Nwoyo Cik 4

Moses ocuku cwiny jo Icrael me bedo luwiny

1Ci Moses owaco bot jo Icrael ni, “Wuwiny cik ki kop man ma atye ka pwonyowu kwedeni, ci wucobgi, wek wubed makwo, ci wubicito wuo i lobo ma Rwot Lubanga pa kwarowu tye ka miyowu, wek wucam obed mewu. 21 Pe wumed lok mo ikom cik ma atye kacikowu kwedeni. Pe wukwany lok mo woko ki ikome, dok wugwok cik pa Rwot Lubangawu ma atye kacikowu kwede ducu. 32Yam wuneno ki wangwu gin ma Rwot otimo iwi got Baal-peor; pien yam Rwot Lubangawu okwanyo jo ducu ma gulubu jok Baal me Peor ki ikinwu, ci onekogi woko; 4ento wun jo mayam wuketo genwu ikom Rwot Lubangawu pud wutye makwo ducu wa tin. 5Nenu, dong atyeko pwonyowu ki cik mapatpat ki gin ma Rwot ongolo, macalo Rwot Lubangana ocika kwede, wek wulubgi i lobo ma wucok donyo iye me camoneni. 6Wugwokgi, wucobgi, pien meno aye bibedo ryekowu ki ngeyo pinywu inyim rok mukene. Ka gin biwinyo lwak cik magi ducu ci gibiwaco ni, ‘Adada, rok man maditi tye ki ryeko, dok gin lwak ma gingeyo piny.’ 7Pien pe tye rok mukene madit ma lubangagi bedo cok kwedgi macalo Rwot Lubangawa bedo cok kwedwa ikare ducu ma wakok bote. 8Dok pe tye rok madit mo matye ki lwak cik ki kop ma kingolo atir marom ki cik man ma tin aketo i nyimwuni.

9Ento myero wunen maber ni wugwoke kenwu ki cwinywu ducu, wek wiwu pe owil ikom gin ma wuneno ki wangwu, wek pire pe oa woko ki i cwinywu ikare me kwowu ducu. Wutit bot lutinowu ki likwayowu wek gunge 10kit mayam wucung kwede inyim Rwot Lubangawu i Koreb, ci inino meno Rwot owaco bota ni, ‘Cok lwak kacel bota, wek amii guwiny loka, gupwony lworo an pi kare ducu ma gibedo kwede iwi loboni, dok gin bene gupwony ki lutinogi.’ 113Ci yam wubino cok, ci wucung ite got ma onongo got tye ka wang ki mac ma olic wa i polo, i dye colpiny ki pol ma ocido licuc. 12Ci Rwot yam oloko kwedwu ki i dye mac. Yam wuwinyo dwon ngat maloko, ento pe wuneno kom gin mo; wuwinyo dwon keken. 134En yam otito botwu pi gicikene ma en ocikowu ni wucobi, en aye Cik apar ma en ocoyogi i kidi aryo ma apada. 145Ikare meno Rwot ocika ni apwonywu ki cik ducu ki gin ma en ongolo ducu, wek wulubgi i lobo ma wubicito loka ca ka camoneni.”

Cik ma gengo woro cal

15Ci Moses owaco ki jo Icrael ni, “Ikare mayam Rwot oloko kwedwu i Koreb ki i dye mac ca, pe wuneno kom mo; 166pimeno wugwoke wek pe wubal pi payo cal mo pirwu kenwu, kadi cal kom gin mo keken maporo laco nyo dako, 177nyo maporo lee mo matye iwi lobo, nyo winyo mo ma tuk ki bwome, 18nyo gin mo ma lak alaka i ngom, nyo rec mo keken. 19Dok wugwoke wek ka wuilo wangwu malo i polo; ka wuneno ceng ki dwe ki lwak lakalatwe ma i polo, ci cwinywu pe oterwu karyebe piny inyimgi ka worogi. Rwot Lubangawu omiyo magi bot rok ducu ma iwi lobo. 208Ento yam Rwot olarowu woko ki i lobo Ejipt, ki i rukmac ca ma otwak, wek wubed jone kikome macalo ikare man. 219Dok bene yam kiniga omako Rwot ikoma pirwu, ci okwongo kwong ni an pe abingolo kulu Jordan, dok bene pe abidonyo i lobo maber ma Rwot Lubangawu tye kamiyowu me aleyawu. 22En bene owaco ni an abito woko ki i lobo man, dok pe abimedo kingolo loka Jordan; ento wun aye wubingolo wukato loka ca pi camo lobo ca maber tutwali. 23Wugwoke wek wiwu pe owil ikom gicike pa Rwot Lubangawu mayam en ocike kwedwu wek pe wutii cal apaya mo maporo kom gin mo mayam Rwot Lubangawu okwero ni pe wutii. 2410Pien Rwot Lubangawu en mac ma wango piny woko liweng, en Lubanga ma lanyeko

