Nwoyo Cik 2

11

“Lacen waloke, wawoto wacito i tim, i yoo ma dok tung Nam Makwar, kit macalo Rwot ocika; ci wabedo karabo nget lobo godi me Ceir pi kare malac. 2Ka dong Rwot owaco bota ni, 3‘Wun dong wutero kare ma oromo kun wurabo nget godi me lobo man; kombedi dong wuloke wudok tung kumalo.’ 42Ci icik lwak kuman ni, ‘Wun dong wucok kawok ki i lobo pa utmegiwu likwayo pa Ecau ma gibedo i Ceir, ci gin bibedo ki lworo ikomwu. Ento wugwoke mada, 5pe wucak lweny ikomgi, pien pe abimiyowu dul lobogi mo, pe kadi ma tyenwu romo cung iye, pien atyeko miyo lobo godi me Ceir bot Ecau obed mere. 6Wubiwilo cam ki botgi wek wucam; dok bene wubiwilo pii amatawu ki botgi wek wumati.’

7Pien Rwot Lubangawu obedo kanyayo gum ikom ticwu ducu ma wun wutiyo. En ngeyo gin ducu ma wuwok iye ikare ma wukato ki i twon dye tim man malac rwoki. Rwot Lubangawu obedo kwedwu i lwak mwaka pyere angweni ducu ma wubedo kawire i twon dye tim man labongo gin mo murem botwu. 8Ci waa woko ki i kanget utmegiwa likwayo pa Ecau ma gibedo i Ceir, kun walubu yoo me Araba ma oa ki i Elat ki Ejion-geber. Ci waloke, wacito i yoo ma kemo tung tim me Moab. 93Ka Rwot dok owaco bota ni, ‘Pe iket ayela mo ikom jo Moab, dok pe bene icak lweny ikomgi, pien pe abimiyi dul lobogi mo me bedo mewu, pien atyeko miyo Ar bot likwayo pa Lot me bedo meggi.’”

Jo Emim ki rok mukene

10Yam onongo jo Emim aye gukwongo bedo i lobo kunu; gin rok madit, dok gipol bene, jo maboco macalo jo Anak. 11Jo man kikwanogi ikin jo Repaim bene macalo jo Anak, ento jo Moab lwongogi ni jo Emim. 12Ki jo Kori bene yam gukwongo bedo i Ceir, ento likwayo pa Ecau aye gucamo lobogi, ci gutyekogi woko liweng ki inyimgi, dok guleyo kabedogi, macalo jo Icrael gutimo ki lobo ma odoko meggi, ma Rwot omiyogini.

13Ci dong wua wungolo nota ora me Jered kit ma Rwot ociko. 144Nia ikare ma waa ki i Kadec Barnea nio ka wangolo nota ora me Jered onongo oromo mwaka pyere adek wiye aboro. Yalwak pa jo ma lulweny onongo dong guto gutum woko ki i gony, kit mayam Rwot okwongo kwede kwong ikomgi. 15Ada cing Rwot onongo tye ikomgi liking nio ka otyekogi woko ducu ki i gony.

16“Kitmeno ka yam jo ducu ma lulweny guto gutum woko ki ikin lwak, 17ci Rwot owaco bota ni, 18‘Tin dong ibikato ki iwang lobo Moab kun iwok ki i Ar. 195Ka dong i nyiko cok inyim likwayo pa Ammon, pe ikel ayela ikomgi, dok pe icak lweny ikomgi, pien pe abimiyo dul lobo mo pa jo Ammon me bedo mewu, pien atyeko miyone woko bot likwayo pa Lot me bedo meggi.’”

20Lobo meno bene onongo kilwongo ni lobo pa jo Repaim. Jo Repaim aye yam gukwongo bedo kenyo, ento jo Ammon lwongogi ni jo Jamjummim. 21Gin yam gubedo rok madit, ma gipol bene, dok giboco macalo jo Anak; ento Rwot otyekogi woko liweng ki inyimgi, ci jo Ammon gucamo lobogi, ci guleyo kabedogi. 22Kitmeno bene Rwot otimo pi likwayo pa Ecau ma gibedo i Ceir, ikare ma otyeko jo Kori woko ki inyimgi, ci likwayo pa Ecau gucamo lobogi, guleyo kabedogi, dok bene pud gibedo iye wa tin. 23Dok jo Avim bene mayam gubedo i gangi matino macok ki Gaja, jo Kaptorim aye mayam gubino gua ki i Kaptor, ci gucamo lobo meno ci guleyo kabedogi.

24Ikare ma wawoto wakato Moab, ci Rwot owaco botwa ni, “Wua malo, wucak wot, wucit wungol nota me Arnon. ‘Nen, dong atyeko miyo Cikon i cingwu, ma en aye dano me Amor, rwot me Kecbon, kacel ki lobone. Wucak dong lweny ikome wek wucam lobone woko. 25Nen nicake tin, dong abiketo atiba ki lworo madit ikom rok matye piny ite ceng wek ka gibiwinyo pirwu ci komgi bimyel, dok cwinygi bipoto woko lirut.’”

Jo Icrael guloyo rwot Cikon

(Wel 21:21-30)

26“Ma omiyo acwalo lukwena nia ki i tim me Kedemot bot Cikon rwot me Kecbon ki lok me kuc, kun awace ni, 27‘Ber iwek awok akat ki i loboni. Ci abicito alubu gudu keken, dok pe Abingak adok tung acuc nyo tung acam. 28Ibicata cam me acama ma awilo ki lim, dok ibimiya pii bene me amata ma awilo ki lim. Wek awok akat ki tyena keken, 29kit macalo likwayo pa Ecau ma gibedo i Ceir, ki jo Moab ma gibedo i Ar yam gutimo, nio ka angolo Jordan akato wa i lobo ma Rwot Lubangawa bimiyowa.’ 30Ento Cikon rwot me Kecbon pe oye ni wawok ki i lobone; pien Rwot Lubangawu omiyo toke odoko tek dok odoko lajemo bene, wek emii en i cingwu, wek wacam lobone odok mewa macalo otimeni. 31Ci Rwot owaco bota ni, ‘Nen, dong acako miyo Cikon ki lobone woko i cingi: cak dong camone wek wule lobone obed mewu.’ 32Ci Cikon ocore obino ikomwa, en ki lwake ducu kalweny i Jakaj. 33Ci Rwot Lubangawa omiyo en i cingwa, ci waloyo en ki awobene ki lwake ducu. 34Ikare meno wamayo taune madito ducu, dok wajwerogi woko liweng, co wa ki mon wa ki lutino ducu. Pe waweko ngat mo odong. 35Watero leegi makwo ducu dok bene wayako taun gi mayam wamayoni woko liweng. 36Rwot Lubangawa omiyo wamayo taun ducu nia ki i Aroer matye i dog nota me Arnon, wa ki taun matye i nota nio wa i Gilead. Pe tye taun mo ma kigero mamalo tutwal ma mayone oloyowa. 37Ento lobo pa likwayo pa Ammon keken aye yam pe wunyiko cok kwede, ki lobo ducu ma i dog kulu Jabok, ki taun ma i lobo godi, ki kama Rwot Lubangawa ojukuwa pireni ducu.”