Nwoyo Cik 7

Jo pa Rwot

(Nia 34:11-16)

11

“Rwot Lubangawu tye katerowu i lobo ma wubidonyo iye kacamone me bedo mewu. En biryemo rok mapol woko ki inyimwu, jo Kit, jo Girgac, jo Amor, jo Kanaan, jo Periji, jo Kiv ki jo Jebuc, gin rok ducu abiro ma gidito dok gitego makatowu. 2Ka Rwot Lubangawu omiyogi i cingwu ci wubiloyogi woko, ci omyero wudyergi i cing Rwot, kun wujwergi woko liweng. Pe wuket gicike mo kwedgi, dok pe wutimgi kica. 3Pe wunyome kwedgi, dok bene pe wuwek lutinowu gunyome kwedgi. 4Pien gibiloko cwiny lutinowu woko miyo pe dok gibiwora ento gibiworo lubanga mogo mukene; ci bimiyo kiniga mako Rwot ikomwu ci en bityekowu woko oyot. 52Ento wubitimogi kit man: wubimuku keno jogigi woko, wubinginyo wir jogi woko, wubitongo yadi ma kipitogi kama giworo iye jok ma dako ma kilwongo Acera, kiwango cal apayagi ki mac. 63

Pien wun aye wudoko jo maleng pi Rwot Lubangawu, Rwot Lubangawu otyeko yerowu ki ikin rok ducu matye iwi lobo wek wubed jone kikome. 7Rwot Lubangawu pe omarowu dok pe oyerowu ni pien wun aye welwu dwong makato rok mukeneni ducu; wun aye yam onongo wunok maloyo ki ikin rok ducu. 8Ento Rwot yam okwanyowu woko ki twero me bade, okokowu ki i ot me opii ki i cing Parao rwot me Ejipt pien en marowu, dok tye kacobo kwong mayam en okwongo bot kwarowu. 94Myero dong wunge ni, Rwot Lubangawu en Lubanga kikome, Lubanga ma gene, ma gwoko gicikene, dok gwoko mar mere ma pe loke bot jo ma gimare ki ma gimako lok ma en ociko ducu, nio wa i yalwak alip kulu. 10Dok en pe bigale kaculu kwor ikom jo ma gikwere kikomgi, kun nekogi woko. En pe bijalo dano ma okwere; biculu kwor ikom dano meno kikome. 11Pimeno wugwoke wek wulub lok ma en ociko ki cik ducu ki gin ma en ongolo ducu ma acikowu kwede tin.”

Gum ma bino pi bedo lawiny

(Lev 26:3-13; Nwo 28:1-14)

125

Moses omede ki lok bot jo Icrael ni, “Kace wun wubiwinyo cik magi ducu ma kicikoni, kun wugwokogi dok wulubugi, ci bimiyo Rwot Lubangawu bene bigwoko gicikene kwedwu, ki mar mere ma pe loke mayam en okwongo pire bot kwariwu. 13En bimarowu, bimiyowu gum, dok bimiyo wubinya mapol. En bimiyo gum ikom lutino ma wubinywalo ki ikom cam ma bicek i potiwu, nganowu ki kongo bwinowu ki moowu, ki dyangiwu ki romiwu binya, bibedo mapol i lobo mayam en okwongo pire bot kwariwu ni ebimiyowu. 14En bimiyowu gum makato pa rok ducu; laco mo nyo dako mo ma lalur pe binen ikinwu nyo ikin limwu makwo. 15Rwot bigwokowu ki ikit two ducu. En pe biketo kit two mo ikomwu ikin two maracu me Ejipt ma wun wungeyoni, ento en biketogi ikom jo ducu ma kwerowu. 16Wun bene wubityeko rok ducu ma Rwot Lubangawu biketogi i cingwu; kica pe omakwu ikomgi. Pe wubiworo lubangagi, pien bidoko owic botwu.

17Pe wulwod lok ki i cwinywu ni, ‘Rok magi ducu gin gidito makato wan, wabiryemogi ningning?’ 18Pe wubibedo ki lworo mo ikomgi, ento wubipo gin mayam Rwot Lubangawu otiyo ikom Parao ki ikom jo Ejipt ducu. 19Wubipo kit mayam otemo kwede cwinygi ki tic madito kun wuneno ki wangwu, kacel ki lanyut ki tango mapol, ki twero me bade ki cinge ma oryeyo, ma Rwot Lubangawu yam okwanywu kwede woko ki i Ejipt. Rwot Lubangawu bitiyo kitmeno ikom rok ducu ma wutye kalworogini. 20Dok bene Rwot Lubangawu bicoro pino jobi ikin gi, nio wang ma jo mayam gudong, ki jo ma gikane woko ki botwu dong kinekogi woko. 21Pe atiba omakwu ikomgi, pien Rwot Lubangawu tye ikinwu, ma en Lubanga madit ma ryango kom dano. 22Rwot Lubangawu bijwero rok magi woko ki inyimwu motmot; pe wutwero tyekogi ducu oyotoyot, miyo gitim bimede mapol, ma okato komwu woko. 23Ento Rwot Lubangawu bimiyogi i cingwu, ci man biryango komgi matek tutwal, nio ka wutyekogi woko. 24Dok en bimiyo lukergi i cingwu, ci wubimiyo nyinggi rwenyo woko ki ite polo. Pe binen dano mo ma bicung kalweny ikomwu, nio ka wutyekogi woko. 25Cal lubangagi ma kipayo apaya bene wubiwangogi woko ki mac. Pe wubiparo ryal ki jabu ma kimwono ikomgi, pe wubikwanyo mo me bedo mewu, wek pe odok owic me makowu; pien meno aye gin me kwer mada ki bot Rwot Lubangawu. 26Pimeno pe wubikelo gin me kwer i odiwu, miyo lakit acena ma kiceno ki jo ma gidagwu kwedeni donyo i odiwu. Omyero wukwer woko adada, wuca pirgi woko matwal, pien Rwot dong otyeko cenogi woko.”