Wel 33

Wot pa jo Icrael nia ki Ejipt nio kwede i Moab

1Jo Icrael yam guwoto kun gikobo ki wotgi kit man, ikare ma gua woko ki i lobo Ejipt ki bucagi kun Moses ki Aron aye telo wigi. 2Moses yam ocoyo nying kabedo ducu ma gubedo iye ki acel acel nia i acaki, kit macalo Rwot ociko. Man aye nying kabedo kit ma gubedo kakobo ki wotgi.

3Jo Icrael gua woko ki i Ramecec inino dwe apar wiye abic me dwe mukwongo, inino malubu nino madit me Karama me Kato. Gin gua gucito woko ki wayu kun jo Ejipt ducu nenogi. 4Jo Ejipt kono onongo gitye kayiko lutino kayogi ma onongo Rwot onekogi woko. Rwot otimo man me nyutu ni tekone dit loyo pa lubanga mukenegu ducu pa jo Ejipt.

5Kitmeno jo Icrael gua ki i Ramecec, ci gugony i Cukot. 6Gua ki i Cukot, ci gugony i Etam matye i dog tim aroo. 7Gua ki i Etam, ci guloke gudok cen i Piakirot ma tung kunyango me Baal-jepon; ci gugony inyim Migdol. 8Gua ki i Pi-akirot ci guwok gukato ki i dye Nam Makwar, ci guo i tim. Gin owoto wot me nino adek i dye tim me Etam, ci gugony i Mara. 9Gua ki i Mara, gubino i Elim. I Elim yam tye iye wang it apar wiye aryo, ki otit pyere abiro; ci gugony kunu.

10Gua ki i Elim, ci gugony inget Nam Makwar. 11Gua ki inget Nam Makwar, gugony i tim Cin. 12Gua ki i tim Cin, ci gugony i Dopka. 13Gua ki i Dopka, ci gugony i Aluc. 14Gua ki i Aluc, ci gugony i Repidim kama pii amata pa dano obedo peke iye.

15Gua ki i Repidim ci gucito wa ite got Kor. Ka pud gitye i yo me cito Kor gugony i kabedo magi: tim Cinai, 16Kibrot-atava, 17Kajerot, 18Ritma, 19Rimmon-perej, 20Libna, 21Rica, 22Keelata, 23got Ceper, 24Karada, 25Makelot, 26Takat, 27Tera, 28Mitka, 29Kacimona, 30Mocerot, 31Bene-jaakan, 32Kor-agidgad, 33Jotibata, 34Abrona, 35Ejion-geber, 36ki tim me Jin, en aye Kadec. 37Lacen gugony ite got Kor, i dog wang lobo me Edom. 381

Ajwaka Aron oito malo iwi got Kor kit ma Rwot ociko, ci oto woko ki kunu, i mwaka me pyere angwene nia ma jo Icrael gua ki i lobo Ejipt, inino mukwongo me dwe me abic. 39Aron onongo dong tye ki mwaka me dite miya acel ki pyere aryo wiye adek ikare ma en oto ki iwi got. 402

Ci rwot me Arad, ma en Lakanaan ma bedo i Negeb i lobo owinyo pi bino pa jo Icrael.

41Ka gua ki ite got Kor ci gugony i kabedo magi: Jalmona, 42Punon, 43Obot, 44Iye-Abarim ma i lobo Moab, 45Dibon-gad, 46Almon-diblataim. 47Gua ki i Almon-diblataim ci gugony i dye godi Abarim, inyim got Nebo. 48Gua ki kunu, ci gugony i lobo aroo me Moab inget Jordan macok ki Jeriko. 49Ci guguru kemagi inget Jordan cake ki i Bet-jecimot o kwede wa Abelcitim i bar aroo me Moab.

Lubanga ociko jo Icrael

50I lobo aroo me Moab inget Jordan macok ki Jeriko Rwot owaco bot Moses ni, 51“Cik jo Icrael ni, ka wungolo kulu Jordan wukato i lobo Kanaan, 52ci wubiryemo jo ma gibedo i lobo meno woko ducu ki inyimwu; wubibalo got megi ducu ma gugoro cal ikomgi, ki cal jogigi me nyonyo ma kiliyo aliya, dok wubimuku wang jogigi ma iwi godi. 53Wubicamo lobo meno, wubibedo iye, pien atyeko miyo botwu ni obed mewu. 543Wubilimo lobo me aleyawu kun kipoko ki bolo kwir malube ki kit ma dogolawu tye kwede. Wubimiyo dul lobo malac bot kaka maditone ki dul lobo manok bot kaka matino. Kama kwir opoto iye ikom dano moni, en aye bedo mere; wubilimo lobo me aleyawu kun lubu kaka pa kwariwu. 55Ento ka pe wuryemo jo ma gibedo i lobo meno woko ki inyimwu, ci jo meno ma wun wuweko odongi bibedo macalo atero mabit me cobo wangwu ki okutu me cobo lakngetwu, ci gin biyelowu i lobo kama wubibedo iyeni. 56Ci abitimo ikomwu kit ma onongo atamoni abitimo ikomgi.”