien ka gucito malo wa i nota me Ecikol, ka guneno lobo, ci gubalo cwiny jo Icrael woko, ni pe gucit i lobo ma Rwot dong otyeko miyo botgi. 102Ci kiniga omako Rwot ikomgi inino maca, oweko okwongo kwong kun waco ni, 11‘Ada, pe tye ngat mo ki ikin jo mayam gua ki i Ejipt, cake ki ikom jo ma ditogi romo mwaka pyere aryo dok kwede malo ma bineno lobo mayam akwongo pire ni abimiyo bot Abraim, Icaka ki Yakobo, pien gin pe obedo kalubu gin ma amito ducu kakare. 12Pe tye ngat mo ma bineno, kono Kaleb wod pa Jepune ma jo Keniji, ki Yocwa wod pa Nun, pien gin aye gubedo kalubu gin ma amito ducu kakare.’ 13Ci kiniga omako Rwot ikom jo Icrael ikare ca, omiyo gubedo kawire i tim atata pi mwaka pyere angwen kulu, nio ka yalwak mayam otimo rac inyim Rwot otum woko. 14Ci nen, wun lutino pa lubalo, kombedi dong wua malo maka wonwu pi medo kiniga pa Rwot mager ikom jo Icrael! 15Pien ka wuweko lubu gin ma Rwot mito kombedi, ci en dok bitenyo lwak man woko i tim ata; kitmeno miyo lwak man ducu gito gitum woko.”

16Ka gin dok gubino bote kun giwaco ni, “Wan kong wabigero dwol ki gweng pi romiwa, ki gangi pi mon ki lutinowa. 17Ento wan wabiruku jami lwenywa, kun wayube pi telo wi jo Icrael anyim, nio ka wabiterogi i kabedogi, kun nongo monwa ki lutinowa gibibedo i gangi gogo ma wacelo matek wek ogwokgi ki ikom dano ma gibedo i loboni. 18Pe wabidwogo i pacowa nio wang ma jo Icrael ducu gutyeko nongo ginaleyagi ki acel acel. 19Wan pe wabinywako leyo lobo kacel kwedgi inge kulu Jordan ki tung kunu ducu, pien ginaleya ma mewa dong watyeko nongone i loka Jordan kany matye tung kunyango.”

20Ma omiyo Moses dok owaco botgi ni, “Kace wubitimo kitmeno, ma wubiruku jami lwenywu wucito anyim kalweny inyim Rwot, 21kun dano acel acel ikinwu maromo lweny kato loka Jordan inyim Rwot, nio ka Rwot otyeko ryemo lumeroke woko ki inyime, ci ber. 22Ka Rwot dong otyeko loyo lobo meno, ci lacen wubidwogo giwu kun banya mo peke ikomwu bot Rwot nyo bot jo Icrael, ci lobo man wubicamo bedo mewu inyim Rwot. 23Ento ka pe wutimo kitmeno, ci nen, nongo wutimo bal ikom Rwot. Myero wunge ni, balwu bimiyo wutingo alii ma bidwarowu. 24Dong wuger gangi pi mon ki lutinowu, ki dwol pi romiwu; ento wucob gin ducu ma wun wuwaco ni wubitimo.”

25Jo pa Gad ki pa Reuben gudok iye bot Moses ni, “Wan lutici; wabitiyo kit macalo in laditwa iciko ducu. 26Lutinowa ki monwa ki limwa makwo ducu gin bidong kany i taun ma i Gilead. 27Ento wan ducu ma waruku jami lweny wabikato wangolo loka ca kalweny inyim Rwot kit macalo in laditwa icikoni.” 283

Kitmeno Moses omiyo cik ma makogi bot ajwaka Eleajar ki bot Yocwa wod pa Nun, ki bot ludito wi odi pa kwarigi ma i kaka ducu pa jo Icrael. 29En owaco botgi ni, “Ka jo Gad ki jo Reuben ma dong guruke pi lweny inyim Rwot gin bikato ngolo kwedwu loka Jordan, dok ka wun wuloyo lobo meno woko, ci wubimiyo botgi lobo Gilead obed meggi. 30Ento ka gin pe bikato loka ca kacel kwedwu kun guruke me lweny, ci gin binywako camo lobo Kanaan kacel kwedwu.”

31Jo pa Gad ki pa Reuben gin odok iye ni, “Wabitimo kit ma Rwot dong oloko botwa, ladit. 32Wabikato loka ca inyim Rwot, wabicito i lobo Kanaan kun waruke me lweny, wek lobo ma loka Jordan kany odong i cingwa ci bedo me aleyawa.”

33Ci Moses omiyo bot jo pa Gad ki jo pa Reuben ki nucu kaka pa Manace wod pa Yucepu lobo mayam obedo pa Cikon rwot pa jo Amor ki Og rwot me Bacan, lobo ducu ma gin yam guloyo, kacel ki taun ducu ma i lobo meno ki lobo ma ingetgi ducu. 34Ci jo pa Gad gugero Dibon, Atarot, Aroer, 35Atarot-copan, Jajer, Jogbeka, 36Bet-nimra ki Bet-aran, gin ducu taun ma kicelo ki cel gogo, ki dwol pi romigi. 37Jo pa Reuben gugero Kecbon, Eleala, Kiriataim, 38Nebo ki Baal-meon (nying magi mukene yam kilokogi woko) ki Cibma; ci gucako nying mukene pi taun ma gin ogeroni.

39Jo pa Makir wod pa Manace gucito i lobo Gilead, gumako ci gumayo woko ki bot jo Amor ma onongo gitye kunu. 40Ci Moses omiyo Gilead bot jo pa Makir wod pa Manace, ci gucako bedo iye. 41Jair me kaka pa Manace ocito omako gangi matino mapol, ci ocako nyinggi ni, Kavot-jair.4 42Dok Noba ocito omako Kenat ki gangi matino ma ingete, ci ocako nyinge Noba, macalo nyinge kikome.