Nwoyo Cik 8

Lobo maber ma jo Icrael bileyo

1“Wulub cik ducu ma tin atye kacikowu kwedeni maber, wunen ni wulubugi, wek wubed makwo, wunya mapol, wucit wucam lobo ca mayam Rwot okwongo pire me miyo bot kwariwu. 2Dok omyero wupo kom yo ducu mayam Rwot Lubangawu otelowu iye i tim pi mwaka pyere angwen, wek omii wudok mamwol, kun temo iwu wek onge gin matye i cwinywu, ka nyo wubimako cike, nyo pe. 31Kitmeno en omiyo wudoko mamwol, dok omiyo kec onekowu, ci opitowu ki manna ma onongo yam pe wungeyo, kadi wa kwariwu bene yam pe gungeyo; wek oniangwu ni, dano pe bedo kwo ki kwon keken, ento dano kwo ki lok ducu ma a ki i dog Rwot. 4Ikin mwaka pyere angweni kulu bongi arukawu yam pe guti gutum woko ki ikomwu, dok tyenwu bene yam pe okwot. 5Dong omyero wunge ki i cwinywu ni, Rwot Lubangawu tye katiro kitwu macalo dano tiro kwede kit latine. 6Pimeno, wugwok cik pa Rwot Lubangawu ducu, kun bene wuwoto ma wulubu yone dok kun wulwore. 7Pien Rwot Lubangawu tye katerowu i lobo maber, ma opong ki lwak nota ora ma igi ki pii, ki wang it, ki wang pii malongo, ma gimol ki i nota ki iwi godi. 8En lobo maceko ngano ki cayiri, ki maceko olok ki oduru ki okwer pomegranat, lobo ma moo jeituni ki moo kic dwong iye. 9En lobo ma wubicamo iye cam mabup labongo can gin mo, kama gin mo pe birem iye botwu; en lobo ma gwenge bedo nyonyo iron, kama wubikwinyo iye nyonyo mola ki i cere. 10Wubicam wubiyeng, ci wubipwoyo Rwot Lubangawu pi lobo maber ma en omiyo botwu.”

Wilwic ikom Rwot bikelo can

112

“Wugwoke kekenwu wek pe wiwu owil woko ikom Rwot Lubangawu, kun pe dong wugwoko lok ma en ociko; ki gin ma ongolo, ki lwak cike ducu ma atye kacikowu kwede tin. 12Ka dong wucamo, wuyeng, ma dong wugero odi mabeco ma wubedo iye, 13dok ka dyangiwu ki romiwu dong onya mapol, ki ryalwu ki jabuwu omede madwong, ki jami ducu ma wutye kwedgi dong onya omede madwong, 14ci pe wuwek wiwu ocak doko dito dok bene pe wiwu owil woko ikom Rwot Lubangawu, mayam okwanyowu woko ki i lobo Ejipt, ki i ot me opii ca. 15Pe wuwek wiwu owil woko ni en aye mayam otelo wiwu kun wuwok kwede i tim malac ki malik bene, matye iye lwak twol ma kwirgi kec, ki oton, ki lobo ma orwo pii neko iye dano, ma pii pe iyeni, ci en okeliwu pii ma oa ki i pata got. 16En bene opitowu i tim ki manna mayam kwariwu pe gingeyo, wek olokwu wudok mwol, kun temo ki cwinywu, wek otimwu ber lacen. 17Wugwoke wuwek lwodo lok ki i cwinywu ni, ‘Tek koma ki twero me bada gira aye omiyo alimo lonyo man.’ 18Wun wubipo ikom Rwot Lubangawu, pien en aye ma miyowu tek me limo lonyo; wek en omok gicikene mayam okwongo pire bot kwarowu, macalo pud tye wa kombedi. 19Kace wiwu owil woko ikom Rwot Lubangawu, ce wucako lubu kor lwak lubanga mukene, ki tiyo botgi ki ryebe piny inyimgi, ci nen atito botwu atyer tin ni, wubito wubitum woko liweng. 20Ka pe wuworo dog Rwot Lubangawa, ci wubito wubitum woko macalo lurok ma Rwot tye kamiyogi to gitum woko ki i nyimwuni.”