Nwoyo Cik 3

Jo Icrael guloyo rwot Og

(Wel 21:31-35)

1“Ka dok waloke, wacito tung kumalo i yoo ma dok i Bacan; ci Og rwot me Bacan ocore obino ikomwa, en ki lwake ducu, kalweny i Edrei. 2Ento Rwot owaco bota ni, ‘Pe ilwore; pien dong atyeko miyo en ki lwake ducu kacel ki lobone i cingi; ibitimo en kit mayam itimo ikom Cikon rwot pa jo Amor, mayam bedo i Kecbon.’ 3Kitmeno Rwot Lubangawa omiyo Og rwot me Bacan i cingwa bene, ki lwake ducu; ci waloye, wanekogi nio ka danone mo pe ma odong. 4Ikare meno wamako taun pyere abicel matye ite ker pa Og me Bacan ma cokcok ki lobo me Argob ducu. 5Magi ducu onongo taun madito ma kicegogi woko ki cel matek mutinge malo likung, ma gitye ki dog celgi ma kicegogi ki rii, dok bene taun mukene matinotino onongo gitye ma pe kikwano mapol ma pe kicelogi ki cel. 6Wajwero taun gi woko liweng, dok bene waneko co wa ki mon ki lutino ducu kit mayam watimo ikom Cikon rwot me Kecbon. 7Ento lee makwo ducu ki jami ma wayako ki i taun gi watero odoko mewa. 8Kitmeno ikare ca wakwanyo lobo meno ki i cing luker aryo pa jo Amor mayam gitye loka Jordan, nia ki i nota me Arnon nio wa ikom got Kermon. 9(Jo me Cidon gilwongo Kermon ni, Cirion, ento jo Amor gilwongo ni Cenir.) 10Yam wamako taun ducu ma iwi cere, kacel ki lobo Gilead ducu ki Bacan, nio kwede wa i Caleka ki Edrei, ma gin aye taun ma gitye ite ker pa Og i lobo Bacan. 11(Pien Og rwot me Bacan en aye yam onongo odong kene ki ikin jo Repaim. Nen, kitandane yam obedo kitanda nyonyo ma bore romo mita angwen ki lace mita aryo. Dok bene pud tye i Raba ma en taun madit pa jo Ammon.” )

Kaka ma gunongo kabedo inge Jordan tung kunyango

(Wel 32:1-42)

12“Ikare meno, ma wacamo lobo ma kenyo, an amiyo lobo bot jo pa Reuben ki jo pa Gad, kun wang lobone cake ki i Aroer, ma i dog nota me Arnon, kacel ki nucu lobo godi me Gilead ki taun madito ducu matye iye. 13Lobo Gilead mudonge, ki lobo Bacan ducu, en aye lobo Argob ducu, mayam obedo ite ker pa Og, yam amiyo bot nucu kaka pa jo Manace.”

(Lobo Bacan meno ducu kilwongo ni lobo pa jo Repaim. 14Jair, ma jo Manace, yam otero lobo ducu me Argob, en aye Bacan, nio wa iwang apoki me lobo pa jo Gecur ki pa jo Maaka, ci ocako nying gangine ki nyinge kene ni Kavot-jair, macalo pud tye wa onyo.) 15Ci amiyo lobo Gilead bot Makir; 16ki bot jo pa Reuben ki jo pa Gad amiyo lobo ma a ki i Gilead cito kwede wa i nota me Arnon, kun wang lobone obedo cwiny kulu, nio kwede wa i kulu Jabok, ma en aye wang lobo pa jo Ammon. 17Amiyo botgi Araba bene, ma Jordan aye wang apokine, nia wa i nam me Kineret nio kwede i nam me Araba, en aye nam me Kado matye i pwor got me Piciga, ma tung kunyango. 181

Dok yam acikowu ikare meno kun awaco ni, “Rwot Lubangawu dong otyeko miyowu lobo man wucam obed mewu. Oteka lwenywu ducu myero gukat loka ca inyim omegiwu jo Icrael kun nongo guruku jami lwenygi. 19Ento monwu ki lutinowu matino ki leewu makwo, (pien angeyo ni wutye ki lee madwong), gin gibidong i taun madito ma dong amiyo botwuni. 20Wukony omegiwu nio ka Rwot dong bimiyo ki gin kayweyo, kit ma en omiyowu kayweyoni, ma dong gin bene gucamo lobogi ma Rwot Lubangawu bimiyogi loka Jordan. Ci lacen wun wubidwogo, kun ngat acel acel dwogo i dul lobone ma dong amiyowuni. 21Ikare meno bene yam aciko Yocwa ni, ‘In dong ityeko neno ki wangi gin ducu ma Rwot Lubangawu otiyo ikom luker meno aryonu; Rwot dok bitimo kitmeno bene ikom ker ducu ma wubio iye ka wukato loka ca. 22Pe wulworgi, pien Rwot Lubangawu aye tye kalweny pirwu.’

Lubanga pe oye Moses oo i lobo Kanaan

232

Yam abako doga bot Rwot ikare meno kun awaco ni, 24‘Ai Rwot Lubangawa mamalo twal, in pud icako acaka me nyute bota, an latici, kit dit meri ki twero me badi, Lubanga mo pe i polo nyo iwi lobo matwero tiyo kit tic matek tutwal macalo in itiyo! 25Wek kong acit anen lobo maber ca ma loka Jordan, lobo godi maberi, ki Lebanon bene.’ 26Ento yam kiniga omako Rwot ikoma pirwu, ci pe omedo kiwinya. Rwot owaco bota ni, ‘Wek meno dong oromo! Pe dok inwo loko lok meno bota. 27Cit i it malo iwi got Piciga, ci i il wangi malo inen tung kupotoceng, tung kumalo, tung kupiny, ki tung kunyango, wek inen ducu ki wangi, pien pe ibingolo loka Jordan. 28Ento in icik Yocwa, icuk cwinye, imiye tek; pien en aye bikato loka ca kun telo wi lwak man, ci bimiyogi camo lobo ma ibinenoni.’” 29Ma omiyo wamede kabedo i nota mukemo Bet-peor.