Nwoyo Cik 1

Jami ma otime i Koreb

1Man aye lok mayam Moses oloko bot jo Icrael ducu ki i loka Jordan i dye tim, i Araba ma okemo Cup, ikin Paran ki Topel, Laban, Kajerot ki Dijakab. 2Nia ki i Koreb nio wa i Kadec Barnea tero kare maromo wot me nino apar wiye acel ki i yoo ma wok i lobo godi me Ceir. 3I mwaka me pyere angwene, inino dwe mukwongo me dwe me apar wiye acel, en aye Moses oloko iye ki jo Icrael ikom cik ducu ma Rwot yam omiye ma mako komgi. 41 Moses oloko kwedgi ikare ma dong otyeko loyo Cikon rwot pa jo Amor mayam bedo i Kecbon, ki Og rwot me Bacan mayam bedo i Acitarot ki i Edrei. 5Moses omiine pi gonyo te cik man ki i loka Jordan, i lobo Moab. Magi aye gin ma en otito botgi ni, 6“Rwot Lubangawa owaco botwa ki i Koreb ni, ‘Dong wubedo kare malac tutwal ite got man. 7Dong wua woko wek wucak wot. Wucit i lobo godi pa jo Amor, ki bot jo ma gicok kwedgi ducu ma i Araba, bot jo ma i lobo godi ki i pwor got, ki i Negeb ki i lobo ma orabo dog Nam Mediterranean. Wucit i lobo Kanaan, ki i Lebanon nio wa i kulu madit, en Kulu Euprate. 8Nen, dong atyeko keto lobonu inyimwu; wucit iye, wucam obed mewu, kit mayam Rwot okwongo bot kwarowu, bot Abraim, bot Icaka ki bot Yakobo, ni ebimiyo botgi ki bot likwayogi ma bilubugi.’”

Moses oketo lungolkop

(Nia 18:13-27)

9Moses owaco ki jo Icrael ni, “Ikare ma pud wan watye iwi got Cinai, an atitiwu ni, ‘Bedo latelawu obedo tic madit tutwal, ma an kena pe atwero timone. 10Pien Rwot Lubangawu dong omiyo wun wunya mapol, ma omiyo tin nen, wun wupol macalo lwak lakalatwe me polo. 11Dok bene myero Rwot Lubanga pa kwarowu dong omedwu wek wudok mapol tyen alip makato ma kombedi wutyeni, dok ominiwu gum, macalo yam ocikowu kwede! 12Dok an kena abitwero tingo yec mapek kuman ningning me bedo kalaro lok ikinwu? 13Piman wun ki komwu wuyer jo ma luryeko, jo makwiri muteggi, muporo wel kakawu ducu, ci abiketogi wek gubed lutela maloyo wiwu.’ 14Ci wun yam wudoka iye ni, ‘Lok ma iloko botwani ber, myero watii.’ 15Pimeno akwanyo ludito wi kakawu, jo maryek, muteggi, ci aketogi gubedo lutela wi jo alip, ki lutela wi jo miya, ki lutela wi jo pyere abic ki lutela wi jo apar, ki lutela mukene muporo kakawu ducu. 16Ikare meno aciko lungolkopwu ni, ‘Wuwiny pido ma ikin omegiwu ki lumegiwu, ci wungol kop atir ikin utmego ki ikin nyimego, nyo ki larok mo ma bedo bote. 17Ka wungolo kop, pe wudwor kor dano mo; wuwiny lok pa dano matidi marom ki pa dano madit. Pe wulwor wang dano mo, pien ngolo kop tye bot Lubanga. Ka lok mo tek loyowu, ci wukel bota, ci an biwinyone.’ 18Ikare ca yam acikowu ikom gin ducu ma myero wutim.”

Kicwalo lurotpiny ki i Kadec Barnea

(Wel 13:1-33)

19“Yam wacako wot kit ma Rwot Lubangawa ocikowa kwede. Wa a woko ki i Koreb, ci wacito wabaro dye tim meno ducu malac ki malik mayam wuneno, i yoo ma kemo lobo godi pa jo Amor; ci wabino wa i Kadec Barnea. 20Ci awaciwu ni, ‘Wun dong wuo i lobo godi pa jo Amor en, ma Rwot Lubangawa bimiyowa. 21Nen, Rwot Lubangawu oketo lobonu inyimwu; wucit wucam obed mewu, macalo Rwot Lubanga pa kwarowu yam ocikowu; pe wulwor, cwinywu pe bene ocid woko.’ 22Ci wun ducu wubino cok bota, kun wuwaco ni, ‘Wek wacwal dano i nyimwa wek gurot lobo, ka gudwok lok botwa ikom yoo ma myero wawok ki iye, ki ikom taun madongo ma wabio iye.’ 23Ci an yam aneno ni loke ber, ci akwanyo jo apar wiye aryo ki ikinwu, dano acel ki i kaka acel acel. 24Ci gin gua, gucito i lobo godi, ka guo i nota me Ecikol, ci guroto ducu. 25Ci gukwanyo nyig yadi mogo ma ocek i lobonu, gumako ki cinggi, ci guo kwede wa botwa, dok gudwoko lok botwa bene kun giwaco ni lobo ma Rwot Lubangawa tye kamiyo ki wan ber dok ceko cam. 262

