Wel 34

Wang apoki me lobo

1Rwot owaco bot Moses ni, 2“Cik jo Icrael kun iwaco botgi ni, ka wudonyo i lobo Kanaan, ma en aye lobo ma kibimiyo ni obed mewu me aleyawu, wang apoki me lobowu bibedo kit man: 3Wang lobowu tung kupiny bicake i tim me Jin ci rabo nget lobo Edom. Bia ki tung agiki nam me Kado ma tung kunyango, 4ka dong biloke dok tung kupiny ma kemo Akrabim, ka dok kato ki Jin, ki agikine bibedo inget Kadec-barnea tung kumalo. Ka dok cito mede kwede nio wa i Kajar-adar, ka kato cito kwede i Ajimon, 5ka wang lobo cako loke ki i Ajimon cito wa i nota ora me Ejipt; ci wange bigik i dog nam Mediterranean.

6Wang lobo ma tung kupotoceng bibedo nam Mediterranean; dong dog nam aye bibedo wang lobowu ma tung kupotoceng.

7Man aye bibedo wang lobowu ma tung kumalo, bia ki i nam Mediterranean ci bicito atir o wa ikom got Kor. 8Nia ki ikom got Kor bicito atir wa i yoo ma donyo i Kamat, ci cito wa i Jedad; 9ka dok bimede cito wa i Jipron, ka bigik i Kajar-enon. Man aye bibedo wang lobowu ma tung kumalo.

10Wang lobowu ma tung kunyango bicake ki i Kajar-enon cito atir o wa i Cepam. 11Ka wang lobo bilor dok tung kupiny nia ki i Cepam o kwede wa i Ribla ma inget Ain tung kunyango. Ka dok bilor piny cito o kwede i kor got me nam me Kineret tung kunyango. 12Ka dok bilor piny wa i Jordan, ka bigik i nam me Kado. Meno aye bibedo lobowu, ki wang apokine ma orumu ducu.” 131

Moses dok ociko jo Icrael kun waco ni, “Man aye lobo ma wubileyo kun kipoko ki bolo kwir, mayam Rwot ociko ni kimii bot kakawu abongwen ki nucu. 14Pien kaka pa Reuben ki kaka pa Gad dong gutyeko gamo ginaleyagi kun lubu dog odi pa kwarigi, kacel ki nucu kaka pa Manace bene. 15Gin dong otyeko gamo lobogi loka Jordan mukemo Jeriko, tung kunyango, kama ceng tuc ki iyeni.”

16Rwot owaco bot Moses ni, 17“Man aye nying dano ma bipoko lobo botwu jo Icrael, wek obed ginaleyawu. Ajwaka Eleajar ki Yocwa wod pa Nun. 18Dok wubikwanyo latel wic acel ki i kaka acel acel wek gupok lobo me aleyawu. 19Magi aye nying lutel: pi kaka pa Juda, Kaleb wod pa Jepune. 20Pi kaka pa Cimeon, Cemuel wod pa Amikud. 21Pi kaka pa Benjamin, Elidad wod pa Kicion. 22Pi kaka pa Dan, Bukki wod pa Jogli. 23Pi likwayo pa Yucepu, me kaka pa Manace, Kaniel wod pa Epod; 24ki i kaka pa Epraim, Kemuel wod pa Ciptan. 25Pi kaka pa Jabulon, Elijapan wod pa Pamak. 26Pi kaka pa Icakar, Paltiel wod pa Ajan. 27Pi kaka pa Acer, Akiud wod pa Celomi. 28Pi kaka pa Naputali, Pedael wod pa Amikud. 29Magi aye dano ma Rwot ociko ni gupok lobo me aleya bot jo Icrael ki i lobo Kanaan.”