Nwoyo Cik 6

Cik madit makato

1“Magi aye cik ducu, ki gin ma Rwot Lubangawu ongolo ni apwonywu kwede, wek wulubgi i lobo ma wubicito iye loka ca ka camone. 2Piman wulwor Rwot Lubangawu, wun kikomwu ki likwayowu, kun wugwoko cike ducu ki lok ducu ma en ociko ma atye ka cikowu kwede, nino ducu me kwo mewu, wek wurii iwi lobo pi kare malac. 3Pimeno, wun jo Icrael wuwiny, wugwoke wek wulubgi, wek nyimwu obed leng, wek wunya bene mapol, kit ma Rwot Lubanga pa kwarowu yam owaco botwu i lobo ma miu ma ceko cam mabup. 41

Wuwiny, wun jo Icrael: Rwot Lubangawa en Rwot acel. 52Mar Rwot Lubangani ki cwinyi ducu, ki tipuni ducu ki teki ducu. 63 Pe wuwek wiwu owil ilok magi ducu ma acikowu kwede tini. 7Wubipwonyo lutinowu kwedgi matek. Wupwonygi kwede ka wubedo i odiwu, ki ka wutye kawot i yoo, ka wubutu piny ki ka wua malo. 8Wutwe i ngut cingwu ki wutwe bene itur nyimwu me lapo wiwu. 9Dok wubicoyo ikom okar dogola me odiwu, ki i dog gangwu.”

Can ma bipoto ikom ludingo

104

“Rwot Lubangawu dong otyeko kwonge bot kwariwu Abraim, bot Icaka ki bot Yakobo ni ebimiyowu lobo ma etye ka terowu iyeni. Lobo matye ki taun madito ma gibeco mayam pe wun aye wugerogi. 11Odi ma gupong ki jami ducu ma gibeco mayam pe wun aye wupongo igi, ki bur pii ma kikwinyogi ma pe wun aye wukwinyogi, ki poto olok ki poto jeituni ma pe wun aye wupitogi. Ka dong wucamo wuyeng, 12ci ber wugwoke wek wiwu pe owil woko ikom Rwot mayam okwanyowu woko ki i lobo Ejipt, i ot me opii. 135Wulwor Rwot Lubangawu, wutii pi en, wukwong kwongwu ki nyinge. 14Pe wuwor lubanga mukene ducu, macalo lwak lubanga pa rok mapatpat ma birumuwu dyere, 15pien Rwot Lubangawu matye ikinwu ni en Lubanga ma lanyeko; wek kiniga pe omak Rwot Lubangawu ikomwu, miyo en bityekowu woko liweng ki iwi lobo. 166

Pe wuom i Rwot Lubangawu, macalo yam wuomo kwede iye i Maca. 17Omyero wunen ni wuketo cwinywu kagwoko cik ducu, ki lok me caden ducu ma Rwot Lubangawu ocikowu kwede. 18Wutii gin ducu matye atir dok ber iwang Rwot. Pien ka wutiyo meno, ci biweko wubibedo maber, dok wubicito ci wubicamo lobo ma ceko cam mayam Rwot okwongo pire ni ebimiyo botwu, 19kun biryemo lukworwu woko ducu ki inyimwu, macalo Rwot yam ociko.

20Ikare me anyim, ka lutinoni bipenyi ni, ‘Pingo Rwot Lubangawa ocikowa me lubu cik ki caden magi ducu?’ 21Ci Wubidok iye ni, ‘Wan yam onongo wabedo opii pa Parao i Ejipt, ci Rwot okwanyowa ki i Ejipt pi teko mere madit. 22Yam Rwot onyutu lwak lanyut ki tango madito dok malik tutwal ikom lobo Ejipt ki ikom Parao ki ikom jo ma i ode ducu ma waneno ki wangwa. 23En okwanyowa woko ki i lobo Ejipt wek ekelwa kany, wek eminiwa lobo mayam en okwongo pire ni ebimiyo bot kwarowa. 24Kitmeno Rwot yam ocikowa ni walub cik magi ducu, dok ni walwor Rwot Lubangawa wek wabed maber nakanaka, wek en ogwokwa wabed makwo i lobowa kun bene nongo wapong ki gum i iye kit macalo tye katime kombedini. 25Ka wagwoke kun walubu cik magi ducu ma Rwot Lubangawa ocikowa kwede ci wabibedo jo ma kitwa atir inyime.’”