Ento wun yam onongo pe wumito cito kunu. Ci wun wujemo woko ikom cik pa Rwot Lubangawu. 27Wubedo ka nguru i kemawu, kun wuwaco ni, ‘Pien Rwot yam dagwa en aye gin ma omiyo okwanyowa woko ki i lobo Ejipt, owek omiyowa i cing jo Amor, me tyekowa woko liweng. 28Wan wabicito kunu pi gin ango ka? Utmegiwa ma gucito kunu karoto piny gumiyo cwinywa ongabe angaba ma guwaco ki wan ni, jo maca gidongo dok giboco gikatowa woko; gitye ki taun madito, dok gugoyo cel matego ma o wa i pol; dok bene waneno likwayo pa jo Anak kunu.’ 29Ci an dok awaco botwu ni, ‘Pe atiba opot ikomwu, pe wulworgi. 30Rwot Lubangawu matye katelo nyimwuni, en aye bene bilweny pirwu, marom kit mayam wuneno ki wangwu gin ma en otimo pirwu i Ejipt 313wa ki i dye tim bene. Wun ki komwu yam wuneno kit ma Rwot Lubangawu okelowu kwede, kun timo kumeno i yo ducu ma wuwoto iye nio ka wuo kwede ikabedo man, macalo dano ma otingo latine.’ 324Ento kadi bed aloko kumeno, wun wukwero geno Rwot Lubangawu, 33mayam obedo katelo kiwun yo wek eyeny kabedo ma wubiguru iye kemawu. Dyewor en woto i wir mac ki dyeceng woto i wir pol pi nyutuwu yo ma wucito iye.

Lubanga opwodo jo Icrael

(Wel 14:20-45)

345

Ka yam Rwot owinyo lok ma wuloko ducu, ci kiniga omake, omiyo okwongo kwong ni, 35‘Pe tye ngat mo ma ikin yalwak man maraci ma bio i lobo maber mayam akwongo pire ni abimiyo bot kwarowu, 36kono Kaleb wod pa Jepune keken. En aye bio iye, dok abimiyo bote ki bot lutinone lobo mayam en onyono ki tyene, pien en obedo kalubu gin ma Rwot mito ducu kakare.’ 37Kiniga yam omako Rwot wa ikom an bene pirwu, ci owaco bota ni, ‘In bene pe ibio i lobo kunu. 38Ento Yocwa wod pa Nun ma tiyo botini, en aye bicito iye. Cuk cwinye, pien en aye dong bimiyo jo Icrael gileyo lobo ca. 39Dok lutinowu ma wun wuwaconi kibiyakogi wokoni, lutinowu ma kombedi peya gingeyo gin maber ki maraci, gin aye gibicito iye; dok abimiyone botgi, ci gibicamo, dok bibedo meggi. 40Ento wun giwu wuloke, wucak wot me dok cen i dye tim yo tung Nam Makwar.’

Kiloyo jo Icrael i Korma

(Wel 14:39-45)

41Ci wun dok wugamo doga kun wuwaco ni, ‘Wan dong wabalo inyim Rwot; wabicito kalweny kit macalo Rwot Lubangawa ocikowa. Dano acel acel ikinwu otwene ki jami lwenye, kun wutamo ni bedo yot me cito i lobo godi. 42Ci Rwot owaco bota ni wac botgi ni pe wucit kunu, dok pe wulweny, pien an pe atye i dyewu, weko lumerokwu biloyowu.’ 43Yam aloko botwu, ci wukwero, pe wuwinyo; ento wujemo woko ikom cik pa Rwot, pien wuete, ci wuito malo wa i lobo godi. 44Ci jo Amor ma gibedo i lobo godi kunu gubino ikomwu, ci guryemo korwu macalo kic, ci gudatowu woko piny i Ceir nio wa i Korma. 45Ci wudwogo, wukok inyim Rwot; ento Rwot pe owinyo kokowu, pe ociko ite i lokwu. 46Ma omiyo wubedo i Kadec kunu pi kare malac tutwal.”