Nwoyo Cik 9

Adwogi me jemo ikom Rwot

(Nia 32:1-35)

1“Wuwiny, wun jo Icrael; wubikato loka Jordan tin, wek wucit kaleyo lobo pa rok madito ki matego makatowu, ki taun gi bene madito, ma kigoyo iye cel matek ma o wa i pol, 2rok madit ma giboco, likwayo pa jo Anak, ma wungeyogi, mayam dong wuwinyo nyinggi kun kiwaco ni, ‘Anga matwero cung inyim likwayo pa Anak?’ 3Pimeno myero wunge lok man tin ni, ngat matye kawot inyimwu macalo mac ma wango piny en aye Rwot Lubangawu; en aye bityekogi, en aye bitayogi woko ki inyimwu, miyo wubiryemogi woko dok gito gitum woko oyot, macalo Rwot owaco botwuni.

4Ka dong Rwot Lubangawu otyeko ryemogi woko ki inyimwu, pe wulwod lok ki i cwinywu ni, ‘Pien wan wabedo ma kitwa atir en aye omiyo Rwot okelowa kacamo loboni.’ Omyero wunge ni, Rwot biryemo rok magi ki inyimwu pi bal maracu ducu ma gin gutimo. 5Pe wubicito kacamo lobogi pi kitwu ma atir, nyo pi leng iwu, ento pi bal maracu ma rok meno ducu gutimo en aye omiyo Rwot Lubangawu biryemogi woko ki inyimwu, dok wek ocob lok mayam okwongo bot kwarowu Abraim ki Icaka ki Yakobo.”

Jemo pa jo Icrael i Koreb

(Nia 31:18—32:35)

6“Omyero dong wunge ni, pe pi kitwu ma atir en aye omiyo Rwot Lubangawu bimiyowu lobo man maberi wek wucam; pien wun jo ma ngutwu tek. 7Ber wupo, dok bene wiwu pe owil kit mayam Rwot Lubangawu obedo ki akemo i tim. Nia wa inino mayam wua iye ki i lobo Ejipt, o kwede wa ikare ma wuo i kabedoni, wun wubedo lujemo ikom Rwot. 8Kadi wa i Koreb bene wumiyo Rwot obedo ki akemo, ci yam Rwot kiniga omake ikomwu tutwal, omiyo obwot tyekowu woko. 91Ikare mayam aito malo iwi got kagamo kidi aryo ma apadani, kidi me gicike mayam Rwot oketo kwedwu, ci abedo iwi got, ari nino pyere angwen dyeceng ki dyewor kun pe acamo dok pe amato pii bene. 10Ci Rwot omiya kidi aryo ma apada ma Lubanga onongo ocoyo ki cinge, kun ocoyo ikomgi lwak lok ducu mayam Rwot obedo kaloko iwi got ki i dye mac, inino mayam lwak ocoke iye ca. 11Ka nino pyere angwen ki dyewor pyere angwen dong okato, Rwot omiya kidi meno aryo ma apada, gin kidi me gicike. 12Ka dok Rwot owaco bota ni, ‘A malo, icit ilor piny ki kany oyot, pien joni mayam ikelogi ki i Ejipt gutyeko bale woko. Guloke, gubare woko oyot nia ki i yo mayam acikogi kwede, gutimo gigi cal jabu ma guliyo aliya.’

13Rwot dok omede ki lok kun waco bota ni, ‘Atyeko neno jo man, ci nen, gin jo ma ngutgi tek. 14Weka gira, wek dong atyekgi woko liweng; abijwayo nyinggi woko ki ite polo, ci abimiyo in i doko rok matek tutwal ki madit makatogi.’ 15Ci aloke, alor piny ki iwi got, kun got tye kawang ki mac. Onongo amako kidi apada aryo me gicike ki cinga aryo ducu. 16Ka aneno, ci nen, wutyeko timo bal inyim Rwot Lubangawu. Onongo wutimo giwu cal wod twon ma kiliyo aliya, kun wuloke, wubare woko oyot ki i yo mayam Rwot ocikowu kwedeni. 17Ci amako kidi aryo ma apada ca, abologi woko piny ki i cinga aryo ducu, atyerogi woko ki inyimwu. 18Lacen abutu aryeba cwiny inyim Rwot nino pyere angwen dyeceng ki dyewor kit macon ca. Pe acamo, pe amato pii bene pi lwak bal ducu ma wubedo katimone, kun wutimo gin manen marac iwang Rwot ma omiyo kiniga omake. 192Pien onongo lworo omaka pi kiniga pa Rwot ki akecane malyet ikomwu ma onongo cok ka tyekowu woko. Ento Rwot owinya wa ikare meno bene. 20Kiniga yam omako Rwot ikom Aron bene matek, omiyo onongo dong cok kaneke woko; ento ikare ca alego pi Aron bene. 21Dok akwanyo balwu, en aye wod twon ma wutimoni, ci awango woko ki mac, aodo, arego woko mapwot, nio ka odoko apwa; ci aonyo apwane i kulu mamol piny a ki iwi got. 223

Dok bene yam i Tabera, ki i Maca ki i Kibrot-atava wubedo kamiyo Rwot bedo ki akemo. 234Ka yam Rwot ocwalowu nia ki i Kadec-barnea kun waco ni, ‘Wucit, wucam lobo ma dong amiyowuni,’ ci wujemo woko ikom cik pa Rwot Lubangawu; yam pe wugene, dok pe wuworo doge. 24Wun wubedo lujemo ikom Rwot nia wa inino mayam acako ngeyowu iyeni.

25Kitmeno abutu aryeba cwiny inyim Rwot nino pyere angwen dyeceng ki dyewor, pien onongo Rwot owaco ni emito tyekowu woko. 26Ci yam alego bot Rwot ni, ‘Ai Rwot Lubanga, pe ityek lwaki woko, ma gin aye joni mayam ikokogi pi diti, ma ikwanyogi woko ki i Ejipt pi twero me badi. 27Ber ipo ikom lutici Abraim, Icaka ki Yakobo. Pe ibed kaparo pi tek ngut pa rok man, nyo pi timgi maracu, nyo pi balgi. 28Miyo jo me lobo Ejipt biwaco ni, in onongo pe itwero tero joni i lobo mayam iciko pire botgi. Dok gin biwaco ni pien onongo yam idaggi, omiyo ikwanyogi woko, wek inekgi woko i dye tim. 29Pien gin aye lwaki, gin joni, ma dong ikelogi woko ki teki madwong ki pi cingi ma iryeyo.’”