25Ka dong wunywalo lutino ki likwayo, ma dong wudike i lobo ca, kace wupoto ibal kekenwu pi tiyo cal apaya maporo kom gin mo keken, ka wutimo gin manen marac iwang Rwot Lubangawu, ci wubimiyo kiniga make ikomwu. 26Tin dong alwongo polo ki lobo gubed caden botwu ikom lok man ni, ka pe wulubu lok man wubito wutum woko oyotoyot ki i lobo ma dong wucok ngolo Jordan ka camone; dok pe wubirii iye kare malac, ento gibityekowu woko liweng. 2711Dok Rwot biketowu woko ata ikin rok mapatpat, ci wubidong ma welwu nok tutwal i dye lurok kama Rwot biryemowu wucito iye. 28Ki i rok kunu wubiworo iye lwak lubanga mapol ma kipayo calgi ki ikom bao nyo ki ikom got ma kitiyo ki cing dano, ma pe gineno piny, dok bene pe giwinyo lok, pe gicamo, dok bene pe gingweyo piny. 2912Ento ki i lobo kunu en aye wubicako lega iye bot Rwot Lubangawu ci en biwinyowu, ka wulego bote ki cwinywu ducu. 30Ka piny oloyowu, ma dong gin meno ducu opoto ikomwu ikare me lacen, ci wubiloke wudwogo cen bot Rwot Lubangawu, ci wubiworo doge. 31Pien Rwot Lubangawu en Lubanga ma lakica: pe bitenyowu ata, pe bityekowu woko, wiye pe biwil ikom gicike mayam ocike bot kwarowu, mayam okwongo pire botgi.

32Kong wupeny pi gin mayam otime con ca, mayam okwongo nyimwu cake ikom nino mayam Lubanga ocweyo iye dano iwi lobo. Kong wupeny kite nia ikin piny ducu, ka yam nyo gin madit macalo man kong otiine, nyo yam kong ki winyo pire kamo. 33Yam kong tye rok mo ma guwinyo dwon lubanga mo maloko kun a ki i dye mac, kit mayam wun wuwinyo, ci pud gubedo makwo? 34Nyo yam kong lubanga mo otemo cito kakwanyo rok mo me bedo pire kene ki ikin rok mukene marom ki gin ducu mayam Rwot Lubangawu otimo pirwu i lobo Ejipt kun wuneno ki wangwu? Rwot onyutu twerone i yo mapol, ki lanyut ki tango madongo; dok bene otiyo gin makelo lworo madwong. 3513Yam kinyutu botwu wek wunge ni Rwot aye Lubanga; pe tye Lubanga mo mukene doki. 36Oweko wuwinyo dwone ma a ki i polo pi tiro kitwu; dok onyutu botwu mace madit iwi lobo, ka dok wuwinyo dwone ki i dye mac. 37En yam omaro kwariwu, omiyo en oyerowu, ci okwanyowu woko ki i Ejipt pi teke madwong ma en kikome tye kwedwu. 38En oryemo rok madito ki matego makatowu ki inyimwu pi kelowu i lobogi, wek omii lobogi botwu wek wucam obed mewu macalo ikare man. 39Myero dong wunge tin, dok wuket icwinywu ni, Rwot aye Lubanga matye malo i polo ki piny iwi lobo; pe tye mo mukene. 40Pimeno wumak cike ki gin ma ociko ducu ma tin acikowu kwede, wek nyimwu obed leng, ki nyim lutinowu ma bilubuwu bene obed leng, wek wurii pi kare malac i lobo ma Rwot Lubangawu tye ka miyowu matwal.”

Taun me laro luneko matye tung kunyango me Jordan

(Nwo 19:1-13)

4114

Ikare meno Moses opoko taun adek pat tung kunyango me Jordan, 42wek lunek dano ma nongo pe guneko luwotgi akaka, kun nongo mone mo pe ikin gi guring iye gular komgi wek pe kinekgi ka guo i taun magi. 43Bejer ma i tim ma obedo cerecere pi jo pa Reuben, Ramot i Gilead pi jo pa Gad ki Golan i Bacan pi jo pa Manace.

Acaki miyo cik pa Lubanga

44Man aye cik mayam Moses omiyo bot jo Icrael; 45gin aye lok me caden ducu, ki cik ki gin ma kingolo ducu mayam Moses oloko bot jo Icrael ikare ma dong gua woko ki i Ejipt. 46En oloko botgi ki i loka Jordan, i nota ma okemo Bet-peor, i lobo pa Cikon rwot pa jo Amor mayam bedo i Kecbon, mayam Moses ki jo Icrael guloyo ka dong gua woko ki i Ejipt. 47Gucamo lobone ki lobo pa Og rwot me Becan, gin luker aryo pa jo Amor mayam gubedo loka Jordan tung kunyango. 48Wang lobone ocake ki i Aroer ma i dog nota me Arnon ocito kwede wa i got Cirion, ma en aye Kermon, 49kacel ki Araba ducu ma i tung kunyango me Jordan o kwede wa i nam me Araba ma i pwor got me Piciga.