Nwoyo Cik 5

Cik apar

(Nia 20:1-17)

1Moses olwongo jo Icrael ducu ci owaco botgi ni, “Wun jo Icrael, wuwiny cik ducu ki gin ma kingolo ma aloko tin ma wuwinyo ki itwu; myero wupwonye ikomgi dok wugwoke wek wulubgi. 2Yam Rwot Lubangawa oketo gicike kwedwa i Koreb. 3Rwot yam pe oketo gicike man ki kwarowa keken, ento ocike kwedwa bene wan jo ducu ma watye kany tin makwoni. 4Rwot yam oloko kwedwu wang ki wang ite got ki i dye mac. 5Ikare meno an acung ikin Rwot ki wun kun atito botwu lok pa Rwot; pien yam wubedo kalworo mac, ci pe wumedo ki ito malo wa iwi got.

En yam owaco ni, 6‘An a Rwot Lubangawu mayam akwanyowu woko ki i lobo Ejipt, iot me opii.

7Pe wuwor lubanga mukene, kono an kena. 81

Pe wuyub cal apaya mo, nyo cal gin mo matye malo i polo, nyo gin matye piny iwi lobo, nyo gin matye i pii ma ite lobo. 92Pe wuryebe piny inyimgi, pe wuworgi; pien an aye a Rwot Lubangawu, an Lubanga ma lanyeko. Aketo can ikom likwayo pi bal pa kwarogi nio i yalwak me adek ki me angwen pa jo ma daga, 10ento anyutu mar ma pe loke ikom jo alip ki alip ma gimara, ma gimako cika. 113

Pe wulwong nying Rwot Lubangawu nonono; pien Rwot bimiyo kop loyo dano ma lwongo nyinge nonono. 124

Wugwok nino me Cabit, wukwer obed maleng, kit mayam Rwot Lubangawu ocikowu kwede. 135Wubitic matek pi nino abicel, kun wutiyo iye ticwu ducu; 14ento inino me abirone en aye Cabit pa Rwot Lubangawu. Inino meno pe wugud iye tic mo, wun ki komwu, nyo awobewu, nyo anyirawu, kadi opiiwu nyo angecawu, kadi twon ma mewu nyo kanawu nyo dyangi mo keken, kadi labedo ma bedo i gangwu, wek opiiwu ki angecawu guywe macalo wun. 15Myero wupo ni, yam wun wubedo opii i lobo Ejipt, ci Rwot Lubangawu okwanyowu woko ki kunu ki twero me bade ki cinge ma oryeyo; ma omiyo Rwot Lubangawu ocikowu ni wugwok nino me Cabit. 166

Wor woru ki meni, macalo Rwot Lubangani ociki, wek rii i lobo, dok wek ibed ma nyimi leng, i lobo ma Rwot Lubangani bimiyo botwu. 177

Pe ineki. 188

Pe i tim abor. 199

Pe ikwal gin mo. 2010

Pe ibed caden me goba ikom lawoti. 2111

Cwinyi pe opuke ikom dako pa lawoti, pe ipar ot pa lawoti, kadi potone, nyo opiine, nyo angecane, nyo twone, nyo kanane nyo kadi gin mo ma lawoti tye kwede.’ 2212

Rwot yam oloko lok man bot jowu ma gucoke ducu kun loko ki dwon malongo ki i dye mac ki pol ki colpiny ma ocido licuc; pe dok omedo iye lok mukene. Yam en ocoyo lok man ducu ikom kidi aryo ma apada, ci omiyogi bota.”

Lworo pa lwak

(Nia 20:18-21)

23“Ka yam wuwinyo dwon man ma a ki i dye colpiny, kun got tye ka wang ki mac, wubino bota cok, ludito wi kakawu ducu, ki ludongo mewu. 24Ci wuwaco ni, ‘Nen, Rwot Lubangawa dong onyutu botwa deyone ki dite, dok watyeko winyo dwone bene ka kati ki i dye mac; dong tin waneno ka Lubanga loko ki dano ci dano pud bedo makwo. 25Dong pingo myero wato kombedi? Pien mac man madit bityekowa woko; ka pud wamede dok kawinyo dwon Rwot Lubangawa maloko kwedwani, ci wabito woko. 26Anga ma ikin jo ducu ma gitye ki kom mayam kong owinyo dwon Lubanga makwo maloko ki i dye mac, kit ma wan wawinyoni, ci pud gubedo makwo? 27In inyik cok, iwiny lok ducu ma Rwot Lubangawa biloko, ci itit botwa lok ducu ma Rwot Lubangawa biloko boti; wan wabiwinyo ci wabilubu.’

28Rwot yam owinyo lokwu ma wuloko botani; ci Rwot owaca ni, ‘Atyeko winyo lok pa jo man ma guloko bota; lok ma guwaco ducu guloko maber. 29Kono yam gibedo jwijwi ki cwiny macalo meno, me lwora ki me gwoko cika ducu, wek nyimgi obed leng kacel ki pa lutinogi matwal, kono ber! 30Cit iwac botgi ni dong gudok i kemagi. 31Ento in icung cok kangeta kany, ci abititti lok ducu ma aciko, ki lwak cik ki gin ma angolo ducu ma ibipwonyogi kwede, wek gulubgi i lobo ma atye kamiyogi me bedo meggi.’

32Dong wun wugwoke wek wulub gin ma Rwot Lubangawu ocikowu kwede ducu; kun pe wuturu cike mo keken. 33Wuwot kun wulubu yo ducu mayam Rwot Lubangawu ocikowu kwede, wek wubed makwo, wek yo nyimwu obed leng, wek wurii pi kare malac i lobo ma wubicamo doko mewu.”