Wel 36

Cik ma mako anyira ma guleyo lobo pa won gi

1Ludito kaka pa kwarigi ma i dogola pa Gilead wod pa Makir ma wod pa Manace ma i dogola pa Yucepu gin obino cok, ci guloko inyim Moses ki ludito kaka mukene. 21 Guwaco ni, “Laditwa, Rwot yam ociki ni imii lobo me aleya bot jo Icrael kun kibolo kwir; ki yam ociki ni imii ginaleya pa ominwa lyeli Jelopekad bot anyirane. 3Ento kace awobe ma i kaka mukene onyomogi ki ikin jo Icrael ata, ci miyo lobogi kibikwanyo woko ki ikom ginaleya pa kwarigi, ci kibimedo ikom lobo pa kaka ma anyirane dong tye iyeni; meno miyo kibijwiko lobowa woko mayam kipoko botwa ki kwir. 4Dok ka kare me dwok lobo mayam ki cato, bot rwode oromo, ci lobo pa Jelopekad kibimedo ikom lobo pa kaka ma anyirane kinyomogi iyeni matwal, ci miyo lobowa me aleyawa bijwik woko.”

5Ci Moses ociko jo Icrael kit man, kun cike oa ki bot Rwot ni, “Lok me kaka pa likwayo pa Yucepu tye atir. 6Dong man aye cik ma Rwot omiyo ma okemo kom anyira pa lyeli Jelopekad ni, ‘Wek gin onyome ki dano ma gitamo ni ber, teke ka kinyomogi i dogola mo ma i kaka pa kwarogi. 7Lobo ma kimiyo bot jo Icrael me aleyagi pe kibilokone nia i kaka man dok i kaka mukene; pien dano acel acel ma ikin jo Icrael bimoko matwal ikom ginaleya ma i kaka pa kwarogi. 8Dok ka nyako mo oleyo dul lobo mo ma i kaka mo ma ikin jo Icrael, ci en binyome ki dano mo ma idogola mo ma i kaka pa kwarogi, wek dano acel acel ma ikin jo Icrael obed ki lobone ma oleyo ki bot kwarone. 9Kitmeno, pe kibiloko ginaleya mo nia ki i kaka moni dok i kaka mukene, ento kaka acel acel pa jo Icrael bimoko gire i lobo me ginaleyane kikome.’”

10Anyira pa Jelopekad otimo kit ma Moses ocikogi kwede. 11Makala, Tirja, Kogla, Milka ki Noa, ma gin aye anyira pa Jelopekad, gin onyome ki awobe pa omegi won gi. 12Kinyomogi i dogola pa jo pa Manace wod pa Yucepu, omiyo lobo me aleyagi obedo i kaka me dogola pa won gi, pe kikobo woko.

13Meno ducu aye gin lok ma Rwot ociko ki ma ongolo ki i dog Moses bot jo Icrael i lobo aroo me Moab inget kulu Jordan ma okemo Jeriko.